कामाक्षी सुप्रभातम्
जगदवन विधौ त्वं जागरूका भवानि
तव तु जननि निद्रामात्मवत्कल्पयित्वा
प्रतिदिवसमहं त्वां बोधयामि प्रभाते
त्वयि कृतमपराधं सर्वमेतं क्षमस्व
यदि प्रभातं तव सुप्रभातं
तदा प्रभातं मम सुप्रभातम्
तस्मात् प्रभाते तव सुप्रभातं
वक्ष्यामि मातः कुरु सुप्रभातम्
गुरु-ध्यानम्
यस्याङ्घ्रिपद्म-मकरन्दनिषेवणात् त्वं
जिह्वां गताऽसि वरदे मम मन्दबद्धः
यस्याम्ब नित्यमनघे हृदये विभासि
तं चन्द्रशेखरगुरुं प्रणमामि नित्यम्
जये जयेन्द्रो गुरुणा ग्रहीतो
मठाधिपत्ये शशिशेखरेण
यथा गुरुः सर्वगुणोपपन्नो
जयत्यसौ मङ्गलमातनोतु
शुभं दिशतु नो देवी कामाक्षी सर्वमङ्गला
शुभं दिशतु नो देवी कामकोटी-मठेशः
शुभं दिशतु तच्छिष्य-सद्गुरुर्नो जयेन्द्रो
सर्वं मङ्गलमेवास्तु मङ्गलानि भवन्तु नः
सुप्रभातम्
कामाक्षि देव्यम्ब तवाऽऽर्द्रदृष्ट्या
मूकः स्वयं मूककविर्यथाऽसीत्
तथा कुरु त्वं परमेशजाये
त्वत्पादमूले प्रणतं दयार्द्रे
उत्तिष्ठोत्तिष्ठ वरदे उत्तिष्ठ जगदीश्वरि
उत्तिष्ठ जगदाधारे त्रैलोक्यं मङ्गलं कुरु
शृणोषि कच्चिद्-ध्वनिरुत्थितोऽयं
मृदङ्गभेरीपटहानकानाम्
वेदध्वनिं शिक्षितभूसुराणां
शृणोषि भद्रे कुरु सुप्रभातम्
शृणोषि भद्रे ननु शङ्खघोषं
वैतालिकानां मधुरं च गानम्
शृणोषि मातः पिककुक्कुटानां
ध्वनिं प्रभाते कुरु सुप्रभातम्
मातर्निरीक्ष्य वदनं भगवान् शशाङ्को
लज्जान्वितः स्वयमहो निलयं प्रविष्टः
द्रष्टुं त्वदीय वदनं भगवान् दिनेशो
ह्यायाति देवि सदनं कुरु सुप्रभातम्
पश्याम्ब केचिद्-धृतपूर्णकुम्भाः
केचिद्-दयार्द्रे धृतपुष्पमालाः
काचित् शुभाङ्ग्यो ननुवाद्यहस्ताः
तिष्ठन्ति तेषां कुरु सुप्रभातम्
भेरीमृदङ्गपणवानकवाद्यहस्ताः
स्तोतुं महेशदयिते स्तुतिपाठकास्त्वाम्
तिष्ठन्ति देवि समयं तव काङ्क्षमाणाः
ह्युत्तिष्ठ दिव्यशयनात् कुरु सुप्रभातम्
मातर्निरीक्ष्य वदनं भगवान् त्वदीयं
नैवोत्थितः शशिधिया शयितस्तवाङ्के
सम्बोधयाऽऽशु गिरिजे विमलं प्रभातं
जातं महेशदयिते कुरु सुप्रभातम्
अन्तश्चरन्त्यास्तव भूषणानां
झल्झल्ध्वनिं नूपुरकङ्कणानाम्
श्रुत्वा प्रभाते तव दर्शनार्थी
द्वारि स्थितोऽहं कुरु सुप्रभातम्
वाणी पुस्तकमम्बिके गिरिसुते पद्मानि पद्मासना
रम्भा त्वम्बरडम्बरं गिरिसुता गङ्गा च गङ्गाजलम्
काली तालयुगं मृदङ्गयुगलं बृन्दा च नन्दा तथा
नीला निर्मलदर्पण-धृतवती तासां प्रभातं शुभम्
उत्थाय देवि शयनाद्भगवान् पुरारिः
स्नातुं प्रयाति गिरिजे सुरलोकनद्याम्
नैको हि गन्तुमनघे रमते दयार्द्रे
ह्युत्तिष्ठ देवि शयनात् कुरु सुप्रभातम्
पश्याम्ब केचित्फलपुष्पहस्ताः
केचित् पुराणानि पठन्ति मातः
पठन्ति वेदान् बहवस्तवाऽऽरे
तेषां जनानां कुरु सुप्रभातम्
लावण्यशेवधिमवेक्ष्य चिरं त्वदीयं
कन्दर्पदर्पदलनोऽपि वशं गतस्ते
कामारि-चुम्बित-कपोलयुगं त्वदीयं
द्रष्टुं स्थिता वयमये कुरु सुप्रभातम्
गाङ्गेयतोयममवाह्य मुनीश्वरास्त्वां
गङ्गाजलैः स्नपयितुं बहवो घटांश्च
धृत्वा शिरःसु भवतीमभिकाङ्क्षमाणाः
द्वारि स्थिता हि वरदे कुरु सुप्रभातम्
मन्दार-कुन्द-कुसुमैरपि जातिपुष्पैः
मालाकृता विरचितानि मनोहराणि
माल्यानि दिव्यपदयोरपि दातुमम्ब
तिष्ठन्ति देवि मुनयः कुरु सुप्रभातम्
काञ्ची-कलाप-परिरम्भनितम्बबिम्बं
काश्मीर-चन्दन-विलेपित-कण्ठदेशम्
कामेश-चुम्बित-कपोलमुदारनासां
द्रष्टुं स्थिता वयमये कुरु सुप्रभातम्
मन्दस्मितं विमलचारुविशालनेत्रं
कण्ठस्थलं कमलकोमलगर्भगौरम्
चक्राङ्कितं च युगलं पदयोर्मृगाक्षि
द्रष्टुं स्थिता वयमये कुरु सुप्रभातम्
मन्दस्मितं त्रिपुरनाशकरं पुरारेः
कामेश्वरप्रणयकोपहरं स्मितं ते
मन्दस्मितं विपुलहासमवेक्षितुं ते
मातः स्थिता वयमये कुरु सुप्रभातम्
माता शिशूनां परिरक्षणार्थं
न चैव निद्रावशमेति लोके
माता त्रयाणां जगतां गतिस्त्वं
सदा विनिद्रा कुरु सुप्रभातम्
मातर्मुरारिकमलासनवन्दिताङ्घ्र्याः
हृद्यानि दिव्यमधुराणि मनोहराणि
श्रोतुं तवाम्ब वचनानि शुभप्रदानि
द्वारि स्थिता वयमये कुरु सुप्रभातम्
दिगम्बरो ब्रह्मकपालपाणिः
विकीर्णकेशः फणिवेष्टिताङ्गः
तथाऽपि मातस्तव देविसङ्गात्
महेश्वरोऽभूत् कुरु सुप्रभातम्
अयि तु जननि दत्तस्तन्यपानेन देवि
द्रविडशिशुरभूद्वै ज्ञानसम्पन्नमूर्तिः
द्रविडतनयभुक्तक्षीरशेषं भवानि
वितरसि यदि मातः सुप्रभातं भवेन्मे
जननि तव कुमारः स्तन्यपानप्रभावात्
शिशुरपि तव भर्तुः कर्णमूले भवानि
प्रणवपदविशेषं बोधयामास देवि
यदि मयि च कृपा ते सुप्रभातं भवेन्मे
त्वं विश्वनाथस्य विशालनेत्रा
हालास्यनाथस्य नु मीननेत्रा
एकाम्रनाथस्य नु कामनेत्रा
कामेशजाये कुरु सुप्रभातम्
श्रीचन्द्रशेखरगुरुर्भगवान् शरण्ये
त्वत्पादभक्तिभरितः फलपुष्पपाणिः
एकाम्रनाथदयिते तव दर्शनार्थी
तिष्ठत्ययं यतिवरो मम सुप्रभातम्
एकाम्रनाथदयिते ननु कामपीठे
सम्पूजिताऽसि वरदे गुरुशङ्करेण
श्रीशङ्करादिगुरुवर्य-समर्चिताङ्घ्रिं
द्रष्टुं स्थिता वयमये कुरु सुप्रभातम्
दुरितशमनदक्षौ मृत्युसन्तासदक्षौ
चरणमुपगतानां मुक्तिदौ ज्ञानदौ तौ
अभयवरदहस्तौ द्रष्टुमम्ब स्थितोऽहं
त्रिपुरदलनजाये सुप्रभातं ममाऽऽर्ये
मातस्त्वदीयचरणं हरिपद्मजाद्यैः
वन्द्यं रथाङ्ग-सरसीरुह-शङ्खचिह्नम्
द्रष्टुं च योगिजनमानसराजहंसं
द्वारि स्थितोऽस्मि वरदे कुरु सुप्रभातम्
पश्यन्तु केचिद्वदनं त्वदीयं
स्तुवन्तु कल्याणगुणांस्तवान्ये
नमन्तु पादाब्जयुगं त्वदीयाः
द्वारि स्थितानां कुरु सुप्रभातम्
केचित् सुमेरोः शिखरेऽतितुङ्गे
केचिन्मणिद्वीपवरे विशाले
पश्यन्तु केचित् त्वमृताब्धिमध्ये
पश्याम्यहं त्वामिह सुप्रभातम्
शम्भोर्वामाङ्कसंस्थां शशिनिभवदनां नीलपद्मायताक्षीं
श्यामाङ्गां चारुहासां निबिडतरकुचां पक्वबिम्बाधरोष्ठीम्
कामाक्षीं कामदात्रीं कुटिलकचभरां भूषणैर्भूषिताङ्गीं
पश्यामः सुप्रभाते प्रणतजनिमतामद्य नः सुप्रभातम्
कामप्रदाकल्पतरुर्विभासि
नान्या गतिर्मे ननु चातकोऽहम्
वर्षस्यमोघः कनकाम्बुधाराः
काश्चित्तु धारा मयि कल्पयाऽऽशु
त्रिलोचनप्रियां वन्दे वन्दे त्रिपुरसुन्दरीम्
त्रिलोकनायिकां वन्दे सुप्रभातं ममाम्बिके
कामाक्षि देव्यम्ब तवाऽऽर्द्रदृष्ट्या
कृतं मयेदं खलु सुप्रभातम्
सद्यः फलं मे सुखमम्ब लब्धं
तथा च मे दुःखदशा गता हि
ये वा प्रभाते पुरतस्तवाऽऽर्ये
पठन्ति भक्त्या ननु सुप्रभातम्
शृण्वन्ति ये वा त्वयि बद्धचित्ताः
तेषां प्रभातं कुरु सुप्रभातम्
॥इति~श्री-लक्ष्मीकान्त-शर्मा-विरचितं श्री-कामाक्षीसुप्रभातं सम्पूर्णम्॥
కామాక్షీ సుప్రభాతమ్
జగదవన విధౌ త్వం జాగరూకా భవాని
తవ తు జనని నిద్రామాత్మవత్కల్పయిత్వా
ప్రతిదివసమహం త్వాం బోధయామి ప్రభాతే
త్వయి కృతమపరాధం సర్వమేతం క్షమస్వ
యది ప్రభాతం తవ సుప్రభాతం
తదా ప్రభాతం మమ సుప్రభాతమ్
తస్మాత్ ప్రభాతే తవ సుప్రభాతం
వక్ష్యామి మాతః కురు సుప్రభాతమ్
గురు-ధ్యానమ్
యస్యాఙ్ఘ్రిపద్మ-మకరన్దనిషేవణాత్ త్వం
జిహ్వాం గతాఽసి వరదే మమ మన్దబద్ధః
యస్యామ్బ నిత్యమనఘే హృదయే విభాసి
తం చన్ద్రశేఖరగురుం ప్రణమామి నిత్యమ్
జయే జయేన్ద్రో గురుణా గ్రహీతో
మఠాధిపత్యే శశిశేఖరేణ
యథా గురుః సర్వగుణోపపన్నో
జయత్యసౌ మఙ్గలమాతనోతు
శుభం దిశతు నో దేవీ కామాక్షీ సర్వమఙ్గలా
శుభం దిశతు నో దేవీ కామకోటీ-మఠేశః
శుభం దిశతు తచ్ఛిష్య-సద్గురుర్నో జయేన్ద్రో
సర్వం మఙ్గలమేవాస్తు మఙ్గలాని భవన్తు నః
సుప్రభాతమ్
కామాక్షి దేవ్యమ్బ తవాఽఽర్ద్రదృష్ట్యా
మూకః స్వయం మూకకవిర్యథాఽసీత్
తథా కురు త్వం పరమేశజాయే
త్వత్పాదమూలే ప్రణతం దయార్ద్రే
ఉత్తిష్ఠోత్తిష్ఠ వరదే ఉత్తిష్ఠ జగదీశ్వరి
ఉత్తిష్ఠ జగదాధారే త్రైలోక్యం మఙ్గలం కురు
శృణోషి కచ్చిద్-ధ్వనిరుత్థితోఽయం
మృదఙ్గభేరీపటహానకానామ్
వేదధ్వనిం శిక్షితభూసురాణాం
శృణోషి భద్రే కురు సుప్రభాతమ్
శృణోషి భద్రే నను శఙ్ఖఘోషం
వైతాలికానాం మధురం చ గానమ్
శృణోషి మాతః పికకుక్కుటానాం
ధ్వనిం ప్రభాతే కురు సుప్రభాతమ్
మాతర్నిరీక్ష్య వదనం భగవాన్ శశాఙ్కో
లజ్జాన్వితః స్వయమహో నిలయం ప్రవిష్టః
ద్రష్టుం త్వదీయ వదనం భగవాన్ దినేశో
హ్యాయాతి దేవి సదనం కురు సుప్రభాతమ్
పశ్యామ్బ కేచిద్-ధృతపూర్ణకుమ్భాః
కేచిద్-దయార్ద్రే ధృతపుష్పమాలాః
కాచిత్ శుభాఙ్గ్యో ననువాద్యహస్తాః
తిష్ఠన్తి తేషాం కురు సుప్రభాతమ్
భేరీమృదఙ్గపణవానకవాద్యహస్తాః
స్తోతుం మహేశదయితే స్తుతిపాఠకాస్త్వామ్
తిష్ఠన్తి దేవి సమయం తవ కాఙ్క్షమాణాః
హ్యుత్తిష్ఠ దివ్యశయనాత్ కురు సుప్రభాతమ్
మాతర్నిరీక్ష్య వదనం భగవాన్ త్వదీయం
నైవోత్థితః శశిధియా శయితస్తవాఙ్కే
సమ్బోధయాఽఽశు గిరిజే విమలం ప్రభాతం
జాతం మహేశదయితే కురు సుప్రభాతమ్
అన్తశ్చరన్త్యాస్తవ భూషణానాం
ఝల్ఝల్ధ్వనిం నూపురకఙ్కణానామ్
శ్రుత్వా ప్రభాతే తవ దర్శనార్థీ
ద్వారి స్థితోఽహం కురు సుప్రభాతమ్
వాణీ పుస్తకమమ్బికే గిరిసుతే పద్మాని పద్మాసనా
రమ్భా త్వమ్బరడమ్బరం గిరిసుతా గఙ్గా చ గఙ్గాజలమ్
కాలీ తాలయుగం మృదఙ్గయుగలం బృన్దా చ నన్దా తథా
నీలా నిర్మలదర్పణ-ధృతవతీ తాసాం ప్రభాతం శుభమ్
ఉత్థాయ దేవి శయనాద్భగవాన్ పురారిః
స్నాతుం ప్రయాతి గిరిజే సురలోకనద్యామ్
నైకో హి గన్తుమనఘే రమతే దయార్ద్రే
హ్యుత్తిష్ఠ దేవి శయనాత్ కురు సుప్రభాతమ్
పశ్యామ్బ కేచిత్ఫలపుష్పహస్తాః
కేచిత్ పురాణాని పఠన్తి మాతః
పఠన్తి వేదాన్ బహవస్తవాఽఽరే
తేషాం జనానాం కురు సుప్రభాతమ్
లావణ్యశేవధిమవేక్ష్య చిరం త్వదీయం
కన్దర్పదర్పదలనోఽపి వశం గతస్తే
కామారి-చుమ్బిత-కపోలయుగం త్వదీయం
ద్రష్టుం స్థితా వయమయే కురు సుప్రభాతమ్
గాఙ్గేయతోయమమవాహ్య మునీశ్వరాస్త్వాం
గఙ్గాజలైః స్నపయితుం బహవో ఘటాంశ్చ
ధృత్వా శిరఃసు భవతీమభికాఙ్క్షమాణాః
ద్వారి స్థితా హి వరదే కురు సుప్రభాతమ్
మన్దార-కున్ద-కుసుమైరపి జాతిపుష్పైః
మాలాకృతా విరచితాని మనోహరాణి
మాల్యాని దివ్యపదయోరపి దాతుమమ్బ
తిష్ఠన్తి దేవి మునయః కురు సుప్రభాతమ్
కాఞ్చీ-కలాప-పరిరమ్భనితమ్బబిమ్బం
కాశ్మీర-చన్దన-విలేపిత-కణ్ఠదేశమ్
కామేశ-చుమ్బిత-కపోలముదారనాసాం
ద్రష్టుం స్థితా వయమయే కురు సుప్రభాతమ్
మన్దస్మితం విమలచారువిశాలనేత్రం
కణ్ఠస్థలం కమలకోమలగర్భగౌరమ్
చక్రాఙ్కితం చ యుగలం పదయోర్మృగాక్షి
ద్రష్టుం స్థితా వయమయే కురు సుప్రభాతమ్
మన్దస్మితం త్రిపురనాశకరం పురారేః
కామేశ్వరప్రణయకోపహరం స్మితం తే
మన్దస్మితం విపులహాసమవేక్షితుం తే
మాతః స్థితా వయమయే కురు సుప్రభాతమ్
మాతా శిశూనాం పరిరక్షణార్థం
న చైవ నిద్రావశమేతి లోకే
మాతా త్రయాణాం జగతాం గతిస్త్వం
సదా వినిద్రా కురు సుప్రభాతమ్
మాతర్మురారికమలాసనవన్దితాఙ్ఘ్ర్యాః
హృద్యాని దివ్యమధురాణి మనోహరాణి
శ్రోతుం తవామ్బ వచనాని శుభప్రదాని
ద్వారి స్థితా వయమయే కురు సుప్రభాతమ్
దిగమ్బరో బ్రహ్మకపాలపాణిః
వికీర్ణకేశః ఫణివేష్టితాఙ్గః
తథాఽపి మాతస్తవ దేవిసఙ్గాత్
మహేశ్వరోఽభూత్ కురు సుప్రభాతమ్
అయి తు జనని దత్తస్తన్యపానేన దేవి
ద్రవిడశిశురభూద్వై జ్ఞానసమ్పన్నమూర్తిః
ద్రవిడతనయభుక్తక్షీరశేషం భవాని
వితరసి యది మాతః సుప్రభాతం భవేన్మే
జనని తవ కుమారః స్తన్యపానప్రభావాత్
శిశురపి తవ భర్తుః కర్ణమూలే భవాని
ప్రణవపదవిశేషం బోధయామాస దేవి
యది మయి చ కృపా తే సుప్రభాతం భవేన్మే
త్వం విశ్వనాథస్య విశాలనేత్రా
హాలాస్యనాథస్య ను మీననేత్రా
ఏకామ్రనాథస్య ను కామనేత్రా
కామేశజాయే కురు సుప్రభాతమ్
శ్రీచన్ద్రశేఖరగురుర్భగవాన్ శరణ్యే
త్వత్పాదభక్తిభరితః ఫలపుష్పపాణిః
ఏకామ్రనాథదయితే తవ దర్శనార్థీ
తిష్ఠత్యయం యతివరో మమ సుప్రభాతమ్
ఏకామ్రనాథదయితే నను కామపీఠే
సమ్పూజితాఽసి వరదే గురుశఙ్కరేణ
శ్రీశఙ్కరాదిగురువర్య-సమర్చితాఙ్ఘ్రిం
ద్రష్టుం స్థితా వయమయే కురు సుప్రభాతమ్
దురితశమనదక్షౌ మృత్యుసన్తాసదక్షౌ
చరణముపగతానాం ముక్తిదౌ జ్ఞానదౌ తౌ
అభయవరదహస్తౌ ద్రష్టుమమ్బ స్థితోఽహం
త్రిపురదలనజాయే సుప్రభాతం మమాఽఽర్యే
మాతస్త్వదీయచరణం హరిపద్మజాద్యైః
వన్ద్యం రథాఙ్గ-సరసీరుహ-శఙ్ఖచిహ్నమ్
ద్రష్టుం చ యోగిజనమానసరాజహంసం
ద్వారి స్థితోఽస్మి వరదే కురు సుప్రభాతమ్
పశ్యన్తు కేచిద్వదనం త్వదీయం
స్తువన్తు కల్యాణగుణాంస్తవాన్యే
నమన్తు పాదాబ్జయుగం త్వదీయాః
ద్వారి స్థితానాం కురు సుప్రభాతమ్
కేచిత్ సుమేరోః శిఖరేఽతితుఙ్గే
కేచిన్మణిద్వీపవరే విశాలే
పశ్యన్తు కేచిత్ త్వమృతాబ్ధిమధ్యే
పశ్యామ్యహం త్వామిహ సుప్రభాతమ్
శమ్భోర్వామాఙ్కసంస్థాం శశినిభవదనాం నీలపద్మాయతాక్షీం
శ్యామాఙ్గాం చారుహాసాం నిబిడతరకుచాం పక్వబిమ్బాధరోష్ఠీమ్
కామాక్షీం కామదాత్రీం కుటిలకచభరాం భూషణైర్భూషితాఙ్గీం
పశ్యామః సుప్రభాతే ప్రణతజనిమతామద్య నః సుప్రభాతమ్
కామప్రదాకల్పతరుర్విభాసి
నాన్యా గతిర్మే నను చాతకోఽహమ్
వర్షస్యమోఘః కనకామ్బుధారాః
కాశ్చిత్తు ధారా మయి కల్పయాఽఽశు
త్రిలోచనప్రియాం వన్దే వన్దే త్రిపురసున్దరీమ్
త్రిలోకనాయికాం వన్దే సుప్రభాతం మమామ్బికే
కామాక్షి దేవ్యమ్బ తవాఽఽర్ద్రదృష్ట్యా
కృతం మయేదం ఖలు సుప్రభాతమ్
సద్యః ఫలం మే సుఖమమ్బ లబ్ధం
తథా చ మే దుఃఖదశా గతా హి
యే వా ప్రభాతే పురతస్తవాఽఽర్యే
పఠన్తి భక్త్యా నను సుప్రభాతమ్
శృణ్వన్తి యే వా త్వయి బద్ధచిత్తాః
తేషాం ప్రభాతం కురు సుప్రభాతమ్
॥ఇతి~శ్రీ-లక్ష్మీకాన్త-శర్మా-విరచితం శ్రీ-కామాక్షీసుప్రభాతం సమ్పూర్ణమ్॥
kāmākṣī suprabhātam
jagadavana vidhau tvaṃ jāgarūkā bhavāni
tava tu janani nidrāmātmavatkalpayitvā
pratidivasamahaṃ tvāṃ bodhayāmi prabhāte
tvayi kṛtamaparādhaṃ sarvametaṃ kṣamasva
yadi prabhātaṃ tava suprabhātaṃ
tadā prabhātaṃ mama suprabhātam
tasmāt prabhāte tava suprabhātaṃ
vakṣyāmi mātaḥ kuru suprabhātam
guru-dhyānam
yasyāṅghripadma-makarandaniṣevaṇāt tvaṃ
jihvāṃ gatā'si varade mama mandabaddhaḥ
yasyāmba nityamanaghe hṛdaye vibhāsi
taṃ candraśekharaguruṃ praṇamāmi nityam
jaye jayendro guruṇā grahīto
maṭhādhipatye śaśiśekhareṇa
yathā guruḥ sarvaguṇopapanno
jayatyasau maṅgalamātanotu
śubhaṃ diśatu no devī kāmākṣī sarvamaṅgalā
śubhaṃ diśatu no devī kāmakoṭī-maṭheśaḥ
śubhaṃ diśatu tacchiṣya-sadgururno jayendro
sarvaṃ maṅgalamevāstu maṅgalāni bhavantu naḥ
suprabhātam
kāmākṣi devyamba tavā''rdradṛṣṭyā
mūkaḥ svayaṃ mūkakaviryathā'sīt
tathā kuru tvaṃ parameśajāye
tvatpādamūle praṇataṃ dayārdre
uttiṣṭhottiṣṭha varade uttiṣṭha jagadīśvari
uttiṣṭha jagadādhāre trailokyaṃ maṅgalaṃ kuru
śṛṇoṣi kaccid-dhvanirutthito'yaṃ
mṛdaṅgabherīpaṭahānakānām
vedadhvaniṃ śikṣitabhūsurāṇāṃ
śṛṇoṣi bhadre kuru suprabhātam
śṛṇoṣi bhadre nanu śaṅkhaghoṣaṃ
vaitālikānāṃ madhuraṃ ca gānam
śṛṇoṣi mātaḥ pikakukkuṭānāṃ
dhvaniṃ prabhāte kuru suprabhātam
mātarnirīkṣya vadanaṃ bhagavān śaśāṅko
lajjānvitaḥ svayamaho nilayaṃ praviṣṭaḥ
draṣṭuṃ tvadīya vadanaṃ bhagavān dineśo
hyāyāti devi sadanaṃ kuru suprabhātam
paśyāmba kecid-dhṛtapūrṇakumbhāḥ
kecid-dayārdre dhṛtapuṣpamālāḥ
kācit śubhāṅgyo nanuvādyahastāḥ
tiṣṭhanti teṣāṃ kuru suprabhātam
bherīmṛdaṅgapaṇavānakavādyahastāḥ
stotuṃ maheśadayite stutipāṭhakāstvām
tiṣṭhanti devi samayaṃ tava kāṅkṣamāṇāḥ
hyuttiṣṭha divyaśayanāt kuru suprabhātam
mātarnirīkṣya vadanaṃ bhagavān tvadīyaṃ
naivotthitaḥ śaśidhiyā śayitastavāṅke
sambodhayā''śu girije vimalaṃ prabhātaṃ
jātaṃ maheśadayite kuru suprabhātam
antaścarantyāstava bhūṣaṇānāṃ
jhaljhaldhvaniṃ nūpurakaṅkaṇānām
śrutvā prabhāte tava darśanārthī
dvāri sthito'haṃ kuru suprabhātam
vāṇī pustakamambike girisute padmāni padmāsanā
rambhā tvambaraḍambaraṃ girisutā gaṅgā ca gaṅgājalam
kālī tālayugaṃ mṛdaṅgayugalaṃ bṛndā ca nandā tathā
nīlā nirmaladarpaṇa-dhṛtavatī tāsāṃ prabhātaṃ śubham
utthāya devi śayanādbhagavān purāriḥ
snātuṃ prayāti girije suralokanadyām
naiko hi gantumanaghe ramate dayārdre
hyuttiṣṭha devi śayanāt kuru suprabhātam
paśyāmba kecitphalapuṣpahastāḥ
kecit purāṇāni paṭhanti mātaḥ
paṭhanti vedān bahavastavā''re
teṣāṃ janānāṃ kuru suprabhātam
lāvaṇyaśevadhimavekṣya ciraṃ tvadīyaṃ
kandarpadarpadalano'pi vaśaṃ gataste
kāmāri-cumbita-kapolayugaṃ tvadīyaṃ
draṣṭuṃ sthitā vayamaye kuru suprabhātam
gāṅgeyatoyamamavāhya munīśvarāstvāṃ
gaṅgājalaiḥ snapayituṃ bahavo ghaṭāṃśca
dhṛtvā śiraḥsu bhavatīmabhikāṅkṣamāṇāḥ
dvāri sthitā hi varade kuru suprabhātam
mandāra-kunda-kusumairapi jātipuṣpaiḥ
mālākṛtā viracitāni manoharāṇi
mālyāni divyapadayorapi dātumamba
tiṣṭhanti devi munayaḥ kuru suprabhātam
kāñcī-kalāpa-parirambhanitambabimbaṃ
kāśmīra-candana-vilepita-kaṇṭhadeśam
kāmeśa-cumbita-kapolamudāranāsāṃ
draṣṭuṃ sthitā vayamaye kuru suprabhātam
mandasmitaṃ vimalacāruviśālanetraṃ
kaṇṭhasthalaṃ kamalakomalagarbhagauram
cakrāṅkitaṃ ca yugalaṃ padayormṛgākṣi
draṣṭuṃ sthitā vayamaye kuru suprabhātam
mandasmitaṃ tripuranāśakaraṃ purāreḥ
kāmeśvarapraṇayakopaharaṃ smitaṃ te
mandasmitaṃ vipulahāsamavekṣituṃ te
mātaḥ sthitā vayamaye kuru suprabhātam
mātā śiśūnāṃ parirakṣaṇārthaṃ
na caiva nidrāvaśameti loke
mātā trayāṇāṃ jagatāṃ gatistvaṃ
sadā vinidrā kuru suprabhātam
mātarmurārikamalāsanavanditāṅghryāḥ
hṛdyāni divyamadhurāṇi manoharāṇi
śrotuṃ tavāmba vacanāni śubhapradāni
dvāri sthitā vayamaye kuru suprabhātam
digambaro brahmakapālapāṇiḥ
vikīrṇakeśaḥ phaṇiveṣṭitāṅgaḥ
tathā'pi mātastava devisaṅgāt
maheśvaro'bhūt kuru suprabhātam
ayi tu janani dattastanyapānena devi
draviḍaśiśurabhūdvai jñānasampannamūrtiḥ
draviḍatanayabhuktakṣīraśeṣaṃ bhavāni
vitarasi yadi mātaḥ suprabhātaṃ bhavenme
janani tava kumāraḥ stanyapānaprabhāvāt
śiśurapi tava bhartuḥ karṇamūle bhavāni
praṇavapadaviśeṣaṃ bodhayāmāsa devi
yadi mayi ca kṛpā te suprabhātaṃ bhavenme
tvaṃ viśvanāthasya viśālanetrā
hālāsyanāthasya nu mīnanetrā
ekāmranāthasya nu kāmanetrā
kāmeśajāye kuru suprabhātam
śrīcandraśekharagururbhagavān śaraṇye
tvatpādabhaktibharitaḥ phalapuṣpapāṇiḥ
ekāmranāthadayite tava darśanārthī
tiṣṭhatyayaṃ yativaro mama suprabhātam
ekāmranāthadayite nanu kāmapīṭhe
sampūjitā'si varade guruśaṅkareṇa
śrīśaṅkarādiguruvarya-samarcitāṅghriṃ
draṣṭuṃ sthitā vayamaye kuru suprabhātam
duritaśamanadakṣau mṛtyusantāsadakṣau
caraṇamupagatānāṃ muktidau jñānadau tau
abhayavaradahastau draṣṭumamba sthito'haṃ
tripuradalanajāye suprabhātaṃ mamā''rye
mātastvadīyacaraṇaṃ haripadmajādyaiḥ
vandyaṃ rathāṅga-sarasīruha-śaṅkhacihnam
draṣṭuṃ ca yogijanamānasarājahaṃsaṃ
dvāri sthito'smi varade kuru suprabhātam
paśyantu kecidvadanaṃ tvadīyaṃ
stuvantu kalyāṇaguṇāṃstavānye
namantu pādābjayugaṃ tvadīyāḥ
dvāri sthitānāṃ kuru suprabhātam
kecit sumeroḥ śikhare'tituṅge
kecinmaṇidvīpavare viśāle
paśyantu kecit tvamṛtābdhimadhye
paśyāmyahaṃ tvāmiha suprabhātam
śambhorvāmāṅkasaṃsthāṃ śaśinibhavadanāṃ nīlapadmāyatākṣīṃ
śyāmāṅgāṃ cāruhāsāṃ nibiḍatarakucāṃ pakvabimbādharoṣṭhīm
kāmākṣīṃ kāmadātrīṃ kuṭilakacabharāṃ bhūṣaṇairbhūṣitāṅgīṃ
paśyāmaḥ suprabhāte praṇatajanimatāmadya naḥ suprabhātam
kāmapradākalpatarurvibhāsi
nānyā gatirme nanu cātako'ham
varṣasyamoghaḥ kanakāmbudhārāḥ
kāścittu dhārā mayi kalpayā''śu
trilocanapriyāṃ vande vande tripurasundarīm
trilokanāyikāṃ vande suprabhātaṃ mamāmbike
kāmākṣi devyamba tavā''rdradṛṣṭyā
kṛtaṃ mayedaṃ khalu suprabhātam
sadyaḥ phalaṃ me sukhamamba labdhaṃ
tathā ca me duḥkhadaśā gatā hi
ye vā prabhāte puratastavā''rye
paṭhanti bhaktyā nanu suprabhātam
śṛṇvanti ye vā tvayi baddhacittāḥ
teṣāṃ prabhātaṃ kuru suprabhātam
||iti~śrī-lakṣmīkānta-śarmā-viracitaṃ śrī-kāmākṣīsuprabhātaṃ sampūrṇam||