शक्त्यष्टोत्तरशतदिव्यस्थानीयनामस्तोत्रम्
दक्ष उवाच
एवमुक्तोऽब्रवीद्दक्षः केषु केषु मयाऽनघे
तीर्थेषु च त्वं द्रष्टव्या स्तोतव्या कैश्च नामभिः
देव्युवाच
सर्वगा सर्वभूतेषु द्रष्टव्या सर्वतो भुवि
सप्तलोकेषु यत्किञ्चिद्रहितं न मया विना
तथाऽपि येषु स्थानेषु द्रष्टव्याः सिद्धिमीप्सुभिः
स्मर्तव्या भूतिकामैर्वा तानि वक्ष्यामि तत्त्वतः
स्तोत्रम्
वाराणस्यां विशालाक्षी नैमिषे लिङ्गधारिणी
प्रयागे ललिता देवी कामुका गन्धमादने
मानसे कुमुदा नाम विश्वकाया तथेश्वरे
गोमन्ते गोमती नाम मन्दरे कामचारिणी
मदोत्कटा चैत्ररथे जयन्ती हस्तिनापुरे
कान्यकुब्जे तथा गौरी रम्भा मलयपर्वते
एकाम्रके कीर्तिमती विश्वां विश्वेश्वरे विदुः
पुष्करे पुरुहूतेति केदारे मार्गदायिनी
नन्दा हिमवतः पृष्ठे गोकर्णे भद्रकर्णिका
स्थानेश्वरे भवानी तु बिल्वके बिल्वपत्रिका
श्रीशैले माधवी नाम भद्रा भद्रेश्वरे तथा
जया वराहशैले तु कमला कमलालये
रुद्रकोट्यां च रुद्राणी काली कालञ्जरे गिरौ
महालिङ्गे तु कपिला मर्कोटे मुकुटेश्वरी
शालग्रामे महादेवी शिवलिङ्गे जलप्रिया
मायापुर्यां कुमारी तु सन्ताने ललिता तथा
उत्पलाक्षी सहस्राक्षे हिरण्याक्षे महोत्पला
गयायां मङ्गला नाम विमला पुरुषोत्तमे
विपाशायामघोराक्षी पाटला पुण्ड्रवर्धने
नारायणी सुपार्श्वे तु त्रिकूटे रुद्रसुन्दरी
विपुले विपुला नाम कल्याणी मलयाचले
कौटवी कोटितीर्थेषु सुगन्धा माधवे वने
गोदाश्रमे त्रिसन्ध्या तु गङ्गाद्वारे रतिप्रिया
शिवकुण्डे शिवानन्दा नन्दिनी देविकातटे
रुक्मिणी द्वारवत्यां तु राधा वृन्दावने वने
देवकी मथुरायां तु पाताले परमेश्वरी
चित्रकूटे तथा सीता विन्ध्ये विन्ध्याधिवासिनी
सह्यद्वारे करीरा तु हरिश्चन्द्रे तु चन्द्रिका
रमणा रामतीर्थे तु यमुनायां मृगावती
करवीरे महालक्ष्मीरुमादेवी विनायके
अरोगा वैद्यनाथे तु महाकाले महेश्वरी
अभयेत्युष्णतीर्थेषु चामृता विन्ध्यकन्दरे
माण्डव्ये माण्डवी नाम स्वाहा माहेश्वरे पुरे
छागलाण्डे प्रचण्डा तु चण्डिकामरकण्टके
सोमेश्वरे वरारोहा प्रभासे पुष्करावती
देवमाता सरस्वत्यां पारा पारातटे मता
महालये महाभागा पयोष्ण्यां पिङ्गलेश्वरी
सिंहिका कृतशौचे तु कार्त्तिकेये तु शङ्करी
उत्पलावर्तके लोला सुभद्रा शोणसङ्गमे
महासिद्धवने लक्ष्मीरनङ्गा भरताश्रमे
जालन्धरे विश्वमुखी तारा किष्किन्धपर्वते
देवदारुवने पुष्टिर्मेधा काश्मीरमण्डले
भीमादेवी हिमाद्रौ तु पुष्टिर्विश्वेश्वरे तथा
कपालमोचने शुद्धिर्माता कायावरोहणे
शङ्खोद्धारे ध्वनिर्नाम धृतिः पिण्डारके तथा
काला तु चन्द्रभागायामच्चोदे शिवकारिणी
वेणायाममृता नाम बदर्याम् उर्वशी तथा
औषधी चोत्तरकुरौ कुशद्वीपे कुशोदका
मन्मथा हेमकूटे तु मुकुटे सत्यवादिनी
अश्वत्थे वन्दनीया तु निधिर्वैश्रवणालये
गायत्री वेदवदने पार्वती शिवसन्निधौ
देवलोके तथेन्द्राणी ब्रह्मास्येषु सरस्वती
सूर्यबिम्बे प्रभा नाम मातॄणां वैष्णवी तथा
अरुन्धती सतीनां तु रामासु च तिलोत्तमा
चित्ते ब्रह्मकला नाम शक्तिः सर्वशरीरिणाम्
एतदुद्देशतः प्रोक्तं नामाष्टशतमुत्तमम्
अष्टोत्तरं च तीर्थानां शतमेतदुदाहृतम्
यः पठेच्छृणुयाद्वाऽपि सर्वपापैः प्रमुच्यते
एषु तीर्थेषु यः कृत्वा स्नानं पश्यन्ति मां नरः
सर्वपापविनिर्मुक्तः कल्पं शिवपुरे वसेत्
यस्तु मत्परमः कालं करोत्येतेषु मानवः
स भित्त्वा ब्रह्मसदनं पदमभ्येति शाङ्करम्
नामाष्टशतकं यस्तु श्रावयेच्छिवसन्निधौ
तृतीयायामथाष्टम्यां बहुपुत्रो भवेन्नरः
गोदाने श्राद्धकाले वा अहन्यहनि वा पुनः
देवार्चनविधौ विद्वान् पठन् ब्रह्माधिगच्छति
एवं वदन्ती सा तत्र ददाहात्मानमात्मना
स्वायम्भुवेऽपि काले च दक्षप्राचेतसोऽभवत्
पार्वती चाभवद्देवी शिवदेहार्धधारिणी
मेनागर्भसमुत्पन्ना भुक्तिमुक्तिफलप्रदा
अरुन्धती जपन्त्येतत्तदाप्ता योगमुत्तमम्
पुरूरवाश्च राजर्षिर्लोकेषु जयतामगात्
ययातिः पुत्रलाभं तु धनलाभं तु भार्गवः
तथाऽन्ये देवदैत्याश्च ब्राह्मणाः क्षत्रियास्तथा
वैश्याः शूद्राश्च बहवः सिद्धिमीयुर्यथेप्सिताम्
यत्रेतल्लिखितं तिष्ठेत् पूज्यते देवसन्निधौ
न तत्र शोकदौर्गत्यं कदाचिदपि जायते
॥इति श्रीमत्स्यमहापुराणे त्रयोदशेऽध्याये श्री-शक्त्यष्टोत्तरशतदिव्यस्थानीयनामस्तोत्रं सम्पूर्णम्॥
శక్త్యష్టోత్తరశతదివ్యస్థానీయనామస్తోత్రమ్
దక్ష ఉవాచ
ఏవముక్తోఽబ్రవీద్దక్షః కేషు కేషు మయాఽనఘే
తీర్థేషు చ త్వం ద్రష్టవ్యా స్తోతవ్యా కైశ్చ నామభిః
దేవ్యువాచ
సర్వగా సర్వభూతేషు ద్రష్టవ్యా సర్వతో భువి
సప్తలోకేషు యత్కిఞ్చిద్రహితం న మయా వినా
తథాఽపి యేషు స్థానేషు ద్రష్టవ్యాః సిద్ధిమీప్సుభిః
స్మర్తవ్యా భూతికామైర్వా తాని వక్ష్యామి తత్త్వతః
స్తోత్రమ్
వారాణస్యాం విశాలాక్షీ నైమిషే లిఙ్గధారిణీ
ప్రయాగే లలితా దేవీ కాముకా గన్ధమాదనే
మానసే కుముదా నామ విశ్వకాయా తథేశ్వరే
గోమన్తే గోమతీ నామ మన్దరే కామచారిణీ
మదోత్కటా చైత్రరథే జయన్తీ హస్తినాపురే
కాన్యకుబ్జే తథా గౌరీ రమ్భా మలయపర్వతే
ఏకామ్రకే కీర్తిమతీ విశ్వాం విశ్వేశ్వరే విదుః
పుష్కరే పురుహూతేతి కేదారే మార్గదాయినీ
నన్దా హిమవతః పృష్ఠే గోకర్ణే భద్రకర్ణికా
స్థానేశ్వరే భవానీ తు బిల్వకే బిల్వపత్రికా
శ్రీశైలే మాధవీ నామ భద్రా భద్రేశ్వరే తథా
జయా వరాహశైలే తు కమలా కమలాలయే
రుద్రకోట్యాం చ రుద్రాణీ కాలీ కాలఞ్జరే గిరౌ
మహాలిఙ్గే తు కపిలా మర్కోటే ముకుటేశ్వరీ
శాలగ్రామే మహాదేవీ శివలిఙ్గే జలప్రియా
మాయాపుర్యాం కుమారీ తు సన్తానే లలితా తథా
ఉత్పలాక్షీ సహస్రాక్షే హిరణ్యాక్షే మహోత్పలా
గయాయాం మఙ్గలా నామ విమలా పురుషోత్తమే
విపాశాయామఘోరాక్షీ పాటలా పుణ్డ్రవర్ధనే
నారాయణీ సుపార్శ్వే తు త్రికూటే రుద్రసున్దరీ
విపులే విపులా నామ కల్యాణీ మలయాచలే
కౌటవీ కోటితీర్థేషు సుగన్ధా మాధవే వనే
గోదాశ్రమే త్రిసన్ధ్యా తు గఙ్గాద్వారే రతిప్రియా
శివకుణ్డే శివానన్దా నన్దినీ దేవికాతటే
రుక్మిణీ ద్వారవత్యాం తు రాధా వృన్దావనే వనే
దేవకీ మథురాయాం తు పాతాలే పరమేశ్వరీ
చిత్రకూటే తథా సీతా విన్ధ్యే విన్ధ్యాధివాసినీ
సహ్యద్వారే కరీరా తు హరిశ్చన్ద్రే తు చన్ద్రికా
రమణా రామతీర్థే తు యమునాయాం మృగావతీ
కరవీరే మహాలక్ష్మీరుమాదేవీ వినాయకే
అరోగా వైద్యనాథే తు మహాకాలే మహేశ్వరీ
అభయేత్యుష్ణతీర్థేషు చామృతా విన్ధ్యకన్దరే
మాణ్డవ్యే మాణ్డవీ నామ స్వాహా మాహేశ్వరే పురే
ఛాగలాణ్డే ప్రచణ్డా తు చణ్డికామరకణ్టకే
సోమేశ్వరే వరారోహా ప్రభాసే పుష్కరావతీ
దేవమాతా సరస్వత్యాం పారా పారాతటే మతా
మహాలయే మహాభాగా పయోష్ణ్యాం పిఙ్గలేశ్వరీ
సింహికా కృతశౌచే తు కార్త్తికేయే తు శఙ్కరీ
ఉత్పలావర్తకే లోలా సుభద్రా శోణసఙ్గమే
మహాసిద్ధవనే లక్ష్మీరనఙ్గా భరతాశ్రమే
జాలన్ధరే విశ్వముఖీ తారా కిష్కిన్ధపర్వతే
దేవదారువనే పుష్టిర్మేధా కాశ్మీరమణ్డలే
భీమాదేవీ హిమాద్రౌ తు పుష్టిర్విశ్వేశ్వరే తథా
కపాలమోచనే శుద్ధిర్మాతా కాయావరోహణే
శఙ్ఖోద్ధారే ధ్వనిర్నామ ధృతిః పిణ్డారకే తథా
కాలా తు చన్ద్రభాగాయామచ్చోదే శివకారిణీ
వేణాయామమృతా నామ బదర్యామ్ ఉర్వశీ తథా
ఔషధీ చోత్తరకురౌ కుశద్వీపే కుశోదకా
మన్మథా హేమకూటే తు ముకుటే సత్యవాదినీ
అశ్వత్థే వన్దనీయా తు నిధిర్వైశ్రవణాలయే
గాయత్రీ వేదవదనే పార్వతీ శివసన్నిధౌ
దేవలోకే తథేన్ద్రాణీ బ్రహ్మాస్యేషు సరస్వతీ
సూర్యబిమ్బే ప్రభా నామ మాతౄణాం వైష్ణవీ తథా
అరున్ధతీ సతీనాం తు రామాసు చ తిలోత్తమా
చిత్తే బ్రహ్మకలా నామ శక్తిః సర్వశరీరిణామ్
ఏతదుద్దేశతః ప్రోక్తం నామాష్టశతముత్తమమ్
అష్టోత్తరం చ తీర్థానాం శతమేతదుదాహృతమ్
యః పఠేచ్ఛృణుయాద్వాఽపి సర్వపాపైః ప్రముచ్యతే
ఏషు తీర్థేషు యః కృత్వా స్నానం పశ్యన్తి మాం నరః
సర్వపాపవినిర్ముక్తః కల్పం శివపురే వసేత్
యస్తు మత్పరమః కాలం కరోత్యేతేషు మానవః
స భిత్త్వా బ్రహ్మసదనం పదమభ్యేతి శాఙ్కరమ్
నామాష్టశతకం యస్తు శ్రావయేచ్ఛివసన్నిధౌ
తృతీయాయామథాష్టమ్యాం బహుపుత్రో భవేన్నరః
గోదానే శ్రాద్ధకాలే వా అహన్యహని వా పునః
దేవార్చనవిధౌ విద్వాన్ పఠన్ బ్రహ్మాధిగచ్ఛతి
ఏవం వదన్తీ సా తత్ర దదాహాత్మానమాత్మనా
స్వాయమ్భువేఽపి కాలే చ దక్షప్రాచేతసోఽభవత్
పార్వతీ చాభవద్దేవీ శివదేహార్ధధారిణీ
మేనాగర్భసముత్పన్నా భుక్తిముక్తిఫలప్రదా
అరున్ధతీ జపన్త్యేతత్తదాప్తా యోగముత్తమమ్
పురూరవాశ్చ రాజర్షిర్లోకేషు జయతామగాత్
యయాతిః పుత్రలాభం తు ధనలాభం తు భార్గవః
తథాఽన్యే దేవదైత్యాశ్చ బ్రాహ్మణాః క్షత్రియాస్తథా
వైశ్యాః శూద్రాశ్చ బహవః సిద్ధిమీయుర్యథేప్సితామ్
యత్రేతల్లిఖితం తిష్ఠేత్ పూజ్యతే దేవసన్నిధౌ
న తత్ర శోకదౌర్గత్యం కదాచిదపి జాయతే
॥ఇతి శ్రీమత్స్యమహాపురాణే త్రయోదశేఽధ్యాయే శ్రీ-శక్త్యష్టోత్తరశతదివ్యస్థానీయనామస్తోత్రం సమ్పూర్ణమ్॥
śaktyaṣṭottaraśatadivyasthānīyanāmastotram
dakṣa uvāca
evamukto'bravīddakṣaḥ keṣu keṣu mayā'naghe
tīrtheṣu ca tvaṃ draṣṭavyā stotavyā kaiśca nāmabhiḥ
devyuvāca
sarvagā sarvabhūteṣu draṣṭavyā sarvato bhuvi
saptalokeṣu yatkiñcidrahitaṃ na mayā vinā
tathā'pi yeṣu sthāneṣu draṣṭavyāḥ siddhimīpsubhiḥ
smartavyā bhūtikāmairvā tāni vakṣyāmi tattvataḥ
stotram
vārāṇasyāṃ viśālākṣī naimiṣe liṅgadhāriṇī
prayāge lalitā devī kāmukā gandhamādane
mānase kumudā nāma viśvakāyā tatheśvare
gomante gomatī nāma mandare kāmacāriṇī
madotkaṭā caitrarathe jayantī hastināpure
kānyakubje tathā gaurī rambhā malayaparvate
ekāmrake kīrtimatī viśvāṃ viśveśvare viduḥ
puṣkare puruhūteti kedāre mārgadāyinī
nandā himavataḥ pṛṣṭhe gokarṇe bhadrakarṇikā
sthāneśvare bhavānī tu bilvake bilvapatrikā
śrīśaile mādhavī nāma bhadrā bhadreśvare tathā
jayā varāhaśaile tu kamalā kamalālaye
rudrakoṭyāṃ ca rudrāṇī kālī kālañjare girau
mahāliṅge tu kapilā markoṭe mukuṭeśvarī
śālagrāme mahādevī śivaliṅge jalapriyā
māyāpuryāṃ kumārī tu santāne lalitā tathā
utpalākṣī sahasrākṣe hiraṇyākṣe mahotpalā
gayāyāṃ maṅgalā nāma vimalā puruṣottame
vipāśāyāmaghorākṣī pāṭalā puṇḍravardhane
nārāyaṇī supārśve tu trikūṭe rudrasundarī
vipule vipulā nāma kalyāṇī malayācale
kauṭavī koṭitīrtheṣu sugandhā mādhave vane
godāśrame trisandhyā tu gaṅgādvāre ratipriyā
śivakuṇḍe śivānandā nandinī devikātaṭe
rukmiṇī dvāravatyāṃ tu rādhā vṛndāvane vane
devakī mathurāyāṃ tu pātāle parameśvarī
citrakūṭe tathā sītā vindhye vindhyādhivāsinī
sahyadvāre karīrā tu hariścandre tu candrikā
ramaṇā rāmatīrthe tu yamunāyāṃ mṛgāvatī
karavīre mahālakṣmīrumādevī vināyake
arogā vaidyanāthe tu mahākāle maheśvarī
abhayetyuṣṇatīrtheṣu cāmṛtā vindhyakandare
māṇḍavye māṇḍavī nāma svāhā māheśvare pure
chāgalāṇḍe pracaṇḍā tu caṇḍikāmarakaṇṭake
someśvare varārohā prabhāse puṣkarāvatī
devamātā sarasvatyāṃ pārā pārātaṭe matā
mahālaye mahābhāgā payoṣṇyāṃ piṅgaleśvarī
siṃhikā kṛtaśauce tu kārttikeye tu śaṅkarī
utpalāvartake lolā subhadrā śoṇasaṅgame
mahāsiddhavane lakṣmīranaṅgā bharatāśrame
jālandhare viśvamukhī tārā kiṣkindhaparvate
devadāruvane puṣṭirmedhā kāśmīramaṇḍale
bhīmādevī himādrau tu puṣṭirviśveśvare tathā
kapālamocane śuddhirmātā kāyāvarohaṇe
śaṅkhoddhāre dhvanirnāma dhṛtiḥ piṇḍārake tathā
kālā tu candrabhāgāyāmaccode śivakāriṇī
veṇāyāmamṛtā nāma badaryām urvaśī tathā
auṣadhī cottarakurau kuśadvīpe kuśodakā
manmathā hemakūṭe tu mukuṭe satyavādinī
aśvatthe vandanīyā tu nidhirvaiśravaṇālaye
gāyatrī vedavadane pārvatī śivasannidhau
devaloke tathendrāṇī brahmāsyeṣu sarasvatī
sūryabimbe prabhā nāma mātṝṇāṃ vaiṣṇavī tathā
arundhatī satīnāṃ tu rāmāsu ca tilottamā
citte brahmakalā nāma śaktiḥ sarvaśarīriṇām
etaduddeśataḥ proktaṃ nāmāṣṭaśatamuttamam
aṣṭottaraṃ ca tīrthānāṃ śatametadudāhṛtam
yaḥ paṭhecchṛṇuyādvā'pi sarvapāpaiḥ pramucyate
eṣu tīrtheṣu yaḥ kṛtvā snānaṃ paśyanti māṃ naraḥ
sarvapāpavinirmuktaḥ kalpaṃ śivapure vaset
yastu matparamaḥ kālaṃ karotyeteṣu mānavaḥ
sa bhittvā brahmasadanaṃ padamabhyeti śāṅkaram
nāmāṣṭaśatakaṃ yastu śrāvayecchivasannidhau
tṛtīyāyāmathāṣṭamyāṃ bahuputro bhavennaraḥ
godāne śrāddhakāle vā ahanyahani vā punaḥ
devārcanavidhau vidvān paṭhan brahmādhigacchati
evaṃ vadantī sā tatra dadāhātmānamātmanā
svāyambhuve'pi kāle ca dakṣaprācetaso'bhavat
pārvatī cābhavaddevī śivadehārdhadhāriṇī
menāgarbhasamutpannā bhuktimuktiphalapradā
arundhatī japantyetattadāptā yogamuttamam
purūravāśca rājarṣirlokeṣu jayatāmagāt
yayātiḥ putralābhaṃ tu dhanalābhaṃ tu bhārgavaḥ
tathā'nye devadaityāśca brāhmaṇāḥ kṣatriyāstathā
vaiśyāḥ śūdrāśca bahavaḥ siddhimīyuryathepsitām
yatretallikhitaṃ tiṣṭhet pūjyate devasannidhau
na tatra śokadaurgatyaṃ kadācidapi jāyate
||iti śrīmatsyamahāpurāṇe trayodaśe'dhyāye śrī-śaktyaṣṭottaraśatadivyasthānīyanāmastotraṃ sampūrṇam||