सुब्रह्मण्यभुजङ्गम्
सदा बालरूपाऽपि विघ्नाद्रिहन्त्री
महादन्तिवक्त्राऽपि पञ्चास्यमान्या
विधीन्द्रादिमृग्या गणेशाभिधा मे
विधत्तां श्रियं काऽपि कल्याणमूर्तिः
न जानामि शब्दं न जानामि चार्थं
न जानामि पद्यं न जानामि गद्यम्
चिदेका षडास्या हृदि द्योतते मे
मुखान्निस्सरन्ते गिरश्चापि चित्रम्
मयूराधिरूढं महावाक्यगूढं
मनोहारिदेहं महच्चित्तगेहम्
महीदेवदेवं महावेदभावं
महादेवबालं भजे लोकपालम्
यदा सन्निधानं गता मानवा मे
भवाम्भोधिपारं गतास्ते तदैव
इति व्यञ्जयन् सिन्धुतीरे य आस्ते
तमीडे पवित्रं पराशक्तिपुत्रम्
यथाब्धेस्तरङ्गा लयं यान्ति तुङ्गास्-
तथैवापदः सन्निधौ सेवतां मे
इतीवोर्मिपङ्क्तीर्नृणां दर्शयन्तं
सदा भावये हृत्सरोजे गुहं तम्
गिरौ मन्निवासे नरा येऽधिरूढास्-
तदा पर्वते राजते तेऽधिरूढाः
इतीव ब्रुवन् गन्धशैलाधिरूढः
स देवो मुदे मे सदा षण्मुखोऽस्तु
महाम्भोधितीरे महापापचोरे
मुनीन्द्रानुकूले सुगन्धाख्यशैले
गुहायां वसन्तं स्वभासा लसन्तं
जनार्तिं हरन्तं श्रयामो गुहं तम्
लसत्स्वर्णगेहे नृणां कामदोहे
सुमस्तोमसञ्छन्नमाणिक्यमञ्चे
समुद्यत्सहस्रार्कतुल्यप्रकाशं
सदा भावये कार्त्तिकेयं सुरेशम्
रणद्धंसके मञ्जुलेऽत्यन्तशोणे
मनोहारिलावण्यपीयूषपूर्णे
मनःषट्पदो मे भवक्लेशतप्तः
सदा मोदतां स्कन्द ते पादपद्मे
सुवर्णाभदिव्याम्बरैर्भासमानां
क्वणत्किङ्किणीमेखलाशोभमानाम्
लसद्धेमपट्टेन विद्योतमानां
कटिं भावये स्कन्द ते दीप्यमानाम्
पुलिन्देशकन्याघनाभोगतुङ्ग-
स्तनालिङ्गनासक्तकाश्मीररागम्
नमस्याम्यहं तारकारे तवोरः
स्वभक्तावने सर्वदा सानुरागम्
विधौ कॢप्तदण्डान् स्वलीलाधृताण्डान्
निरस्तेभशुण्डान् द्विषत्कालदण्डान्
हतेन्द्रारिषण्डाञ्जगत्त्राणशौण्डान्
सदा ते प्रचण्डान् श्रये बाहुदण्डान्
सदा शारदाः षण्मृगाङ्का यदि स्युः
समुद्यन्त एव स्थिताश्चेत् समन्तात्
सदा पूर्णबिम्बाः कलङ्कैश्च हीनास्-
तदा त्वन्मुखानां ब्रुवे स्कन्द साम्यम्
स्फुरन्मन्दहासैः सहंसानि चञ्चत्
कटाक्षावलीभृङ्गसङ्घोज्ज्वलानि
सुधास्यन्दिबिम्बाधराणीशसूनो
तवाऽऽलोकये षण्मुखाम्भोरुहाणि
विशालेषु कर्णान्तदीर्घेष्वजस्रं
दयास्यन्दिषु द्वादशस्वीक्षणेषु
मयीषत् कटाक्षः सकृत् पातितश्चेद्-
भवेत् ते दयाशील का नाम हानिः
सुताङ्गोद्भवो मेऽसि जीवेति षड्धा
जपन् मन्त्रमीशो मुदा जिघ्रते यान्
जगद्भारभृद्भ्यो जगन्नाथ तेभ्यः
किरीटोज्ज्वलेभ्यो नमो मस्तकेभ्यः
स्फुरद्रत्नकेयूरहाराभिरामश्-
चलत्कुण्डलश्रीलसद्गण्डभागः
कटौ पीतवासाः करे चारुशक्तिः
पुरस्तान्ममास्तां पुरारेस्तनूजः
इहाऽऽयाहि वत्सेति हस्तान् प्रसार्या-
ऽऽह्वयत्यादराच्छङ्करे मातुरङ्कात्
समुत्पत्य तातं श्रयन्तं कुमारं
हराश्लिष्टगात्रं भजे बालमूर्तिम्
कुमारेशसूनो गुह स्कन्द सेना-
पते शक्तिपाणे मयूराधिरूढ
पुलिन्दात्मजाकान्त भक्तार्तिहारिन्
प्रभो तारकारे सदा रक्ष मां त्वम्
प्रशान्तेन्द्रिये नष्टसंज्ञे विचेष्टे
कफोद्गारिवक्त्रे भयोत्कम्पिगात्रे
प्रयाणोन्मुखे मय्यनाथे तदानीं
द्रुतं मे दयालो भवाग्रे गुह त्वम्
कृतान्तस्य दूतेषु चण्डेषु कोपाद्-
दहच्छिन्धि भिन्धीति मां तर्जयत्सु
मयूरं समारुह्य मा भीरिति त्वं
पुरः शक्तिपाणिर्ममाऽऽयाहि शीघ्रम्
प्रणम्यासकृत् पादयोस्ते पतित्वा
प्रसाद्य प्रभो प्रार्थयेऽनेकवारम्
न वक्तुं क्षमोऽहं तदानीं कृपाब्धे
न कार्याऽन्तकाले मनागप्युपेक्षा
सहस्राण्डभोक्ता त्वया शूरनामा
हतस्तारकः सिंहवक्त्रश्च दैत्यः
ममान्तर्हृदिस्थं मनःक्लेशमेकं
न हंसि प्रभो किं करोमि क्व यामि
अहं सर्वदा दुःखभारावसन्नो
भवान् दीनबन्धुस्त्वदन्यं न याचे
भवद्भक्तिरोधं सदा कॢप्तबाधं
ममाधिं द्रुतं नाशयोमासुत त्वम्
अपस्मारकुष्ठक्षयार्शःप्रमेह-
ज्वरोन्मादगुल्मादिरोगा महान्तः
पिशाचाश्च सर्वे भवत्पत्रभूतिं
विलोक्य क्षणात् तारकारे द्रवन्ते
दृशि स्कन्दमूर्तिः श्रुतौ स्कन्दकीर्तिर्-
मुखे मे पवित्रं सदा तच्चरित्रम्
करे तस्य कृत्यं वपुस्तस्य भृत्यं
गुहे सन्तु लीना ममाशेषभावाः
मुनीनामुताहो नृणां भक्तिभाजाम्
अभीष्टप्रदाः सन्ति सर्वत्र देवाः
नृणामन्त्यजानामपि स्वार्थदाने
गुहाद्देवमन्यं न जाने न जाने
कलत्रं सुता बन्धुवर्गः पशुर्वा
नरो वाऽथ नारी गृहे ये मदीयाः
यजन्तो नमन्तः स्तुवन्तो भवन्तं
स्मरन्तश्च ते सन्तु सर्वे कुमार
मृगाः पक्षिणो दंशका ये च दुष्टास्-
तथा व्याधयो बाधका ये मदङ्गे
भवच्छक्तितीक्ष्णाग्रभिन्नाः सुदूरे
विनश्यन्तु ते चूर्णितक्रौञ्चशैल
जनित्री पिता च स्वपुत्रापराधं
सहेते न किं देवसेनाधिनाथ
अहं चातिबालो भवाँल्लोकतातः
क्षमस्वापराधं समस्तं महेश
नमः केकिने शक्तये चापि तुभ्यं
नमश्छाग तुभ्यं नमः कुक्कुटाय
नमः सिन्धवे सिन्धुदेशाय तुभ्यं
पुनः स्कन्दमूर्ते नमस्ते नमोऽस्तु
जयाऽऽनन्दभूमन् जयापारधामन्
जयामोघकीर्ते जयाऽऽनन्दमूर्ते
जयाऽऽनन्दसिन्धो जयाशेषबन्धो
जय त्वं सदा मुक्तिदानेशसूनो
भुजङ्गाख्यवृत्तेन कॢप्तं स्तवं यः
पठेद्भक्तियुक्तो गुहं सम्प्रणम्य
स पुत्रान् कलत्रं धनं दीर्घमायुर्-
लभेत् स्कन्दसायुज्यमन्ते नरः सः
॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-सुब्रह्मण्यभुजङ्गं सम्पूर्णम्॥
సుబ్రహ్మణ్యభుజఙ్గమ్
సదా బాలరూపాఽపి విఘ్నాద్రిహన్త్రీ
మహాదన్తివక్త్రాఽపి పఞ్చాస్యమాన్యా
విధీన్ద్రాదిమృగ్యా గణేశాభిధా మే
విధత్తాం శ్రియం కాఽపి కల్యాణమూర్తిః
న జానామి శబ్దం న జానామి చార్థం
న జానామి పద్యం న జానామి గద్యమ్
చిదేకా షడాస్యా హృది ద్యోతతే మే
ముఖాన్నిస్సరన్తే గిరశ్చాపి చిత్రమ్
మయూరాధిరూఢం మహావాక్యగూఢం
మనోహారిదేహం మహచ్చిత్తగేహమ్
మహీదేవదేవం మహావేదభావం
మహాదేవబాలం భజే లోకపాలమ్
యదా సన్నిధానం గతా మానవా మే
భవామ్భోధిపారం గతాస్తే తదైవ
ఇతి వ్యఞ్జయన్ సిన్ధుతీరే య ఆస్తే
తమీడే పవిత్రం పరాశక్తిపుత్రమ్
యథాబ్ధేస్తరఙ్గా లయం యాన్తి తుఙ్గాస్-
తథైవాపదః సన్నిధౌ సేవతాం మే
ఇతీవోర్మిపఙ్క్తీర్నృణాం దర్శయన్తం
సదా భావయే హృత్సరోజే గుహం తమ్
గిరౌ మన్నివాసే నరా యేఽధిరూఢాస్-
తదా పర్వతే రాజతే తేఽధిరూఢాః
ఇతీవ బ్రువన్ గన్ధశైలాధిరూఢః
స దేవో ముదే మే సదా షణ్ముఖోఽస్తు
మహామ్భోధితీరే మహాపాపచోరే
మునీన్ద్రానుకూలే సుగన్ధాఖ్యశైలే
గుహాయాం వసన్తం స్వభాసా లసన్తం
జనార్తిం హరన్తం శ్రయామో గుహం తమ్
లసత్స్వర్ణగేహే నృణాం కామదోహే
సుమస్తోమసఞ్ఛన్నమాణిక్యమఞ్చే
సముద్యత్సహస్రార్కతుల్యప్రకాశం
సదా భావయే కార్త్తికేయం సురేశమ్
రణద్ధంసకే మఞ్జులేఽత్యన్తశోణే
మనోహారిలావణ్యపీయూషపూర్ణే
మనఃషట్పదో మే భవక్లేశతప్తః
సదా మోదతాం స్కన్ద తే పాదపద్మే
సువర్ణాభదివ్యామ్బరైర్భాసమానాం
క్వణత్కిఙ్కిణీమేఖలాశోభమానామ్
లసద్ధేమపట్టేన విద్యోతమానాం
కటిం భావయే స్కన్ద తే దీప్యమానామ్
పులిన్దేశకన్యాఘనాభోగతుఙ్గ-
స్తనాలిఙ్గనాసక్తకాశ్మీరరాగమ్
నమస్యామ్యహం తారకారే తవోరః
స్వభక్తావనే సర్వదా సానురాగమ్
విధౌ కౢప్తదణ్డాన్ స్వలీలాధృతాణ్డాన్
నిరస్తేభశుణ్డాన్ ద్విషత్కాలదణ్డాన్
హతేన్ద్రారిషణ్డాఞ్జగత్త్రాణశౌణ్డాన్
సదా తే ప్రచణ్డాన్ శ్రయే బాహుదణ్డాన్
సదా శారదాః షణ్మృగాఙ్కా యది స్యుః
సముద్యన్త ఏవ స్థితాశ్చేత్ సమన్తాత్
సదా పూర్ణబిమ్బాః కలఙ్కైశ్చ హీనాస్-
తదా త్వన్ముఖానాం బ్రువే స్కన్ద సామ్యమ్
స్ఫురన్మన్దహాసైః సహంసాని చఞ్చత్
కటాక్షావలీభృఙ్గసఙ్ఘోజ్జ్వలాని
సుధాస్యన్దిబిమ్బాధరాణీశసూనో
తవాఽఽలోకయే షణ్ముఖామ్భోరుహాణి
విశాలేషు కర్ణాన్తదీర్ఘేష్వజస్రం
దయాస్యన్దిషు ద్వాదశస్వీక్షణేషు
మయీషత్ కటాక్షః సకృత్ పాతితశ్చేద్-
భవేత్ తే దయాశీల కా నామ హానిః
సుతాఙ్గోద్భవో మేఽసి జీవేతి షడ్ధా
జపన్ మన్త్రమీశో ముదా జిఘ్రతే యాన్
జగద్భారభృద్భ్యో జగన్నాథ తేభ్యః
కిరీటోజ్జ్వలేభ్యో నమో మస్తకేభ్యః
స్ఫురద్రత్నకేయూరహారాభిరామశ్-
చలత్కుణ్డలశ్రీలసద్గణ్డభాగః
కటౌ పీతవాసాః కరే చారుశక్తిః
పురస్తాన్మమాస్తాం పురారేస్తనూజః
ఇహాఽఽయాహి వత్సేతి హస్తాన్ ప్రసార్యా-
ఽఽహ్వయత్యాదరాచ్ఛఙ్కరే మాతురఙ్కాత్
సముత్పత్య తాతం శ్రయన్తం కుమారం
హరాశ్లిష్టగాత్రం భజే బాలమూర్తిమ్
కుమారేశసూనో గుహ స్కన్ద సేనా-
పతే శక్తిపాణే మయూరాధిరూఢ
పులిన్దాత్మజాకాన్త భక్తార్తిహారిన్
ప్రభో తారకారే సదా రక్ష మాం త్వమ్
ప్రశాన్తేన్ద్రియే నష్టసంజ్ఞే విచేష్టే
కఫోద్గారివక్త్రే భయోత్కమ్పిగాత్రే
ప్రయాణోన్ముఖే మయ్యనాథే తదానీం
ద్రుతం మే దయాలో భవాగ్రే గుహ త్వమ్
కృతాన్తస్య దూతేషు చణ్డేషు కోపాద్-
దహచ్ఛిన్ధి భిన్ధీతి మాం తర్జయత్సు
మయూరం సమారుహ్య మా భీరితి త్వం
పురః శక్తిపాణిర్మమాఽఽయాహి శీఘ్రమ్
ప్రణమ్యాసకృత్ పాదయోస్తే పతిత్వా
ప్రసాద్య ప్రభో ప్రార్థయేఽనేకవారమ్
న వక్తుం క్షమోఽహం తదానీం కృపాబ్ధే
న కార్యాఽన్తకాలే మనాగప్యుపేక్షా
సహస్రాణ్డభోక్తా త్వయా శూరనామా
హతస్తారకః సింహవక్త్రశ్చ దైత్యః
మమాన్తర్హృదిస్థం మనఃక్లేశమేకం
న హంసి ప్రభో కిం కరోమి క్వ యామి
అహం సర్వదా దుఃఖభారావసన్నో
భవాన్ దీనబన్ధుస్త్వదన్యం న యాచే
భవద్భక్తిరోధం సదా కౢప్తబాధం
మమాధిం ద్రుతం నాశయోమాసుత త్వమ్
అపస్మారకుష్ఠక్షయార్శఃప్రమేహ-
జ్వరోన్మాదగుల్మాదిరోగా మహాన్తః
పిశాచాశ్చ సర్వే భవత్పత్రభూతిం
విలోక్య క్షణాత్ తారకారే ద్రవన్తే
దృశి స్కన్దమూర్తిః శ్రుతౌ స్కన్దకీర్తిర్-
ముఖే మే పవిత్రం సదా తచ్చరిత్రమ్
కరే తస్య కృత్యం వపుస్తస్య భృత్యం
గుహే సన్తు లీనా మమాశేషభావాః
మునీనాముతాహో నృణాం భక్తిభాజామ్
అభీష్టప్రదాః సన్తి సర్వత్ర దేవాః
నృణామన్త్యజానామపి స్వార్థదానే
గుహాద్దేవమన్యం న జానే న జానే
కలత్రం సుతా బన్ధువర్గః పశుర్వా
నరో వాఽథ నారీ గృహే యే మదీయాః
యజన్తో నమన్తః స్తువన్తో భవన్తం
స్మరన్తశ్చ తే సన్తు సర్వే కుమార
మృగాః పక్షిణో దంశకా యే చ దుష్టాస్-
తథా వ్యాధయో బాధకా యే మదఙ్గే
భవచ్ఛక్తితీక్ష్ణాగ్రభిన్నాః సుదూరే
వినశ్యన్తు తే చూర్ణితక్రౌఞ్చశైల
జనిత్రీ పితా చ స్వపుత్రాపరాధం
సహేతే న కిం దేవసేనాధినాథ
అహం చాతిబాలో భవాఁల్లోకతాతః
క్షమస్వాపరాధం సమస్తం మహేశ
నమః కేకినే శక్తయే చాపి తుభ్యం
నమశ్ఛాగ తుభ్యం నమః కుక్కుటాయ
నమః సిన్ధవే సిన్ధుదేశాయ తుభ్యం
పునః స్కన్దమూర్తే నమస్తే నమోఽస్తు
జయాఽఽనన్దభూమన్ జయాపారధామన్
జయామోఘకీర్తే జయాఽఽనన్దమూర్తే
జయాఽఽనన్దసిన్ధో జయాశేషబన్ధో
జయ త్వం సదా ముక్తిదానేశసూనో
భుజఙ్గాఖ్యవృత్తేన కౢప్తం స్తవం యః
పఠేద్భక్తియుక్తో గుహం సమ్ప్రణమ్య
స పుత్రాన్ కలత్రం ధనం దీర్ఘమాయుర్-
లభేత్ స్కన్దసాయుజ్యమన్తే నరః సః
॥ఇతి శ్రీమత్పరమహంసపరివ్రాజకాచార్యస్య శ్రీ-గోవిన్ద-భగవత్పూజ్య-పాద-శిష్యస్య
శ్రీమచ్ఛఙ్కరభగవతః కృతౌ శ్రీ-సుబ్రహ్మణ్యభుజఙ్గం సమ్పూర్ణమ్॥
subrahmaṇyabhujaṅgam
sadā bālarūpā'pi vighnādrihantrī
mahādantivaktrā'pi pañcāsyamānyā
vidhīndrādimṛgyā gaṇeśābhidhā me
vidhattāṃ śriyaṃ kā'pi kalyāṇamūrtiḥ
na jānāmi śabdaṃ na jānāmi cārthaṃ
na jānāmi padyaṃ na jānāmi gadyam
cidekā ṣaḍāsyā hṛdi dyotate me
mukhānnissarante giraścāpi citram
mayūrādhirūḍhaṃ mahāvākyagūḍhaṃ
manohāridehaṃ mahaccittageham
mahīdevadevaṃ mahāvedabhāvaṃ
mahādevabālaṃ bhaje lokapālam
yadā sannidhānaṃ gatā mānavā me
bhavāmbhodhipāraṃ gatāste tadaiva
iti vyañjayan sindhutīre ya āste
tamīḍe pavitraṃ parāśaktiputram
yathābdhestaraṅgā layaṃ yānti tuṅgās-
tathaivāpadaḥ sannidhau sevatāṃ me
itīvormipaṅktīrnṛṇāṃ darśayantaṃ
sadā bhāvaye hṛtsaroje guhaṃ tam
girau mannivāse narā ye'dhirūḍhās-
tadā parvate rājate te'dhirūḍhāḥ
itīva bruvan gandhaśailādhirūḍhaḥ
sa devo mude me sadā ṣaṇmukho'stu
mahāmbhodhitīre mahāpāpacore
munīndrānukūle sugandhākhyaśaile
guhāyāṃ vasantaṃ svabhāsā lasantaṃ
janārtiṃ harantaṃ śrayāmo guhaṃ tam
lasatsvarṇagehe nṛṇāṃ kāmadohe
sumastomasañchannamāṇikyamañce
samudyatsahasrārkatulyaprakāśaṃ
sadā bhāvaye kārttikeyaṃ sureśam
raṇaddhaṃsake mañjule'tyantaśoṇe
manohārilāvaṇyapīyūṣapūrṇe
manaḥṣaṭpado me bhavakleśataptaḥ
sadā modatāṃ skanda te pādapadme
suvarṇābhadivyāmbarairbhāsamānāṃ
kvaṇatkiṅkiṇīmekhalāśobhamānām
lasaddhemapaṭṭena vidyotamānāṃ
kaṭiṃ bhāvaye skanda te dīpyamānām
pulindeśakanyāghanābhogatuṅga-
stanāliṅganāsaktakāśmīrarāgam
namasyāmyahaṃ tārakāre tavoraḥ
svabhaktāvane sarvadā sānurāgam
vidhau kḷptadaṇḍān svalīlādhṛtāṇḍān
nirastebhaśuṇḍān dviṣatkāladaṇḍān
hatendrāriṣaṇḍāñjagattrāṇaśauṇḍān
sadā te pracaṇḍān śraye bāhudaṇḍān
sadā śāradāḥ ṣaṇmṛgāṅkā yadi syuḥ
samudyanta eva sthitāścet samantāt
sadā pūrṇabimbāḥ kalaṅkaiśca hīnās-
tadā tvanmukhānāṃ bruve skanda sāmyam
sphuranmandahāsaiḥ sahaṃsāni cañcat
kaṭākṣāvalībhṛṅgasaṅghojjvalāni
sudhāsyandibimbādharāṇīśasūno
tavā''lokaye ṣaṇmukhāmbhoruhāṇi
viśāleṣu karṇāntadīrgheṣvajasraṃ
dayāsyandiṣu dvādaśasvīkṣaṇeṣu
mayīṣat kaṭākṣaḥ sakṛt pātitaśced-
bhavet te dayāśīla kā nāma hāniḥ
sutāṅgodbhavo me'si jīveti ṣaḍdhā
japan mantramīśo mudā jighrate yān
jagadbhārabhṛdbhyo jagannātha tebhyaḥ
kirīṭojjvalebhyo namo mastakebhyaḥ
sphuradratnakeyūrahārābhirāmaś-
calatkuṇḍalaśrīlasadgaṇḍabhāgaḥ
kaṭau pītavāsāḥ kare cāruśaktiḥ
purastānmamāstāṃ purārestanūjaḥ
ihā''yāhi vatseti hastān prasāryā-
''hvayatyādarācchaṅkare māturaṅkāt
samutpatya tātaṃ śrayantaṃ kumāraṃ
harāśliṣṭagātraṃ bhaje bālamūrtim
kumāreśasūno guha skanda senā-
pate śaktipāṇe mayūrādhirūḍha
pulindātmajākānta bhaktārtihārin
prabho tārakāre sadā rakṣa māṃ tvam
praśāntendriye naṣṭasaṃjñe viceṣṭe
kaphodgārivaktre bhayotkampigātre
prayāṇonmukhe mayyanāthe tadānīṃ
drutaṃ me dayālo bhavāgre guha tvam
kṛtāntasya dūteṣu caṇḍeṣu kopād-
dahacchindhi bhindhīti māṃ tarjayatsu
mayūraṃ samāruhya mā bhīriti tvaṃ
puraḥ śaktipāṇirmamā''yāhi śīghram
praṇamyāsakṛt pādayoste patitvā
prasādya prabho prārthaye'nekavāram
na vaktuṃ kṣamo'haṃ tadānīṃ kṛpābdhe
na kāryā'ntakāle manāgapyupekṣā
sahasrāṇḍabhoktā tvayā śūranāmā
hatastārakaḥ siṃhavaktraśca daityaḥ
mamāntarhṛdisthaṃ manaḥkleśamekaṃ
na haṃsi prabho kiṃ karomi kva yāmi
ahaṃ sarvadā duḥkhabhārāvasanno
bhavān dīnabandhustvadanyaṃ na yāce
bhavadbhaktirodhaṃ sadā kḷptabādhaṃ
mamādhiṃ drutaṃ nāśayomāsuta tvam
apasmārakuṣṭhakṣayārśaḥprameha-
jvaronmādagulmādirogā mahāntaḥ
piśācāśca sarve bhavatpatrabhūtiṃ
vilokya kṣaṇāt tārakāre dravante
dṛśi skandamūrtiḥ śrutau skandakīrtir-
mukhe me pavitraṃ sadā taccaritram
kare tasya kṛtyaṃ vapustasya bhṛtyaṃ
guhe santu līnā mamāśeṣabhāvāḥ
munīnāmutāho nṛṇāṃ bhaktibhājām
abhīṣṭapradāḥ santi sarvatra devāḥ
nṛṇāmantyajānāmapi svārthadāne
guhāddevamanyaṃ na jāne na jāne
kalatraṃ sutā bandhuvargaḥ paśurvā
naro vā'tha nārī gṛhe ye madīyāḥ
yajanto namantaḥ stuvanto bhavantaṃ
smarantaśca te santu sarve kumāra
mṛgāḥ pakṣiṇo daṃśakā ye ca duṣṭās-
tathā vyādhayo bādhakā ye madaṅge
bhavacchaktitīkṣṇāgrabhinnāḥ sudūre
vinaśyantu te cūrṇitakrauñcaśaila
janitrī pitā ca svaputrāparādhaṃ
sahete na kiṃ devasenādhinātha
ahaṃ cātibālo bhavā~llokatātaḥ
kṣamasvāparādhaṃ samastaṃ maheśa
namaḥ kekine śaktaye cāpi tubhyaṃ
namaśchāga tubhyaṃ namaḥ kukkuṭāya
namaḥ sindhave sindhudeśāya tubhyaṃ
punaḥ skandamūrte namaste namo'stu
jayā''nandabhūman jayāpāradhāman
jayāmoghakīrte jayā''nandamūrte
jayā''nandasindho jayāśeṣabandho
jaya tvaṃ sadā muktidāneśasūno
bhujaṅgākhyavṛttena kḷptaṃ stavaṃ yaḥ
paṭhedbhaktiyukto guhaṃ sampraṇamya
sa putrān kalatraṃ dhanaṃ dīrghamāyur-
labhet skandasāyujyamante naraḥ saḥ
||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya
śrīmacchaṅkarabhagavataḥ kṛtau śrī-subrahmaṇyabhujaṅgaṃ sampūrṇam||