श्रीनारायणकवचम्
ॐ श्रीगणेशाय नमः ।
ॐ नमो नारायणाय ।
अङ्गन्यासः -
ॐ ॐ नमः पादयोः ।
ॐ नं नमः जानुनोः ।
ॐ मों नमः ऊर्वोः ।
ॐ नां नमः उदरे ।
ॐ रां नमः हृदि ।
ॐ यं नमः उरसि ।
ॐ णां नमः मुखे ।
ॐ यं नमः शिरसि ॥
करन्यासः -
ॐ ॐ नमः दक्षिणतर्जन्याम् ।
ॐ नं नमः दक्षिणमध्यमायाम् ।
ॐ मों नमः दक्षिणानामिकायाम् ।
ॐ भं नमः दक्षिणकनिष्ठिकायाम् ।
ॐ गं नमः वामकनिष्ठिकायाम् ।
ॐ वं नमः वामानामिकायाम् ।
ॐ तें नमः वाममध्यमायाम् ।
ॐ वां नमः वामतर्जन्याम् ।
ॐ सुं नमः दक्षिणांगुष्ठोर्ध्वपर्वणि ।
ॐ दें नमः दक्षिणांगुष्ठाय पर्वणि ।
ॐ वां नमः वामांगुष्ठोर्ध्वपर्वणि ।
ॐ यं नमः वामांगुष्ठाय पर्वणि ॥
विष्णुषडक्षरन्यासः -
ॐ ॐ नमः हृदये ।
ॐ विं नमः मूर्धनि ।
ॐ षं नमः भ्रुवोर्मध्ये ।
ॐ णं नमः शिखायाम् ।
ॐ वें नमः नेत्रयोः ।
ॐ नं नमः सर्वसन्धिषु ।
ॐ मः अस्त्राय फट् प्राच्याम् ।
ॐ मः अस्त्राय फट् आग्नेयाम् ।
ॐ मः अस्त्राय फट् दक्षिणस्याम् ।
ॐ मः अस्त्राय फट् नैरृत्ये ।
ॐ मः अस्त्राय फट् प्रतीच्याम् ।
ॐ मः अस्त्राय फट् वायव्ये ।
ॐ मः अस्त्राय फट् उदीच्याम् ।
ॐ मः अस्त्राय फट् ऐशान्याम् ।
ॐ मः अस्त्राय फट् ऊर्ध्वायाम् ।
ॐ मः अस्त्राय फट् अधरायाम् ॥
अथ श्रीनारायणकवचम् ।
राजोवाच ।
यया गुप्तः सहस्राक्षः सवाहान्रिपुसैनिकान् ।
क्रीडन्निव विनिर्जित्य त्रिलोक्या बुभुजे श्रियम् ॥ १॥
भगवंस्तन्ममाख्याहि वर्म नारायणात्मकम् ।
यथाऽऽततायिनः शत्रून् येन गुप्तोऽजयन्मृधे ॥ २॥
श्रीशुक उवाच ।
वृतः पुरोहितस्त्वाष्ट्रो महेन्द्रायानुपृच्छते ।
नारायणाख्यं वर्माह तदिहैकमनाः शृणु ॥ ३॥
विश्वरूप उवाच ।
धौताङ्घ्रिपाणिराचम्य सपवित्र उदङ्मुखः ।
कृतस्वाङ्गकरन्यासो मन्त्राभ्यां वाग्यतः शुचिः ॥ ४॥
नारायणमयं वर्म सन्नह्येद्भय आगते ।
पादयोर्जानुनोरूर्वोरुदरे हृद्यथोरसि ॥ ५॥
मुखे शिरस्यानुपूर्व्यादोङ्कारादीनि विन्यसेत् ।
ॐ नमो नारायणायेति विपर्ययमथापि वा ॥ ६॥
करन्यासं ततः कुर्याद्द्वादशाक्षरविद्यया ।
प्रणवादियकारान्तमङ्गुल्यङ्गुष्ठपर्वसु ॥ ७॥
न्यसेद्धृदय ओङ्कारं विकारमनु मूर्धनि ।
षकारं तु भ्रुवोर्मध्ये णकारं शिखया दिशेत् ॥ ८॥
वेकारं नेत्रयोर्युञ्ज्यान्नकारं सर्वसन्धिषु ।
मकारमस्त्रमुद्दिश्य मन्त्रमूर्तिर्भवेद्बुधः ॥ ९॥
सविसर्गं फडन्तं तत् सर्वदिक्षु विनिर्दिशेत् ।
ॐ विष्णवे नम इति ॥ १०॥
आत्मानं परमं ध्यायेद्ध्येयं षट्शक्तिभिर्युतम् ।
विद्यातेजस्तपोमूर्तिमिमं मन्त्रमुदाहरेत् ॥ ११॥
ॐ हरिर्विदध्यान्मम सर्वरक्षां
न्यस्ताङ्घ्रिपद्मः पतगेन्द्रपृष्ठे ।
दरारिचर्मासिगदेषुचाप-
पाशान्दधानोऽष्टगुणोऽष्टबाहुः ॥ १२॥
जलेषु मां रक्षतु मत्स्यमूर्ति-
र्यादोगणेभ्यो वरुणस्य पाशात् ।
स्थलेषु मायावटुवामनोऽव्यात्
त्रिविक्रमः खेऽवतु विश्वरूपः ॥ १३॥
दुर्गेष्वटव्याजिमुखादिषु प्रभुः
पायान्नृसिंहोऽसुरयूथपारिः ।
विमुञ्चतो यस्य महाट्टहासं
दिशो विनेदुर्न्यपतंश्च गर्भाः ॥ १४॥
रक्षत्वसौ माध्वनि यज्ञकल्पः
स्वदंष्ट्रयोन्नीतधरो वराहः ।
रामोऽद्रिकूटेष्वथ विप्रवासे
सलक्ष्मणोऽव्याद्भरताग्रजोऽस्मान् ॥ १५॥
मामुग्रधर्मादखिलात्प्रमादा-
न्नारायणः पातु नरश्च हासात् ।
दत्तस्त्वयोगादथ योगनाथः
पायाद्गुणेशः कपिलः कर्मबन्धात् ॥ १६॥
सनत्कुमारोऽवतु कामदेवा-
द्धयशीर्षा मां पथि देवहेलनात् ।
देवर्षिवर्यः पुरुषार्चनान्तरात्
कूर्मो हरिर्मां निरयादशेषात् ॥ १७॥
धन्वन्तरिर्भगवान्पात्वपथ्या-
द्द्वन्द्वाद्भयादृषभो निर्जितात्मा ।
यज्ञश्च लोकादवताञ्ज्जनान्ता-
द्बलो गणात्क्रोधवशादहीन्द्रः ॥ १८॥
द्वैपायनो भगवानप्रबोधा-
द्बुद्धस्तु पाखण्डगणप्रमादात् ।
कल्किः कलेः कालमलात्प्रपातु
धर्मावनायोरुकृतावतारः ॥ १९॥
मां केशवो गदया प्रातरव्या-
द्गोविन्द आसङ्गवमात्तवेणुः ।
नारायणः प्राह्ण उदात्तशक्ति-
र्मध्यन्दिने विष्णुररीन्द्रपाणिः ॥ २०॥
देवोऽपराह्ने मधुहोग्रधन्वा
सायं त्रिधामावतु माधवो माम् ।
दोषे हृषीकेश उतार्धरात्रे
निशीथ एकोऽवतु पद्मनाभः ॥ २१॥
श्रीवत्सधामापररात्र ईशः
प्रत्यूष ईशोऽसिधरो जनार्दनः ।
दामोदरोऽव्यादनुसन्ध्यं प्रभाते
विश्वेश्वरो भगवान् कालमूर्तिः ॥ २२॥
चक्रं युगान्तानलतिग्मनेमि
भ्रमत्समन्ताद्भगवत्प्रयुक्तम् ।
दन्दग्धि दन्दग्ध्यरिसैन्यमाशु
कक्षं यथा वातसखो हुताशः ॥ २३॥
गदेऽशनिस्पर्शनविस्फुलिङ्गे
निष्पिण्ढि निष्पिण्ढ्यजितप्रियासि ।
कूष्माण्डवैनायकयक्षरक्षो-
भूतग्रहांश्चूर्णय चूर्णयारीन् ॥ २४॥
त्वं यातुधानप्रमथप्रेतमातृ-
पिशाचविप्रग्रहघोरदृष्टीन् ।
दरेन्द्र विद्रावय कृष्णपूरितो
भीमस्वनोऽरेर्हृदयानि कम्पयन् ॥ २५॥
त्वं तिग्मधारासिवरारिसैन्य-
मीशप्रयुक्तो मम छिन्धि छिन्धि ।
चक्षूंषि चर्मञ्छतचन्द्र छादय
द्विषामघोनां हर पापचक्षुषाम् ॥ २६॥
यन्नो भयं ग्रहेभ्योऽभूत्केतुभ्यो नृभ्य एव च ।
सरीसृपेभ्यो दंष्ट्रिभ्यो भूतेभ्योंऽहोभ्य एव च ॥ २७॥
सर्वाण्येतानि भगवन्नामरूपास्त्रकीर्तनात् ।
प्रयान्तु सङ्क्षयं सद्यो ये नः श्रेयःप्रतीपकाः ॥ २८॥
गरुडो भगवान् स्तोत्रस्तोभश्छन्दोमयः प्रभुः ।
रक्षत्वशेषकृच्छ्रेभ्यो विष्वक्सेनः स्वनामभिः ॥ २९ ॥
सर्वापद्भ्यो हरेर्नामरूपयानायुधानि नः ।
बुद्धीन्द्रियमनःप्राणान्पान्तु पार्षदभूषणाः ॥ ३०॥
यथा हि भगवानेव वस्तुतः सदसच्च यत् ।
सत्येनानेन नः सर्वे यान्तु नाशमुपद्रवाः ॥ ३१॥
यथैकात्म्यानुभावानां विकल्परहितः स्वयम् ।
भूषणायुधलिङ्गाख्या धत्ते शक्तीः स्वमायया ॥ ३२॥
तेनैव सत्यमानेन सर्वज्ञो भगवान् हरिः ।
पातु सर्वैः स्वरूपैर्नः सदा सर्वत्र सर्वगः ॥ ३३॥
विदिक्षु दिक्षूर्ध्वमधः समन्ता-
दन्तर्बहिर्भगवान्नारसिंहः ।
प्रहापयँलोकभयं स्वनेन
स्वतेजसा ग्रस्तसमस्ततेजाः ॥ ३४॥
मघवन्निदमाख्यातं वर्म नारायणात्मकम् ।
विजेष्यस्यञ्जसा येन दंशितोऽसुरयूथपान् ॥ ३५॥
एतद्धारयमाणस्तु यं यं पश्यति चक्षुषा ।
पदा वा संस्पृशेत्सद्यः साध्वसात्स विमुच्यते ॥ ३६॥
न कुतश्चिद्भयं तस्य विद्यां धारयतो भवेत् ।
राजदस्युग्रहादिभ्यो व्याघ्रादिभ्यश्च कर्हिचित् ॥ ३७॥
इमां विद्यां पुरा कश्चित्कौशिको धारयन् द्विजः ।
योगधारणया स्वाङ्गं जहौ स मरुधन्वनि ॥ ३८॥
तस्योपरि विमानेन गन्धर्वपतिरेकदा ।
ययौ चित्ररथः स्त्रीभिर्वृतो यत्र द्विजक्षयः ॥ ३९ ॥
गगनान्न्यपतत्सद्यः सविमानो ह्यवाक्शिराः ।
स वालखिल्यवचनादस्थीन्यादाय विस्मितः ।
प्रास्य प्राचीसरस्वत्यां स्नात्वा धाम स्वमन्वगात् ॥ ४०॥
श्रीशुक उवाच ।
य इदं शृणुयात्काले यो धारयति चादृतः ।
तं नमस्यन्ति भूतानि मुच्यते सर्वतो भयात् ॥ ४१॥
एतां विद्यामधिगतो विश्वरूपाच्छतक्रतुः ।
त्रैलोक्यलक्ष्मीं बुभुजे विनिर्जित्य मृधेऽसुरान् ॥ ४२॥
॥ इति श्रीमद्भागवतमहापुराणे पारमहंस्यां संहितायां
षष्ठस्कन्धे नारायणवर्मकथनं नामाष्टमोऽध्यायः ॥
శ్రీనారాయణకవచమ్
ఓం శ్రీగణేశాయ నమః ।
ఓం నమో నారాయణాయ ।
అఙ్గన్యాసః -
ఓం ఓం నమః పాదయోః ।
ఓం నం నమః జానునోః ।
ఓం మోం నమః ఊర్వోః ।
ఓం నాం నమః ఉదరే ।
ఓం రాం నమః హృది ।
ఓం యం నమః ఉరసి ।
ఓం ణాం నమః ముఖే ।
ఓం యం నమః శిరసి ॥
కరన్యాసః -
ఓం ఓం నమః దక్షిణతర్జన్యామ్ ।
ఓం నం నమః దక్షిణమధ్యమాయామ్ ।
ఓం మోం నమః దక్షిణానామికాయామ్ ।
ఓం భం నమః దక్షిణకనిష్ఠికాయామ్ ।
ఓం గం నమః వామకనిష్ఠికాయామ్ ।
ఓం వం నమః వామానామికాయామ్ ।
ఓం తేం నమః వామమధ్యమాయామ్ ।
ఓం వాం నమః వామతర్జన్యామ్ ।
ఓం సుం నమః దక్షిణాంగుష్ఠోర్ధ్వపర్వణి ।
ఓం దేం నమః దక్షిణాంగుష్ఠాయ పర్వణి ।
ఓం వాం నమః వామాంగుష్ఠోర్ధ్వపర్వణి ।
ఓం యం నమః వామాంగుష్ఠాయ పర్వణి ॥
విష్ణుషడక్షరన్యాసః -
ఓం ఓం నమః హృదయే ।
ఓం విం నమః మూర్ధని ।
ఓం షం నమః భ్రువోర్మధ్యే ।
ఓం ణం నమః శిఖాయామ్ ।
ఓం వేం నమః నేత్రయోః ।
ఓం నం నమః సర్వసన్ధిషు ।
ఓం మః అస్త్రాయ ఫట్ ప్రాచ్యామ్ ।
ఓం మః అస్త్రాయ ఫట్ ఆగ్నేయామ్ ।
ఓం మః అస్త్రాయ ఫట్ దక్షిణస్యామ్ ।
ఓం మః అస్త్రాయ ఫట్ నైరృత్యే ।
ఓం మః అస్త్రాయ ఫట్ ప్రతీచ్యామ్ ।
ఓం మః అస్త్రాయ ఫట్ వాయవ్యే ।
ఓం మః అస్త్రాయ ఫట్ ఉదీచ్యామ్ ।
ఓం మః అస్త్రాయ ఫట్ ఐశాన్యామ్ ।
ఓం మః అస్త్రాయ ఫట్ ఊర్ధ్వాయామ్ ।
ఓం మః అస్త్రాయ ఫట్ అధరాయామ్ ॥
అథ శ్రీనారాయణకవచమ్ ।
రాజోవాచ ।
యయా గుప్తః సహస్రాక్షః సవాహాన్రిపుసైనికాన్ ।
క్రీడన్నివ వినిర్జిత్య త్రిలోక్యా బుభుజే శ్రియమ్ ॥ ౧॥
భగవంస్తన్మమాఖ్యాహి వర్మ నారాయణాత్మకమ్ ।
యథాఽఽతతాయినః శత్రూన్ యేన గుప్తోఽజయన్మృధే ॥ ౨॥
శ్రీశుక ఉవాచ ।
వృతః పురోహితస్త్వాష్ట్రో మహేన్ద్రాయానుపృచ్ఛతే ।
నారాయణాఖ్యం వర్మాహ తదిహైకమనాః శృణు ॥ ౩॥
విశ్వరూప ఉవాచ ।
ధౌతాఙ్ఘ్రిపాణిరాచమ్య సపవిత్ర ఉదఙ్ముఖః ।
కృతస్వాఙ్గకరన్యాసో మన్త్రాభ్యాం వాగ్యతః శుచిః ॥ ౪॥
నారాయణమయం వర్మ సన్నహ్యేద్భయ ఆగతే ।
పాదయోర్జానునోరూర్వోరుదరే హృద్యథోరసి ॥ ౫॥
ముఖే శిరస్యానుపూర్వ్యాదోఙ్కారాదీని విన్యసేత్ ।
ఓం నమో నారాయణాయేతి విపర్యయమథాపి వా ॥ ౬॥
కరన్యాసం తతః కుర్యాద్ద్వాదశాక్షరవిద్యయా ।
ప్రణవాదియకారాన్తమఙ్గుల్యఙ్గుష్ఠపర్వసు ॥ ౭॥
న్యసేద్ధృదయ ఓఙ్కారం వికారమను మూర్ధని ।
షకారం తు భ్రువోర్మధ్యే ణకారం శిఖయా దిశేత్ ॥ ౮॥
వేకారం నేత్రయోర్యుఞ్జ్యాన్నకారం సర్వసన్ధిషు ।
మకారమస్త్రముద్దిశ్య మన్త్రమూర్తిర్భవేద్బుధః ॥ ౯॥
సవిసర్గం ఫడన్తం తత్ సర్వదిక్షు వినిర్దిశేత్ ।
ఓం విష్ణవే నమ ఇతి ॥ ౧౦॥
ఆత్మానం పరమం ధ్యాయేద్ధ్యేయం షట్శక్తిభిర్యుతమ్ ।
విద్యాతేజస్తపోమూర్తిమిమం మన్త్రముదాహరేత్ ॥ ౧౧॥
ఓం హరిర్విదధ్యాన్మమ సర్వరక్షాం
న్యస్తాఙ్ఘ్రిపద్మః పతగేన్ద్రపృష్ఠే ।
దరారిచర్మాసిగదేషుచాప-
పాశాన్దధానోఽష్టగుణోఽష్టబాహుః ॥ ౧౨॥
జలేషు మాం రక్షతు మత్స్యమూర్తి-
ర్యాదోగణేభ్యో వరుణస్య పాశాత్ ।
స్థలేషు మాయావటువామనోఽవ్యాత్
త్రివిక్రమః ఖేఽవతు విశ్వరూపః ॥ ౧౩॥
దుర్గేష్వటవ్యాజిముఖాదిషు ప్రభుః
పాయాన్నృసింహోఽసురయూథపారిః ।
విముఞ్చతో యస్య మహాట్టహాసం
దిశో వినేదుర్న్యపతంశ్చ గర్భాః ॥ ౧౪॥
రక్షత్వసౌ మాధ్వని యజ్ఞకల్పః
స్వదంష్ట్రయోన్నీతధరో వరాహః ।
రామోఽద్రికూటేష్వథ విప్రవాసే
సలక్ష్మణోఽవ్యాద్భరతాగ్రజోఽస్మాన్ ॥ ౧౫॥
మాముగ్రధర్మాదఖిలాత్ప్రమాదా-
న్నారాయణః పాతు నరశ్చ హాసాత్ ।
దత్తస్త్వయోగాదథ యోగనాథః
పాయాద్గుణేశః కపిలః కర్మబన్ధాత్ ॥ ౧౬॥
సనత్కుమారోఽవతు కామదేవా-
ద్ధయశీర్షా మాం పథి దేవహేలనాత్ ।
దేవర్షివర్యః పురుషార్చనాన్తరాత్
కూర్మో హరిర్మాం నిరయాదశేషాత్ ॥ ౧౭॥
ధన్వన్తరిర్భగవాన్పాత్వపథ్యా-
ద్ద్వన్ద్వాద్భయాదృషభో నిర్జితాత్మా ।
యజ్ఞశ్చ లోకాదవతాఞ్జ్జనాన్తా-
ద్బలో గణాత్క్రోధవశాదహీన్ద్రః ॥ ౧౮॥
ద్వైపాయనో భగవానప్రబోధా-
ద్బుద్ధస్తు పాఖణ్డగణప్రమాదాత్ ।
కల్కిః కలేః కాలమలాత్ప్రపాతు
ధర్మావనాయోరుకృతావతారః ॥ ౧౯॥
మాం కేశవో గదయా ప్రాతరవ్యా-
ద్గోవిన్ద ఆసఙ్గవమాత్తవేణుః ।
నారాయణః ప్రాహ్ణ ఉదాత్తశక్తి-
ర్మధ్యన్దినే విష్ణురరీన్ద్రపాణిః ॥ ౨౦॥
దేవోఽపరాహ్నే మధుహోగ్రధన్వా
సాయం త్రిధామావతు మాధవో మామ్ ।
దోషే హృషీకేశ ఉతార్ధరాత్రే
నిశీథ ఏకోఽవతు పద్మనాభః ॥ ౨౧॥
శ్రీవత్సధామాపరరాత్ర ఈశః
ప్రత్యూష ఈశోఽసిధరో జనార్దనః ।
దామోదరోఽవ్యాదనుసన్ధ్యం ప్రభాతే
విశ్వేశ్వరో భగవాన్ కాలమూర్తిః ॥ ౨౨॥
చక్రం యుగాన్తానలతిగ్మనేమి
భ్రమత్సమన్తాద్భగవత్ప్రయుక్తమ్ ।
దన్దగ్ధి దన్దగ్ధ్యరిసైన్యమాశు
కక్షం యథా వాతసఖో హుతాశః ॥ ౨౩॥
గదేఽశనిస్పర్శనవిస్ఫులిఙ్గే
నిష్పిణ్ఢి నిష్పిణ్ఢ్యజితప్రియాసి ।
కూష్మాణ్డవైనాయకయక్షరక్షో-
భూతగ్రహాంశ్చూర్ణయ చూర్ణయారీన్ ॥ ౨౪॥
త్వం యాతుధానప్రమథప్రేతమాతృ-
పిశాచవిప్రగ్రహఘోరదృష్టీన్ ।
దరేన్ద్ర విద్రావయ కృష్ణపూరితో
భీమస్వనోఽరేర్హృదయాని కమ్పయన్ ॥ ౨౫॥
త్వం తిగ్మధారాసివరారిసైన్య-
మీశప్రయుక్తో మమ ఛిన్ధి ఛిన్ధి ।
చక్షూంషి చర్మఞ్ఛతచన్ద్ర ఛాదయ
ద్విషామఘోనాం హర పాపచక్షుషామ్ ॥ ౨౬॥
యన్నో భయం గ్రహేభ్యోఽభూత్కేతుభ్యో నృభ్య ఏవ చ ।
సరీసృపేభ్యో దంష్ట్రిభ్యో భూతేభ్యోంఽహోభ్య ఏవ చ ॥ ౨౭॥
సర్వాణ్యేతాని భగవన్నామరూపాస్త్రకీర్తనాత్ ।
ప్రయాన్తు సఙ్క్షయం సద్యో యే నః శ్రేయఃప్రతీపకాః ॥ ౨౮॥
గరుడో భగవాన్ స్తోత్రస్తోభశ్ఛన్దోమయః ప్రభుః ।
రక్షత్వశేషకృచ్ఛ్రేభ్యో విష్వక్సేనః స్వనామభిః ॥ ౨౯ ॥
సర్వాపద్భ్యో హరేర్నామరూపయానాయుధాని నః ।
బుద్ధీన్ద్రియమనఃప్రాణాన్పాన్తు పార్షదభూషణాః ॥ ౩౦॥
యథా హి భగవానేవ వస్తుతః సదసచ్చ యత్ ।
సత్యేనానేన నః సర్వే యాన్తు నాశముపద్రవాః ॥ ౩౧॥
యథైకాత్మ్యానుభావానాం వికల్పరహితః స్వయమ్ ।
భూషణాయుధలిఙ్గాఖ్యా ధత్తే శక్తీః స్వమాయయా ॥ ౩౨॥
తేనైవ సత్యమానేన సర్వజ్ఞో భగవాన్ హరిః ।
పాతు సర్వైః స్వరూపైర్నః సదా సర్వత్ర సర్వగః ॥ ౩౩॥
విదిక్షు దిక్షూర్ధ్వమధః సమన్తా-
దన్తర్బహిర్భగవాన్నారసింహః ।
ప్రహాపయఁలోకభయం స్వనేన
స్వతేజసా గ్రస్తసమస్తతేజాః ॥ ౩౪॥
మఘవన్నిదమాఖ్యాతం వర్మ నారాయణాత్మకమ్ ।
విజేష్యస్యఞ్జసా యేన దంశితోఽసురయూథపాన్ ॥ ౩౫॥
ఏతద్ధారయమాణస్తు యం యం పశ్యతి చక్షుషా ।
పదా వా సంస్పృశేత్సద్యః సాధ్వసాత్స విముచ్యతే ॥ ౩౬॥
న కుతశ్చిద్భయం తస్య విద్యాం ధారయతో భవేత్ ।
రాజదస్యుగ్రహాదిభ్యో వ్యాఘ్రాదిభ్యశ్చ కర్హిచిత్ ॥ ౩౭॥
ఇమాం విద్యాం పురా కశ్చిత్కౌశికో ధారయన్ ద్విజః ।
యోగధారణయా స్వాఙ్గం జహౌ స మరుధన్వని ॥ ౩౮॥
తస్యోపరి విమానేన గన్ధర్వపతిరేకదా ।
యయౌ చిత్రరథః స్త్రీభిర్వృతో యత్ర ద్విజక్షయః ॥ ౩౯ ॥
గగనాన్న్యపతత్సద్యః సవిమానో హ్యవాక్శిరాః ।
స వాలఖిల్యవచనాదస్థీన్యాదాయ విస్మితః ।
ప్రాస్య ప్రాచీసరస్వత్యాం స్నాత్వా ధామ స్వమన్వగాత్ ॥ ౪౦॥
శ్రీశుక ఉవాచ ।
య ఇదం శృణుయాత్కాలే యో ధారయతి చాదృతః ।
తం నమస్యన్తి భూతాని ముచ్యతే సర్వతో భయాత్ ॥ ౪౧॥
ఏతాం విద్యామధిగతో విశ్వరూపాచ్ఛతక్రతుః ।
త్రైలోక్యలక్ష్మీం బుభుజే వినిర్జిత్య మృధేఽసురాన్ ॥ ౪౨॥
॥ ఇతి శ్రీమద్భాగవతమహాపురాణే పారమహంస్యాం సంహితాయాం
షష్ఠస్కన్ధే నారాయణవర్మకథనం నామాష్టమోఽధ్యాయః ॥
śrīnārāyaṇakavacam
oṃ śrīgaṇeśāya namaḥ |
oṃ namo nārāyaṇāya |
aṅganyāsaḥ -
oṃ oṃ namaḥ pādayoḥ |
oṃ naṃ namaḥ jānunoḥ |
oṃ moṃ namaḥ ūrvoḥ |
oṃ nāṃ namaḥ udare |
oṃ rāṃ namaḥ hṛdi |
oṃ yaṃ namaḥ urasi |
oṃ ṇāṃ namaḥ mukhe |
oṃ yaṃ namaḥ śirasi ||
karanyāsaḥ -
oṃ oṃ namaḥ dakṣiṇatarjanyām |
oṃ naṃ namaḥ dakṣiṇamadhyamāyām |
oṃ moṃ namaḥ dakṣiṇānāmikāyām |
oṃ bhaṃ namaḥ dakṣiṇakaniṣṭhikāyām |
oṃ gaṃ namaḥ vāmakaniṣṭhikāyām |
oṃ vaṃ namaḥ vāmānāmikāyām |
oṃ teṃ namaḥ vāmamadhyamāyām |
oṃ vāṃ namaḥ vāmatarjanyām |
oṃ suṃ namaḥ dakṣiṇāṃguṣṭhordhvaparvaṇi |
oṃ deṃ namaḥ dakṣiṇāṃguṣṭhāya parvaṇi |
oṃ vāṃ namaḥ vāmāṃguṣṭhordhvaparvaṇi |
oṃ yaṃ namaḥ vāmāṃguṣṭhāya parvaṇi ||
viṣṇuṣaḍakṣaranyāsaḥ -
oṃ oṃ namaḥ hṛdaye |
oṃ viṃ namaḥ mūrdhani |
oṃ ṣaṃ namaḥ bhruvormadhye |
oṃ ṇaṃ namaḥ śikhāyām |
oṃ veṃ namaḥ netrayoḥ |
oṃ naṃ namaḥ sarvasandhiṣu |
oṃ maḥ astrāya phaṭ prācyām |
oṃ maḥ astrāya phaṭ āgneyām |
oṃ maḥ astrāya phaṭ dakṣiṇasyām |
oṃ maḥ astrāya phaṭ nairṛtye |
oṃ maḥ astrāya phaṭ pratīcyām |
oṃ maḥ astrāya phaṭ vāyavye |
oṃ maḥ astrāya phaṭ udīcyām |
oṃ maḥ astrāya phaṭ aiśānyām |
oṃ maḥ astrāya phaṭ ūrdhvāyām |
oṃ maḥ astrāya phaṭ adharāyām ||
atha śrīnārāyaṇakavacam |
rājovāca |
yayā guptaḥ sahasrākṣaḥ savāhānripusainikān |
krīḍanniva vinirjitya trilokyā bubhuje śriyam || 1||
bhagavaṃstanmamākhyāhi varma nārāyaṇātmakam |
yathā''tatāyinaḥ śatrūn yena gupto'jayanmṛdhe || 2||
śrīśuka uvāca |
vṛtaḥ purohitastvāṣṭro mahendrāyānupṛcchate |
nārāyaṇākhyaṃ varmāha tadihaikamanāḥ śaṛṇu || 3||
viśvarūpa uvāca |
dhautāṅghripāṇirācamya sapavitra udaṅmukhaḥ |
kṛtasvāṅgakaranyāso mantrābhyāṃ vāgyataḥ śuciḥ || 4||
nārāyaṇamayaṃ varma sannahyedbhaya āgate |
pādayorjānunorūrvorudare hṛdyathorasi || 5||
mukhe śirasyānupūrvyādoṅkārādīni vinyaset |
oṃ namo nārāyaṇāyeti viparyayamathāpi vā || 6||
karanyāsaṃ tataḥ kuryāddvādaśākṣaravidyayā |
praṇavādiyakārāntamaṅgulyaṅguṣṭhaparvasu || 7||
nyaseddhṛdaya oṅkāraṃ vikāramanu mūrdhani |
ṣakāraṃ tu bhruvormadhye ṇakāraṃ śikhayā diśet || 8||
vekāraṃ netrayoryuñjyānnakāraṃ sarvasandhiṣu |
makāramastramuddiśya mantramūrtirbhavedbudhaḥ || 9||
savisargaṃ phaḍantaṃ tat sarvadikṣu vinirdiśet |
oṃ viṣṇave nama iti || 10||
ātmānaṃ paramaṃ dhyāyeddhyeyaṃ ṣaṭśaktibhiryutam |
vidyātejastapomūrtimimaṃ mantramudāharet || 11||
oṃ harirvidadhyānmama sarvarakṣāṃ
nyastāṅghripadmaḥ patagendrapṛṣṭhe |
darāricarmāsigadeṣucāpa-
pāśāndadhāno'ṣṭaguṇo'ṣṭabāhuḥ || 12||
jaleṣu māṃ rakṣatu matsyamūrti-
ryādogaṇebhyo varuṇasya pāśāt |
sthaleṣu māyāvaṭuvāmano'vyāt
trivikramaḥ khe'vatu viśvarūpaḥ || 13||
durgeṣvaṭavyājimukhādiṣu prabhuḥ
pāyānnṛsiṃho'surayūthapāriḥ |
vimuñcato yasya mahāṭṭahāsaṃ
diśo vinedurnyapataṃśca garbhāḥ || 14||
rakṣatvasau mādhvani yajñakalpaḥ
svadaṃṣṭrayonnītadharo varāhaḥ |
rāmo'drikūṭeṣvatha vipravāse
salakṣmaṇo'vyādbharatāgrajo'smān || 15||
māmugradharmādakhilātpramādā-
nnārāyaṇaḥ pātu naraśca hāsāt |
dattastvayogādatha yoganāthaḥ
pāyādguṇeśaḥ kapilaḥ karmabandhāt || 16||
sanatkumāro'vatu kāmadevā-
ddhayaśīrṣā māṃ pathi devahelanāt |
devarṣivaryaḥ puruṣārcanāntarāt
kūrmo harirmāṃ nirayādaśeṣāt || 17||
dhanvantarirbhagavānpātvapathyā-
ddvandvādbhayādṛṣabho nirjitātmā |
yajñaśca lokādavatāñjjanāntā-
dbalo gaṇātkrodhavaśādahīndraḥ || 18||
dvaipāyano bhagavānaprabodhā-
dbuddhastu pākhaṇḍagaṇapramādāt |
kalkiḥ kaleḥ kālamalātprapātu
dharmāvanāyorukṛtāvatāraḥ || 19||
māṃ keśavo gadayā prātaravyā-
dgovinda āsaṅgavamāttaveṇuḥ |
nārāyaṇaḥ prāhṇa udāttaśakti-
rmadhyandine viṣṇurarīndrapāṇiḥ || 20||
devo'parāhne madhuhogradhanvā
sāyaṃ tridhāmāvatu mādhavo mām |
doṣe hṛṣīkeśa utārdharātre
niśītha eko'vatu padmanābhaḥ || 21||
śrīvatsadhāmāpararātra īśaḥ
pratyūṣa īśo'sidharo janārdanaḥ |
dāmodaro'vyādanusandhyaṃ prabhāte
viśveśvaro bhagavān kālamūrtiḥ || 22||
cakraṃ yugāntānalatigmanemi
bhramatsamantādbhagavatprayuktam |
dandagdhi dandagdhyarisainyamāśu
kakṣaṃ yathā vātasakho hutāśaḥ || 23||
gade'śanisparśanavisphuliṅge
niṣpiṇḍhi niṣpiṇḍhyajitapriyāsi |
kūṣmāṇḍavaināyakayakṣarakṣo-
bhūtagrahāṃścūrṇaya cūrṇayārīn || 24||
tvaṃ yātudhānapramathapretamātṛ-
piśācavipragrahaghoradṛṣṭīn |
darendra vidrāvaya kṛṣṇapūrito
bhīmasvano'rerhṛdayāni kampayan || 25||
tvaṃ tigmadhārāsivarārisainya-
mīśaprayukto mama chindhi chindhi |
cakṣūṃṣi carmañchatacandra chādaya
dviṣāmaghonāṃ hara pāpacakṣuṣām || 26||
yanno bhayaṃ grahebhyo'bhūtketubhyo nṛbhya eva ca |
sarīsṛpebhyo daṃṣṭribhyo bhūtebhyoṃ'hobhya eva ca || 27||
sarvāṇyetāni bhagavannāmarūpāstrakīrtanāt |
prayāntu saṅkṣayaṃ sadyo ye naḥ śreyaḥpratīpakāḥ || 28||
garuḍo bhagavān stotrastobhaśchandomayaḥ prabhuḥ |
rakṣatvaśeṣakṛcchrebhyo viṣvaksenaḥ svanāmabhiḥ || 29 ||
sarvāpadbhyo harernāmarūpayānāyudhāni naḥ |
buddhīndriyamanaḥprāṇānpāntu pārṣadabhūṣaṇāḥ || 30||
yathā hi bhagavāneva vastutaḥ sadasacca yat |
satyenānena naḥ sarve yāntu nāśamupadravāḥ || 31||
yathaikātmyānubhāvānāṃ vikalparahitaḥ svayam |
bhūṣaṇāyudhaliṅgākhyā dhatte śaktīḥ svamāyayā || 32||
tenaiva satyamānena sarvajño bhagavān hariḥ |
pātu sarvaiḥ svarūpairnaḥ sadā sarvatra sarvagaḥ || 33||
vidikṣu dikṣūrdhvamadhaḥ samantā-
dantarbahirbhagavānnārasiṃhaḥ |
prahāpaya~lokabhayaṃ svanena
svatejasā grastasamastatejāḥ || 34||
maghavannidamākhyātaṃ varma nārāyaṇātmakam |
vijeṣyasyañjasā yena daṃśito'surayūthapān || 35||
etaddhārayamāṇastu yaṃ yaṃ paśyati cakṣuṣā |
padā vā saṃspṛśetsadyaḥ sādhvasātsa vimucyate || 36||
na kutaścidbhayaṃ tasya vidyāṃ dhārayato bhavet |
rājadasyugrahādibhyo vyāghrādibhyaśca karhicit || 37||
imāṃ vidyāṃ purā kaścitkauśiko dhārayan dvijaḥ |
yogadhāraṇayā svāṅgaṃ jahau sa marudhanvani || 38||
tasyopari vimānena gandharvapatirekadā |
yayau citrarathaḥ strībhirvṛto yatra dvijakṣayaḥ || 39 ||
gaganānnyapatatsadyaḥ savimāno hyavākśirāḥ |
sa vālakhilyavacanādasthīnyādāya vismitaḥ |
prāsya prācīsarasvatyāṃ snātvā dhāma svamanvagāt || 40||
śrīśuka uvāca |
ya idaṃ śaṛṇuyātkāle yo dhārayati cādṛtaḥ |
taṃ namasyanti bhūtāni mucyate sarvato bhayāt || 41||
etāṃ vidyāmadhigato viśvarūpācchatakratuḥ |
trailokyalakṣmīṃ bubhuje vinirjitya mṛdhe'surān || 42||
|| iti śrīmadbhāgavatamahāpurāṇe pāramahaṃsyāṃ saṃhitāyāṃ
ṣaṣṭhaskandhe nārāyaṇavarmakathanaṃ nāmāṣṭamo'dhyāyaḥ ||