मूकसारः
sec:start
१-आर्याशतके
[कारण-पर-चिद्रूपा काञ्चीपुर-सीम्नि कामपीठगता
काचन विहरति करुणा काश्मीर-स्तबक-कोमलाङ्गलता]
१-१
कुण्डलि कुमारि कुटिले चण्डि चराचर-सवित्रि चामुण्डे
गुणिनि गुहारिणि गुह्ये गुरुमूर्ते त्वां नमामि कामाक्षि
१-४६
अभिदाकृतिर्भिदाकृतिरचिदाकृतिरपि चिदाकृतिर्मातः
अनहन्ता त्वमहन्ता भ्रमयसि कामाक्षि शाश्वती विश्वम्
१-४७
काम-परिपन्थि-कामिनि कामेश्वरि काम-पीठ-मध्य-गते
काम-दुघा भव कमले काम-कले कामकोटि कामाक्षि
१-४८
लीये पुर-हर-जाये माये तव तरुण-पल्लव-च्छाये
चरणे चन्द्रा-भरणे काञ्ची-शरणे नतार्ति-संहरणे
१-७२
स्मर-मथन-वरण-लोला मन्मथ-हेला-विलास-मणि-शाला
कनक-रुचि-चौर्य-शीला त्वमम्ब बाला कराब्ज-धृत-माला
१-७३
अन्तरपि बहिरपि त्वं जन्तुततेरन्तकान्तकृदहन्ते
चिन्तितसन्तानवतां सन्ततमपि तन्तनीषि महिमानम्
१-९८
[जय जय जगदम्ब शिवे
जय जय कामाक्षि जय जयाद्रिसुते
जय जय महेशदयिते
जय जय चिद्गगनकौमुदीधारे]
१-१००
२-पादारविन्दशतके
जपालक्ष्मीशोणो जनितपरमज्ञाननलिनी-
विकासव्यासङ्गो विफलितजगज्जाड्यगरिमा
मनःपूर्वाद्रिं मे तिलकयतु कामाक्षि तरसा
तमस्काण्डद्रोही तव चरणपाथोजरमणः
२-१७
गिरां दूरौ चोरौ जडिमतिमिराणां कृतजगत्
परित्राणौ शोणौ मुनिहृदयलीलैकनिपुणौ
नखैः स्मेरौ सारौ निगमवचसां खण्डितभव-
ग्रहोन्मादौ पादौ तव जननि कामाक्षि कलये
२-४४
भवाम्भोधौ नौकां जडिमविपिने पावकशिखाम्
अमर्त्येन्द्रादीनामधिमुकुटमुत्तंसकलिकाम्
जगत्तापे ज्योत्स्नामकृतकवचःपञ्जरपुटे
शुकस्त्रीं कामाक्ष्या मनसि कलये पादयुगलीम्
२-४९
कवित्वश्रीमिश्रीकरणनिपुणौ रक्षणचणौ
विपन्नानां श्रीमन्नलिनमसृणौ शोणकिरणौ
मुनीन्द्राणामन्तःकरणशरणौ मन्दसरणौ
मनोज्ञौ कामाक्ष्या दुरितहरणौ नौमि चरणौ
२-७३
परस्मात्सर्वस्मादपि च परयोर्मुक्तिकरयोः
नखश्रीभिर्ज्योत्स्नाकलिततुलयोस्ताम्रतलयोः
निलीये कामाक्ष्या निगमनुतयोर्नाकिनतयोः
निरस्तप्रोन्मीलन्नलिनमदयोरेव पदयोः
२-७४
रणन्मञ्जीराभ्यां ललितगमनाभ्यां सुकृतिनाम्
मनोवास्तव्याभ्यां मथिततिमिराभ्यां नखरुचा
निधेयाभ्यां पत्या निजशिरसि कामाक्षि सततम्
नमस्ते पादाभ्यां नलिनमृदुलाभ्यां गिरिसुते
२-९६
यशः सूते मातर्मधुरकवितां पक्ष्मलयते
श्रियं दत्ते चित्ते कमपि परिपाकं प्रथयते
सतां पाशग्रन्थिं शिथिलयति किं किं न कुरुते
प्रपन्ने कामाक्ष्याः प्रणतिपरिपाटी चरणयोः
२-९९
मनीषां माहेन्द्रीं ककुभमिव ते कामपि दशाम्
प्रधत्ते कामाक्ष्याश्चरणतरुणादित्यकिरणः
यदीये सम्पर्के धृतरसमरन्दा कवयताम्
परीपाकं धत्ते परिमलवती सूक्तिनलिनी
२-१००
३-स्तुतिशतके
[श्यामा काचन चन्द्रिका त्रिभुवने पुण्यात्मनामानने
सीमाशून्यकवित्ववर्षजननी या काऽपि कादम्बिनी
मारारातिमनोविमोहनविधौ काचित्तमःकन्दली
कामाक्ष्याः करुणाकटाक्षलहरी कामाय मे कल्पताम्]
३-६
राकाचन्द्रसमानकान्तिवदना नाकाधिराजस्तुता
मूकानामपि कुर्वती सुरधुनीनीकाशवाग्वैभवम्
श्रीकाञ्चीनगरीविहाररसिका शोकापहन्त्री सताम्
एका पुण्यपरम्परा पशुपतेराकारिणी राजते
३-११
जाता शीतल-शैलतः सुकृतिनां दृश्या परं देहिनां
लोकानां क्षण-मात्र-संस्मरणतः सन्ताप-विच्छेदिनी
आश्चर्यं बहु खेलनं वितनुते नैश्चल्य-माबिभ्रती
कम्पायास्तट-सीम्नि काऽपि तटिनी कारुण्य-पाथोमयी
३-१२
वरीवर्तु स्थेमा त्वयि मम गिरां देवि मनसो
नरीनर्तु प्रौढा वदनकमले वाक्यलहरी
चरीचर्तु प्रज्ञाजननि जडिमानः परजने
सरीसर्तु स्वैरं जननि मयि कामाक्षि करुणा
३-४८
परा विद्या हृद्याश्रितमदनविद्या मरकत-
प्रभानीला लीलापरवशितशूलायुधमनाः
तमःपूरं दूरं चरणनतपौरन्दरपुरी-
मृगाक्षी कामाक्षी कमलतरलाक्षी नयतु मे
३-५६
यस्या वाटी हृदयकमलं कौसुमी योगभाजाम्
यस्याः पीठी सततशिशिरा शीकरैर्माकरन्दैः
यस्याः पेटी श्रुतिपरिचलन्मौलिरत्नस्य काञ्ची
सा मे सोमाभरणमहिषी साधयेत्काङ्क्षितानि
३-७७
परामृतझरीप्लुता जयति नित्यमन्तश्चरी
भुवामपि बहिश्चरी परमसंविदेकात्मिका
महद्भिरपरोक्षिता सततमेव काञ्चीपुरे
ममान्वहमहम्मतिर्मनसि भातु माहेश्वरी
३-९०
चराचरजगन्मयीं सकलहृन्मयीं चिन्मयीम्
गुणत्रयमयीं जगत्त्रयमयीं त्रिधामामयीम्
परापरमयीं सदा दशदिशां निशाहर्मयीम्
परां सततसन्मयीं मनसि चिन्मयीं शीलये
३-९७
भुवनजननि भूषाभूतचन्द्रे नमस्ते
कलुषशमनि कम्पातीरगेहे नमस्ते
निखिलनिगमवेद्ये नित्यरूपे नमस्ते
परशिवमयि पाशच्छेदहस्ते नमस्ते
३-९९
समरविजयकोटी साधकानन्दधाटी
मृदुगुणपरिपेटी मुख्यकादम्बवाटी
मुनिनुतपरिपाटी मोहिताजाण्डकोटी
परमशिववधूटी पातु मां कामकोटी
३-१०१
४-कटाक्षशतके
मातर्जयन्ति ममता-ग्रह-मोक्षणानि
माहेन्द्र-नील-रुचि-शिक्षण-दक्षिणानि
कामाक्षि कल्पित-जगत्त्रय-रक्षणानि
त्वद्वीक्षणानि वरदान-विचक्षणानि
४-२
नीलोऽपि रागमधिकं जनयन्पुरारेः
लोलोऽपि भक्तिमधिकां दृढयन्नराणाम्
वक्रोऽपि देवि नमतां समतां वितन्वन्
कामाक्षि नृत्यतु मयि त्वदपाङ्गपातः
४-१६
अत्यन्त-शीतलमतन्द्रयतु क्षणार्धम्
अस्तोक-विभ्रममनङ्गविलासकन्दम्
अल्प-स्मितादृतमपारकृपाप्रवाहम्
अक्षि-प्ररोहमचिरान्मयि कामकोटि
४-२४
मातः क्षणं स्नपय मां तव वीक्षितेन
मन्दाक्षितेन सुजनैरपरोक्षितेन
कामाक्षि कर्म-तिमिरोत्कर-भास्करेण
श्रेयस्करेण मधुप-द्युति-तस्करेण
४-४५
कैवल्यदाय करुणारसकिङ्कराय
कामाक्षि कन्दलितविभ्रमशङ्कराय
आलोकनाय तव भक्तशिवङ्कराय
मातर्नमोऽस्तु परतन्त्रितशङ्कराय
४-४७
संसारघर्मपरितापजुषां नराणाम्
कामाक्षि शीतलतराणि तवेक्षितानि
चन्द्रातपन्ति घनचन्दनकर्दमन्ति
मुक्तागुणन्ति हिमवारिनिषेचनन्ति
४-७७
बाणेन पुष्पधनुषः परिकल्प्यमान-
त्राणेन भक्तमनसां करुणाकरेण
कोणेन कोमलदृशस्तव कामकोटि
शोणेन शोषय शिवे मम शोकसिन्धुम्
४-९४
अज्ञातभक्तिरसमप्रसरद्विवेकम्
अत्यन्तगर्वमनधीतसमस्तशास्त्रम्
अप्राप्तसत्यमसमीपगतं च मुक्तेः
कामाक्षि मामवतु ते करुणाकटाक्षः
४-१००
५-मन्दस्मितशतके
कर्पूरैरमृतैर्जगज्जननि ते कामाक्षि चन्द्रातपैः
मुक्ताहारगुणैर्मृणालवलयैर्मुग्धस्मितश्रीरियम्
श्रीकाञ्चीपुरनायिके समतया संस्तूयते सज्जनैः
तत्तादृङ्मम तापशान्तिविधये किं देवि मन्दायते
५-२४
चेतः शीतलयन्तु नः पशुपतेरानन्दजीवातवो
नम्राणां नयनाध्वसीमसु शरच्चन्द्रातपोपक्रमाः
संसाराख्यसरोरुहाकरखलीकारे तुषारोत्कराः
कामाक्षि स्मरकीर्तिबीजनिकरास्त्वन्मन्दहासाङ्कुराः
५-३१
सूतिः श्वेतिमकन्दलस्य वसतिः शृङ्गारसारश्रियः
पूर्तिः सूक्तिझरीरसस्य लहरी कारुण्यपाथोनिधेः
वाटी काचन कौसुमी मधुरिमस्वाराज्यलक्ष्म्यास्तव
श्रीकामाक्षि ममास्तु मङ्गलकरी हासप्रभाचातुरी
५-८५
इन्धाने भववीतिहोत्रनिवहे कर्मौघचण्डानिल-
प्रौढिम्ना बहुलीकृते निपतितं सन्तापचिन्ताकुलम्
मातर्मां परिषिञ्च किञ्चिदमलैः पीयूषवर्षैरिव
श्रीकामाक्षि तव स्मितद्युतिकणैः शैशिर्यलीलाकरैः
५-९४
क्रीडालोलकृपासरोरुहमुखीसौधाङ्गणेभ्यः कवि-
श्रेणीवाक्परिपाटिकामृतझरीसूतीगृहेभ्यः शिवे
निर्वाणाङ्कुरसार्वभौमपदवीसिंहासनेभ्यस्तव
श्रीकामाक्षि मनोज्ञमन्दहसितज्योतिष्कणेभ्यो नमः
५-१००
आर्यामेव विभावयन् मनसि यः पादारविन्दं पुरः
पश्यन्नारभते स्तुतिं स नियतं लब्ध्वा कटाक्ष-च्छविम्
कामाक्ष्या मृदुल-स्मितांशु-लहरी-ज्योत्स्ना-वयस्यान्विताम्
आरोहत्यपवर्ग-सौध-वलभीमानन्द-वीची-मयीम्
५-१०१
॥इति श्री-काञ्चीजगद्गुरु-श्री-चन्द्रशेखरेन्द्रसरस्वती-श्रीचरणैः श्री-मूकमहाकविप्रणीतायाः मूकपञ्चशत्याः सङ्ग्रहीतः मूकसारः सम्पूर्णः॥
[sec:start]
మూకసారః
sec:start
౧-ఆర్యాశతకే
[కారణ-పర-చిద్రూపా కాఞ్చీపుర-సీమ్ని కామపీఠగతా
కాచన విహరతి కరుణా కాశ్మీర-స్తబక-కోమలాఙ్గలతా]
౧-౧
కుణ్డలి కుమారి కుటిలే చణ్డి చరాచర-సవిత్రి చాముణ్డే
గుణిని గుహారిణి గుహ్యే గురుమూర్తే త్వాం నమామి కామాక్షి
౧-౪౬
అభిదాకృతిర్భిదాకృతిరచిదాకృతిరపి చిదాకృతిర్మాతః
అనహన్తా త్వమహన్తా భ్రమయసి కామాక్షి శాశ్వతీ విశ్వమ్
౧-౪౭
కామ-పరిపన్థి-కామిని కామేశ్వరి కామ-పీఠ-మధ్య-గతే
కామ-దుఘా భవ కమలే కామ-కలే కామకోటి కామాక్షి
౧-౪౮
లీయే పుర-హర-జాయే మాయే తవ తరుణ-పల్లవ-చ్ఛాయే
చరణే చన్ద్రా-భరణే కాఞ్చీ-శరణే నతార్తి-సంహరణే
౧-౭౨
స్మర-మథన-వరణ-లోలా మన్మథ-హేలా-విలాస-మణి-శాలా
కనక-రుచి-చౌర్య-శీలా త్వమమ్బ బాలా కరాబ్జ-ధృత-మాలా
౧-౭౩
అన్తరపి బహిరపి త్వం జన్తుతతేరన్తకాన్తకృదహన్తే
చిన్తితసన్తానవతాం సన్తతమపి తన్తనీషి మహిమానమ్
౧-౯౮
[జయ జయ జగదమ్బ శివే
జయ జయ కామాక్షి జయ జయాద్రిసుతే
జయ జయ మహేశదయితే
జయ జయ చిద్గగనకౌముదీధారే]
౧-౧౦౦
౨-పాదారవిన్దశతకే
జపాలక్ష్మీశోణో జనితపరమజ్ఞాననలినీ-
వికాసవ్యాసఙ్గో విఫలితజగజ్జాడ్యగరిమా
మనఃపూర్వాద్రిం మే తిలకయతు కామాక్షి తరసా
తమస్కాణ్డద్రోహీ తవ చరణపాథోజరమణః
౨-౧౭
గిరాం దూరౌ చోరౌ జడిమతిమిరాణాం కృతజగత్
పరిత్రాణౌ శోణౌ మునిహృదయలీలైకనిపుణౌ
నఖైః స్మేరౌ సారౌ నిగమవచసాం ఖణ్డితభవ-
గ్రహోన్మాదౌ పాదౌ తవ జనని కామాక్షి కలయే
౨-౪౪
భవామ్భోధౌ నౌకాం జడిమవిపినే పావకశిఖామ్
అమర్త్యేన్ద్రాదీనామధిముకుటముత్తంసకలికామ్
జగత్తాపే జ్యోత్స్నామకృతకవచఃపఞ్జరపుటే
శుకస్త్రీం కామాక్ష్యా మనసి కలయే పాదయుగలీమ్
౨-౪౯
కవిత్వశ్రీమిశ్రీకరణనిపుణౌ రక్షణచణౌ
విపన్నానాం శ్రీమన్నలినమసృణౌ శోణకిరణౌ
మునీన్ద్రాణామన్తఃకరణశరణౌ మన్దసరణౌ
మనోజ్ఞౌ కామాక్ష్యా దురితహరణౌ నౌమి చరణౌ
౨-౭౩
పరస్మాత్సర్వస్మాదపి చ పరయోర్ముక్తికరయోః
నఖశ్రీభిర్జ్యోత్స్నాకలితతులయోస్తామ్రతలయోః
నిలీయే కామాక్ష్యా నిగమనుతయోర్నాకినతయోః
నిరస్తప్రోన్మీలన్నలినమదయోరేవ పదయోః
౨-౭౪
రణన్మఞ్జీరాభ్యాం లలితగమనాభ్యాం సుకృతినామ్
మనోవాస్తవ్యాభ్యాం మథితతిమిరాభ్యాం నఖరుచా
నిధేయాభ్యాం పత్యా నిజశిరసి కామాక్షి సతతమ్
నమస్తే పాదాభ్యాం నలినమృదులాభ్యాం గిరిసుతే
౨-౯౬
యశః సూతే మాతర్మధురకవితాం పక్ష్మలయతే
శ్రియం దత్తే చిత్తే కమపి పరిపాకం ప్రథయతే
సతాం పాశగ్రన్థిం శిథిలయతి కిం కిం న కురుతే
ప్రపన్నే కామాక్ష్యాః ప్రణతిపరిపాటీ చరణయోః
౨-౯౯
మనీషాం మాహేన్ద్రీం కకుభమివ తే కామపి దశామ్
ప్రధత్తే కామాక్ష్యాశ్చరణతరుణాదిత్యకిరణః
యదీయే సమ్పర్కే ధృతరసమరన్దా కవయతామ్
పరీపాకం ధత్తే పరిమలవతీ సూక్తినలినీ
౨-౧౦౦
౩-స్తుతిశతకే
[శ్యామా కాచన చన్ద్రికా త్రిభువనే పుణ్యాత్మనామాననే
సీమాశూన్యకవిత్వవర్షజననీ యా కాఽపి కాదమ్బినీ
మారారాతిమనోవిమోహనవిధౌ కాచిత్తమఃకన్దలీ
కామాక్ష్యాః కరుణాకటాక్షలహరీ కామాయ మే కల్పతామ్]
౩-౬
రాకాచన్ద్రసమానకాన్తివదనా నాకాధిరాజస్తుతా
మూకానామపి కుర్వతీ సురధునీనీకాశవాగ్వైభవమ్
శ్రీకాఞ్చీనగరీవిహారరసికా శోకాపహన్త్రీ సతామ్
ఏకా పుణ్యపరమ్పరా పశుపతేరాకారిణీ రాజతే
౩-౧౧
జాతా శీతల-శైలతః సుకృతినాం దృశ్యా పరం దేహినాం
లోకానాం క్షణ-మాత్ర-సంస్మరణతః సన్తాప-విచ్ఛేదినీ
ఆశ్చర్యం బహు ఖేలనం వితనుతే నైశ్చల్య-మాబిభ్రతీ
కమ్పాయాస్తట-సీమ్ని కాఽపి తటినీ కారుణ్య-పాథోమయీ
౩-౧౨
వరీవర్తు స్థేమా త్వయి మమ గిరాం దేవి మనసో
నరీనర్తు ప్రౌఢా వదనకమలే వాక్యలహరీ
చరీచర్తు ప్రజ్ఞాజనని జడిమానః పరజనే
సరీసర్తు స్వైరం జనని మయి కామాక్షి కరుణా
౩-౪౮
పరా విద్యా హృద్యాశ్రితమదనవిద్యా మరకత-
ప్రభానీలా లీలాపరవశితశూలాయుధమనాః
తమఃపూరం దూరం చరణనతపౌరన్దరపురీ-
మృగాక్షీ కామాక్షీ కమలతరలాక్షీ నయతు మే
౩-౫౬
యస్యా వాటీ హృదయకమలం కౌసుమీ యోగభాజామ్
యస్యాః పీఠీ సతతశిశిరా శీకరైర్మాకరన్దైః
యస్యాః పేటీ శ్రుతిపరిచలన్మౌలిరత్నస్య కాఞ్చీ
సా మే సోమాభరణమహిషీ సాధయేత్కాఙ్క్షితాని
౩-౭౭
పరామృతఝరీప్లుతా జయతి నిత్యమన్తశ్చరీ
భువామపి బహిశ్చరీ పరమసంవిదేకాత్మికా
మహద్భిరపరోక్షితా సతతమేవ కాఞ్చీపురే
మమాన్వహమహమ్మతిర్మనసి భాతు మాహేశ్వరీ
౩-౯౦
చరాచరజగన్మయీం సకలహృన్మయీం చిన్మయీమ్
గుణత్రయమయీం జగత్త్రయమయీం త్రిధామామయీమ్
పరాపరమయీం సదా దశదిశాం నిశాహర్మయీమ్
పరాం సతతసన్మయీం మనసి చిన్మయీం శీలయే
౩-౯౭
భువనజనని భూషాభూతచన్ద్రే నమస్తే
కలుషశమని కమ్పాతీరగేహే నమస్తే
నిఖిలనిగమవేద్యే నిత్యరూపే నమస్తే
పరశివమయి పాశచ్ఛేదహస్తే నమస్తే
౩-౯౯
సమరవిజయకోటీ సాధకానన్దధాటీ
మృదుగుణపరిపేటీ ముఖ్యకాదమ్బవాటీ
మునినుతపరిపాటీ మోహితాజాణ్డకోటీ
పరమశివవధూటీ పాతు మాం కామకోటీ
౩-౧౦౧
౪-కటాక్షశతకే
మాతర్జయన్తి మమతా-గ్రహ-మోక్షణాని
మాహేన్ద్ర-నీల-రుచి-శిక్షణ-దక్షిణాని
కామాక్షి కల్పిత-జగత్త్రయ-రక్షణాని
త్వద్వీక్షణాని వరదాన-విచక్షణాని
౪-౨
నీలోఽపి రాగమధికం జనయన్పురారేః
లోలోఽపి భక్తిమధికాం దృఢయన్నరాణామ్
వక్రోఽపి దేవి నమతాం సమతాం వితన్వన్
కామాక్షి నృత్యతు మయి త్వదపాఙ్గపాతః
౪-౧౬
అత్యన్త-శీతలమతన్ద్రయతు క్షణార్ధమ్
అస్తోక-విభ్రమమనఙ్గవిలాసకన్దమ్
అల్ప-స్మితాదృతమపారకృపాప్రవాహమ్
అక్షి-ప్రరోహమచిరాన్మయి కామకోటి
౪-౨౪
మాతః క్షణం స్నపయ మాం తవ వీక్షితేన
మన్దాక్షితేన సుజనైరపరోక్షితేన
కామాక్షి కర్మ-తిమిరోత్కర-భాస్కరేణ
శ్రేయస్కరేణ మధుప-ద్యుతి-తస్కరేణ
౪-౪౫
కైవల్యదాయ కరుణారసకిఙ్కరాయ
కామాక్షి కన్దలితవిభ్రమశఙ్కరాయ
ఆలోకనాయ తవ భక్తశివఙ్కరాయ
మాతర్నమోఽస్తు పరతన్త్రితశఙ్కరాయ
౪-౪౭
సంసారఘర్మపరితాపజుషాం నరాణామ్
కామాక్షి శీతలతరాణి తవేక్షితాని
చన్ద్రాతపన్తి ఘనచన్దనకర్దమన్తి
ముక్తాగుణన్తి హిమవారినిషేచనన్తి
౪-౭౭
బాణేన పుష్పధనుషః పరికల్ప్యమాన-
త్రాణేన భక్తమనసాం కరుణాకరేణ
కోణేన కోమలదృశస్తవ కామకోటి
శోణేన శోషయ శివే మమ శోకసిన్ధుమ్
౪-౯౪
అజ్ఞాతభక్తిరసమప్రసరద్వివేకమ్
అత్యన్తగర్వమనధీతసమస్తశాస్త్రమ్
అప్రాప్తసత్యమసమీపగతం చ ముక్తేః
కామాక్షి మామవతు తే కరుణాకటాక్షః
౪-౧౦౦
౫-మన్దస్మితశతకే
కర్పూరైరమృతైర్జగజ్జనని తే కామాక్షి చన్ద్రాతపైః
ముక్తాహారగుణైర్మృణాలవలయైర్ముగ్ధస్మితశ్రీరియమ్
శ్రీకాఞ్చీపురనాయికే సమతయా సంస్తూయతే సజ్జనైః
తత్తాదృఙ్మమ తాపశాన్తివిధయే కిం దేవి మన్దాయతే
౫-౨౪
చేతః శీతలయన్తు నః పశుపతేరానన్దజీవాతవో
నమ్రాణాం నయనాధ్వసీమసు శరచ్చన్ద్రాతపోపక్రమాః
సంసారాఖ్యసరోరుహాకరఖలీకారే తుషారోత్కరాః
కామాక్షి స్మరకీర్తిబీజనికరాస్త్వన్మన్దహాసాఙ్కురాః
౫-౩౧
సూతిః శ్వేతిమకన్దలస్య వసతిః శృఙ్గారసారశ్రియః
పూర్తిః సూక్తిఝరీరసస్య లహరీ కారుణ్యపాథోనిధేః
వాటీ కాచన కౌసుమీ మధురిమస్వారాజ్యలక్ష్మ్యాస్తవ
శ్రీకామాక్షి మమాస్తు మఙ్గలకరీ హాసప్రభాచాతురీ
౫-౮౫
ఇన్ధానే భవవీతిహోత్రనివహే కర్మౌఘచణ్డానిల-
ప్రౌఢిమ్నా బహులీకృతే నిపతితం సన్తాపచిన్తాకులమ్
మాతర్మాం పరిషిఞ్చ కిఞ్చిదమలైః పీయూషవర్షైరివ
శ్రీకామాక్షి తవ స్మితద్యుతికణైః శైశిర్యలీలాకరైః
౫-౯౪
క్రీడాలోలకృపాసరోరుహముఖీసౌధాఙ్గణేభ్యః కవి-
శ్రేణీవాక్పరిపాటికామృతఝరీసూతీగృహేభ్యః శివే
నిర్వాణాఙ్కురసార్వభౌమపదవీసింహాసనేభ్యస్తవ
శ్రీకామాక్షి మనోజ్ఞమన్దహసితజ్యోతిష్కణేభ్యో నమః
౫-౧౦౦
ఆర్యామేవ విభావయన్ మనసి యః పాదారవిన్దం పురః
పశ్యన్నారభతే స్తుతిం స నియతం లబ్ధ్వా కటాక్ష-చ్ఛవిమ్
కామాక్ష్యా మృదుల-స్మితాంశు-లహరీ-జ్యోత్స్నా-వయస్యాన్వితామ్
ఆరోహత్యపవర్గ-సౌధ-వలభీమానన్ద-వీచీ-మయీమ్
౫-౧౦౧
॥ఇతి శ్రీ-కాఞ్చీజగద్గురు-శ్రీ-చన్ద్రశేఖరేన్ద్రసరస్వతీ-శ్రీచరణైః శ్రీ-మూకమహాకవిప్రణీతాయాః మూకపఞ్చశత్యాః సఙ్గ్రహీతః మూకసారః సమ్పూర్ణః॥
[sec:start]
mūkasāraḥ
sec:start
1-āryāśatake
[kāraṇa-para-cidrūpā kāñcīpura-sīmni kāmapīṭhagatā
kācana viharati karuṇā kāśmīra-stabaka-komalāṅgalatā]
1-1
kuṇḍali kumāri kuṭile caṇḍi carācara-savitri cāmuṇḍe
guṇini guhāriṇi guhye gurumūrte tvāṃ namāmi kāmākṣi
1-46
abhidākṛtirbhidākṛtiracidākṛtirapi cidākṛtirmātaḥ
anahantā tvamahantā bhramayasi kāmākṣi śāśvatī viśvam
1-47
kāma-paripanthi-kāmini kāmeśvari kāma-pīṭha-madhya-gate
kāma-dughā bhava kamale kāma-kale kāmakoṭi kāmākṣi
1-48
līye pura-hara-jāye māye tava taruṇa-pallava-cchāye
caraṇe candrā-bharaṇe kāñcī-śaraṇe natārti-saṃharaṇe
1-72
smara-mathana-varaṇa-lolā manmatha-helā-vilāsa-maṇi-śālā
kanaka-ruci-caurya-śīlā tvamamba bālā karābja-dhṛta-mālā
1-73
antarapi bahirapi tvaṃ jantutaterantakāntakṛdahante
cintitasantānavatāṃ santatamapi tantanīṣi mahimānam
1-98
[jaya jaya jagadamba śive
jaya jaya kāmākṣi jaya jayādrisute
jaya jaya maheśadayite
jaya jaya cidgaganakaumudīdhāre]
1-100
2-pādāravindaśatake
japālakṣmīśoṇo janitaparamajñānanalinī-
vikāsavyāsaṅgo viphalitajagajjāḍyagarimā
manaḥpūrvādriṃ me tilakayatu kāmākṣi tarasā
tamaskāṇḍadrohī tava caraṇapāthojaramaṇaḥ
2-17
girāṃ dūrau corau jaḍimatimirāṇāṃ kṛtajagat
paritrāṇau śoṇau munihṛdayalīlaikanipuṇau
nakhaiḥ smerau sārau nigamavacasāṃ khaṇḍitabhava-
grahonmādau pādau tava janani kāmākṣi kalaye
2-44
bhavāmbhodhau naukāṃ jaḍimavipine pāvakaśikhām
amartyendrādīnāmadhimukuṭamuttaṃsakalikām
jagattāpe jyotsnāmakṛtakavacaḥpañjarapuṭe
śukastrīṃ kāmākṣyā manasi kalaye pādayugalīm
2-49
kavitvaśrīmiśrīkaraṇanipuṇau rakṣaṇacaṇau
vipannānāṃ śrīmannalinamasṛṇau śoṇakiraṇau
munīndrāṇāmantaḥkaraṇaśaraṇau mandasaraṇau
manojñau kāmākṣyā duritaharaṇau naumi caraṇau
2-73
parasmātsarvasmādapi ca parayormuktikarayoḥ
nakhaśrībhirjyotsnākalitatulayostāmratalayoḥ
nilīye kāmākṣyā nigamanutayornākinatayoḥ
nirastapronmīlannalinamadayoreva padayoḥ
2-74
raṇanmañjīrābhyāṃ lalitagamanābhyāṃ sukṛtinām
manovāstavyābhyāṃ mathitatimirābhyāṃ nakharucā
nidheyābhyāṃ patyā nijaśirasi kāmākṣi satatam
namaste pādābhyāṃ nalinamṛdulābhyāṃ girisute
2-96
yaśaḥ sūte mātarmadhurakavitāṃ pakṣmalayate
śriyaṃ datte citte kamapi paripākaṃ prathayate
satāṃ pāśagranthiṃ śithilayati kiṃ kiṃ na kurute
prapanne kāmākṣyāḥ praṇatiparipāṭī caraṇayoḥ
2-99
manīṣāṃ māhendrīṃ kakubhamiva te kāmapi daśām
pradhatte kāmākṣyāścaraṇataruṇādityakiraṇaḥ
yadīye samparke dhṛtarasamarandā kavayatām
parīpākaṃ dhatte parimalavatī sūktinalinī
2-100
3-stutiśatake
[śyāmā kācana candrikā tribhuvane puṇyātmanāmānane
sīmāśūnyakavitvavarṣajananī yā kā'pi kādambinī
mārārātimanovimohanavidhau kācittamaḥkandalī
kāmākṣyāḥ karuṇākaṭākṣalaharī kāmāya me kalpatām]
3-6
rākācandrasamānakāntivadanā nākādhirājastutā
mūkānāmapi kurvatī suradhunīnīkāśavāgvaibhavam
śrīkāñcīnagarīvihārarasikā śokāpahantrī satām
ekā puṇyaparamparā paśupaterākāriṇī rājate
3-11
jātā śītala-śailataḥ sukṛtināṃ dṛśyā paraṃ dehināṃ
lokānāṃ kṣaṇa-mātra-saṃsmaraṇataḥ santāpa-vicchedinī
āścaryaṃ bahu khelanaṃ vitanute naiścalya-mābibhratī
kampāyāstaṭa-sīmni kā'pi taṭinī kāruṇya-pāthomayī
3-12
varīvartu sthemā tvayi mama girāṃ devi manaso
narīnartu prauḍhā vadanakamale vākyalaharī
carīcartu prajñājanani jaḍimānaḥ parajane
sarīsartu svairaṃ janani mayi kāmākṣi karuṇā
3-48
parā vidyā hṛdyāśritamadanavidyā marakata-
prabhānīlā līlāparavaśitaśūlāyudhamanāḥ
tamaḥpūraṃ dūraṃ caraṇanatapaurandarapurī-
mṛgākṣī kāmākṣī kamalataralākṣī nayatu me
3-56
yasyā vāṭī hṛdayakamalaṃ kausumī yogabhājām
yasyāḥ pīṭhī satataśiśirā śīkarairmākarandaiḥ
yasyāḥ peṭī śrutiparicalanmauliratnasya kāñcī
sā me somābharaṇamahiṣī sādhayetkāṅkṣitāni
3-77
parāmṛtajharīplutā jayati nityamantaścarī
bhuvāmapi bahiścarī paramasaṃvidekātmikā
mahadbhiraparokṣitā satatameva kāñcīpure
mamānvahamahammatirmanasi bhātu māheśvarī
3-90
carācarajaganmayīṃ sakalahṛnmayīṃ cinmayīm
guṇatrayamayīṃ jagattrayamayīṃ tridhāmāmayīm
parāparamayīṃ sadā daśadiśāṃ niśāharmayīm
parāṃ satatasanmayīṃ manasi cinmayīṃ śīlaye
3-97
bhuvanajanani bhūṣābhūtacandre namaste
kaluṣaśamani kampātīragehe namaste
nikhilanigamavedye nityarūpe namaste
paraśivamayi pāśacchedahaste namaste
3-99
samaravijayakoṭī sādhakānandadhāṭī
mṛduguṇaparipeṭī mukhyakādambavāṭī
muninutaparipāṭī mohitājāṇḍakoṭī
paramaśivavadhūṭī pātu māṃ kāmakoṭī
3-101
4-kaṭākṣaśatake
mātarjayanti mamatā-graha-mokṣaṇāni
māhendra-nīla-ruci-śikṣaṇa-dakṣiṇāni
kāmākṣi kalpita-jagattraya-rakṣaṇāni
tvadvīkṣaṇāni varadāna-vicakṣaṇāni
4-2
nīlo'pi rāgamadhikaṃ janayanpurāreḥ
lolo'pi bhaktimadhikāṃ dṛḍhayannarāṇām
vakro'pi devi namatāṃ samatāṃ vitanvan
kāmākṣi nṛtyatu mayi tvadapāṅgapātaḥ
4-16
atyanta-śītalamatandrayatu kṣaṇārdham
astoka-vibhramamanaṅgavilāsakandam
alpa-smitādṛtamapārakṛpāpravāham
akṣi-prarohamacirānmayi kāmakoṭi
4-24
mātaḥ kṣaṇaṃ snapaya māṃ tava vīkṣitena
mandākṣitena sujanairaparokṣitena
kāmākṣi karma-timirotkara-bhāskareṇa
śreyaskareṇa madhupa-dyuti-taskareṇa
4-45
kaivalyadāya karuṇārasakiṅkarāya
kāmākṣi kandalitavibhramaśaṅkarāya
ālokanāya tava bhaktaśivaṅkarāya
mātarnamo'stu paratantritaśaṅkarāya
4-47
saṃsāragharmaparitāpajuṣāṃ narāṇām
kāmākṣi śītalatarāṇi tavekṣitāni
candrātapanti ghanacandanakardamanti
muktāguṇanti himavāriniṣecananti
4-77
bāṇena puṣpadhanuṣaḥ parikalpyamāna-
trāṇena bhaktamanasāṃ karuṇākareṇa
koṇena komaladṛśastava kāmakoṭi
śoṇena śoṣaya śive mama śokasindhum
4-94
ajñātabhaktirasamaprasaradvivekam
atyantagarvamanadhītasamastaśāstram
aprāptasatyamasamīpagataṃ ca mukteḥ
kāmākṣi māmavatu te karuṇākaṭākṣaḥ
4-100
5-mandasmitaśatake
karpūrairamṛtairjagajjanani te kāmākṣi candrātapaiḥ
muktāhāraguṇairmṛṇālavalayairmugdhasmitaśrīriyam
śrīkāñcīpuranāyike samatayā saṃstūyate sajjanaiḥ
tattādṛṅmama tāpaśāntividhaye kiṃ devi mandāyate
5-24
cetaḥ śītalayantu naḥ paśupaterānandajīvātavo
namrāṇāṃ nayanādhvasīmasu śaraccandrātapopakramāḥ
saṃsārākhyasaroruhākarakhalīkāre tuṣārotkarāḥ
kāmākṣi smarakīrtibījanikarāstvanmandahāsāṅkurāḥ
5-31
sūtiḥ śvetimakandalasya vasatiḥ śṛṅgārasāraśriyaḥ
pūrtiḥ sūktijharīrasasya laharī kāruṇyapāthonidheḥ
vāṭī kācana kausumī madhurimasvārājyalakṣmyāstava
śrīkāmākṣi mamāstu maṅgalakarī hāsaprabhācāturī
5-85
indhāne bhavavītihotranivahe karmaughacaṇḍānila-
prauḍhimnā bahulīkṛte nipatitaṃ santāpacintākulam
mātarmāṃ pariṣiñca kiñcidamalaiḥ pīyūṣavarṣairiva
śrīkāmākṣi tava smitadyutikaṇaiḥ śaiśiryalīlākaraiḥ
5-94
krīḍālolakṛpāsaroruhamukhīsaudhāṅgaṇebhyaḥ kavi-
śreṇīvākparipāṭikāmṛtajharīsūtīgṛhebhyaḥ śive
nirvāṇāṅkurasārvabhaumapadavīsiṃhāsanebhyastava
śrīkāmākṣi manojñamandahasitajyotiṣkaṇebhyo namaḥ
5-100
āryāmeva vibhāvayan manasi yaḥ pādāravindaṃ puraḥ
paśyannārabhate stutiṃ sa niyataṃ labdhvā kaṭākṣa-cchavim
kāmākṣyā mṛdula-smitāṃśu-laharī-jyotsnā-vayasyānvitām
ārohatyapavarga-saudha-valabhīmānanda-vīcī-mayīm
5-101
||iti śrī-kāñcījagadguru-śrī-candraśekharendrasarasvatī-śrīcaraṇaiḥ śrī-mūkamahākavipraṇītāyāḥ mūkapañcaśatyāḥ saṅgrahītaḥ mūkasāraḥ sampūrṇaḥ||
[sec:start]