दुर्गास्तोत्रम् (युधिष्ठिरकृतम्)
वैशम्पायन उवाच
विराटनगरं रम्यं गच्छमानो युधिष्ठिरः
अस्तुवन्मनसा देवीं दुर्गां त्रिभुवनेश्वरीम्
यशोदागर्भसम्भूतां नारायणवरप्रियाम्
नन्दगोपकुले जातां मङ्गल्यां कुलवर्धनीम्
कंसविद्रावणकरीमसुराणां क्षयङ्करीम्
शिलातटविनिक्षिप्तामाकाशं प्रति गामिनीम्
वासुदेवस्य भगिनीं दिव्यमाल्यविभूषिताम्
दिव्याम्बरधरां देवीं खड्गखेटकधारिणीम्
भारावतरणे पुण्ये ये स्मरन्ति सदा शिवाम्
तान् वै तारयसे पापात्पङ्के गामिव दुर्बलाम्
स्तोतुं प्रचक्रमे भूयो विविधैः स्तोत्रसम्भवैः
आमन्त्र्य दर्शनाकाङ्क्षी राजा देवीं सहानुजः
नमोऽस्तु वरदे कृष्णे कुमारि ब्रह्मचारिणि
बालार्कसदृशाकारे पूर्णचन्द्रनिभानने
चतुर्भुजे चतुर्वक्त्रे पीनश्रोणिपयोधरे
मयूरपिच्छवलये केयूराङ्गदधारिणि
भासि देवि यथा पद्मा नारायणपरिग्रहः
स्वरूपं ब्रह्मचर्यं च विशदं तव खेचरि
कृष्णच्छविसमा कृष्णा सङ्कर्षणसमानना
बिभ्रती विपुलौ बाहू शक्रध्वजसमुच्छ्रयौ
पात्री च पङ्कजी घण्टी स्त्री विशुद्धा च या भुवि
पाशं धनुर्महाचक्रं विविधान्यायुधानि च
कुण्डलाभ्यां सुपूर्णाभ्यां कर्णाभ्यां च विभूषिता
चन्द्रविस्पर्धिना देवि मुखेन त्वं विराजसे
मुकुटेन विचित्रेण केशबन्धेन शोभिना
भुजङ्गाभोगवासेन श्रोणिसूत्रेण राजता
विभ्राजसे चाबद्धेन भोगेनेवेह मन्दरः
ध्वजेन शिखिपिच्छानामुच्छ्रितेन विराजसे
कौमारं व्रतमास्थाय त्रिदिवं पावितं त्वया
तेन त्वं स्तूयसे देवि त्रिदशैः पूज्यसेऽपि च
त्रैलोक्यरक्षणार्थाय महिषासुरनाशिनि
प्रसन्ना मे सुरश्रेष्ठे दयां कुरु शिवा भव
जया त्वं विजया चैव सङ्ग्रामे च जयप्रदा
ममापि विजयं देहि वरदा त्वं च साम्प्रतम्
विन्ध्ये चैव नगश्रेष्ठे तव स्थानं हि शाश्वतम्
कालि कालि महाकालि शीधुमांसपशुप्रिये
कृतानुयात्रा भूतैस्त्वं वरदा कामचारिणी
भारावतारे ये च त्वां संस्मरिष्यन्ति मानवाः
प्रणमन्ति च ये त्वां हि प्रभाते तु नरा भुवि
न तेषां दुर्लभं किञ्चित्पुत्रतो धनतोऽपि वा
दुर्गात्तारयसे दुर्गे तत् त्वं दुर्गा स्मृता जनैः
कान्तारेष्ववसन्नानां मग्नानां च महार्णवे
दस्युभिर्वा निरुद्धानां त्वं गतिः परमा नृणाम्
जलप्रतरणे चैव कान्तारेष्वटवीषु च
ये स्मरन्ति महादेवि न च सीदन्ति ते नराः
त्वं कीर्तिः श्रीर्धृतिः सिद्धिर्ह्रीर्विद्या सन्ततिर्मतिः
सन्ध्या रात्रिः प्रभा निद्रा ज्योत्स्ना कान्तिः क्षमा दया
नृणां च बन्धनं मोहं पुत्रनाशं धनक्षयम्
व्याधिं मृत्युं भयं चैव पूजिता नाशयिष्यसि
सोऽहं राज्यात्परिभ्रष्टः शरणं त्वां प्रपन्नवान्
प्रणतश्च यथा मूर्ध्ना तव देवि सुरेश्वरि
त्राहि मां पद्मपत्राक्षि सत्ये सत्या भवस्व नः
शरणं भव मे दुर्गे शरण्ये भक्तवत्सले
एवं स्तुता हि सा देवी दर्शयामास पाण्डवम्
उपगम्य तु राजानमिदं वचनमब्रवीत्
देव्युवाच
शृणु राजन्महाबाहो मदीयं वचनं प्रभो
भविष्यत्यचिरादेव सङ्ग्रामे विजयस्तव
मम प्रसादान्निर्जित्य हत्वा कौरववाहिनीम्
राज्यं निष्कण्टकं कृत्वा भोक्ष्यसे मेदिनीं पुनः
भ्रातृभिः सहितो राजन्प्रीतिं प्राप्स्यसि पुष्कलाम्
मत्प्रसादाच्च ते सौख्यमारोग्यं च भविष्यति
ये च सङ्कीर्तयिष्यन्ति लोके विगतकल्मषाः
तेषां तुष्टा प्रदास्यामि राज्यमायुर्वपुः सुतम्
प्रवासे नगरे वाऽपि सङ्ग्रामे शत्रुसङ्कटे
अटव्यां दुर्गकान्तारे सागरे गहने गिरौ
ये स्मरिष्यन्ति मां राजन् यथाऽहं भवता स्मृता
न तेषां दुर्लभं किञ्चिदस्मिन् लोके भविष्यति
इदं स्तोत्रवरं भक्त्या शृणुयाद्वा पठेत वा
तस्य सर्वाणि कार्याणि सिद्धिं यास्यन्ति पाण्डवाः
मत्प्रसादाच्च वः सर्वान्विराटनगरे स्थितान्
न प्रज्ञास्यन्ति कुरवो नरा वा तन्निवासिनः
इत्युक्त्वा वरदा देवी युधिष्ठिरमरिन्दमम्
रक्षां कृत्वा च पाण्डूनां तत्रैवान्तरधीयत
॥इति श्रीमन्महाभारते विराटपर्वणि पाण्डवप्रवेशपर्वणि अष्टमोऽध्यायः॥
దుర్గాస్తోత్రమ్ (యుధిష్ఠిరకృతమ్)
వైశమ్పాయన ఉవాచ
విరాటనగరం రమ్యం గచ్ఛమానో యుధిష్ఠిరః
అస్తువన్మనసా దేవీం దుర్గాం త్రిభువనేశ్వరీమ్
యశోదాగర్భసమ్భూతాం నారాయణవరప్రియామ్
నన్దగోపకులే జాతాం మఙ్గల్యాం కులవర్ధనీమ్
కంసవిద్రావణకరీమసురాణాం క్షయఙ్కరీమ్
శిలాతటవినిక్షిప్తామాకాశం ప్రతి గామినీమ్
వాసుదేవస్య భగినీం దివ్యమాల్యవిభూషితామ్
దివ్యామ్బరధరాం దేవీం ఖడ్గఖేటకధారిణీమ్
భారావతరణే పుణ్యే యే స్మరన్తి సదా శివామ్
తాన్ వై తారయసే పాపాత్పఙ్కే గామివ దుర్బలామ్
స్తోతుం ప్రచక్రమే భూయో వివిధైః స్తోత్రసమ్భవైః
ఆమన్త్ర్య దర్శనాకాఙ్క్షీ రాజా దేవీం సహానుజః
నమోఽస్తు వరదే కృష్ణే కుమారి బ్రహ్మచారిణి
బాలార్కసదృశాకారే పూర్ణచన్ద్రనిభాననే
చతుర్భుజే చతుర్వక్త్రే పీనశ్రోణిపయోధరే
మయూరపిచ్ఛవలయే కేయూరాఙ్గదధారిణి
భాసి దేవి యథా పద్మా నారాయణపరిగ్రహః
స్వరూపం బ్రహ్మచర్యం చ విశదం తవ ఖేచరి
కృష్ణచ్ఛవిసమా కృష్ణా సఙ్కర్షణసమాననా
బిభ్రతీ విపులౌ బాహూ శక్రధ్వజసముచ్ఛ్రయౌ
పాత్రీ చ పఙ్కజీ ఘణ్టీ స్త్రీ విశుద్ధా చ యా భువి
పాశం ధనుర్మహాచక్రం వివిధాన్యాయుధాని చ
కుణ్డలాభ్యాం సుపూర్ణాభ్యాం కర్ణాభ్యాం చ విభూషితా
చన్ద్రవిస్పర్ధినా దేవి ముఖేన త్వం విరాజసే
ముకుటేన విచిత్రేణ కేశబన్ధేన శోభినా
భుజఙ్గాభోగవాసేన శ్రోణిసూత్రేణ రాజతా
విభ్రాజసే చాబద్ధేన భోగేనేవేహ మన్దరః
ధ్వజేన శిఖిపిచ్ఛానాముచ్ఛ్రితేన విరాజసే
కౌమారం వ్రతమాస్థాయ త్రిదివం పావితం త్వయా
తేన త్వం స్తూయసే దేవి త్రిదశైః పూజ్యసేఽపి చ
త్రైలోక్యరక్షణార్థాయ మహిషాసురనాశిని
ప్రసన్నా మే సురశ్రేష్ఠే దయాం కురు శివా భవ
జయా త్వం విజయా చైవ సఙ్గ్రామే చ జయప్రదా
మమాపి విజయం దేహి వరదా త్వం చ సామ్ప్రతమ్
విన్ధ్యే చైవ నగశ్రేష్ఠే తవ స్థానం హి శాశ్వతమ్
కాలి కాలి మహాకాలి శీధుమాంసపశుప్రియే
కృతానుయాత్రా భూతైస్త్వం వరదా కామచారిణీ
భారావతారే యే చ త్వాం సంస్మరిష్యన్తి మానవాః
ప్రణమన్తి చ యే త్వాం హి ప్రభాతే తు నరా భువి
న తేషాం దుర్లభం కిఞ్చిత్పుత్రతో ధనతోఽపి వా
దుర్గాత్తారయసే దుర్గే తత్ త్వం దుర్గా స్మృతా జనైః
కాన్తారేష్వవసన్నానాం మగ్నానాం చ మహార్ణవే
దస్యుభిర్వా నిరుద్ధానాం త్వం గతిః పరమా నృణామ్
జలప్రతరణే చైవ కాన్తారేష్వటవీషు చ
యే స్మరన్తి మహాదేవి న చ సీదన్తి తే నరాః
త్వం కీర్తిః శ్రీర్ధృతిః సిద్ధిర్హ్రీర్విద్యా సన్తతిర్మతిః
సన్ధ్యా రాత్రిః ప్రభా నిద్రా జ్యోత్స్నా కాన్తిః క్షమా దయా
నృణాం చ బన్ధనం మోహం పుత్రనాశం ధనక్షయమ్
వ్యాధిం మృత్యుం భయం చైవ పూజితా నాశయిష్యసి
సోఽహం రాజ్యాత్పరిభ్రష్టః శరణం త్వాం ప్రపన్నవాన్
ప్రణతశ్చ యథా మూర్ధ్నా తవ దేవి సురేశ్వరి
త్రాహి మాం పద్మపత్రాక్షి సత్యే సత్యా భవస్వ నః
శరణం భవ మే దుర్గే శరణ్యే భక్తవత్సలే
ఏవం స్తుతా హి సా దేవీ దర్శయామాస పాణ్డవమ్
ఉపగమ్య తు రాజానమిదం వచనమబ్రవీత్
దేవ్యువాచ
శృణు రాజన్మహాబాహో మదీయం వచనం ప్రభో
భవిష్యత్యచిరాదేవ సఙ్గ్రామే విజయస్తవ
మమ ప్రసాదాన్నిర్జిత్య హత్వా కౌరవవాహినీమ్
రాజ్యం నిష్కణ్టకం కృత్వా భోక్ష్యసే మేదినీం పునః
భ్రాతృభిః సహితో రాజన్ప్రీతిం ప్రాప్స్యసి పుష్కలామ్
మత్ప్రసాదాచ్చ తే సౌఖ్యమారోగ్యం చ భవిష్యతి
యే చ సఙ్కీర్తయిష్యన్తి లోకే విగతకల్మషాః
తేషాం తుష్టా ప్రదాస్యామి రాజ్యమాయుర్వపుః సుతమ్
ప్రవాసే నగరే వాఽపి సఙ్గ్రామే శత్రుసఙ్కటే
అటవ్యాం దుర్గకాన్తారే సాగరే గహనే గిరౌ
యే స్మరిష్యన్తి మాం రాజన్ యథాఽహం భవతా స్మృతా
న తేషాం దుర్లభం కిఞ్చిదస్మిన్ లోకే భవిష్యతి
ఇదం స్తోత్రవరం భక్త్యా శృణుయాద్వా పఠేత వా
తస్య సర్వాణి కార్యాణి సిద్ధిం యాస్యన్తి పాణ్డవాః
మత్ప్రసాదాచ్చ వః సర్వాన్విరాటనగరే స్థితాన్
న ప్రజ్ఞాస్యన్తి కురవో నరా వా తన్నివాసినః
ఇత్యుక్త్వా వరదా దేవీ యుధిష్ఠిరమరిన్దమమ్
రక్షాం కృత్వా చ పాణ్డూనాం తత్రైవాన్తరధీయత
॥ఇతి శ్రీమన్మహాభారతే విరాటపర్వణి పాణ్డవప్రవేశపర్వణి అష్టమోఽధ్యాయః॥
durgāstotram (yudhiṣṭhirakṛtam)
vaiśampāyana uvāca
virāṭanagaraṃ ramyaṃ gacchamāno yudhiṣṭhiraḥ
astuvanmanasā devīṃ durgāṃ tribhuvaneśvarīm
yaśodāgarbhasambhūtāṃ nārāyaṇavarapriyām
nandagopakule jātāṃ maṅgalyāṃ kulavardhanīm
kaṃsavidrāvaṇakarīmasurāṇāṃ kṣayaṅkarīm
śilātaṭavinikṣiptāmākāśaṃ prati gāminīm
vāsudevasya bhaginīṃ divyamālyavibhūṣitām
divyāmbaradharāṃ devīṃ khaḍgakheṭakadhāriṇīm
bhārāvataraṇe puṇye ye smaranti sadā śivām
tān vai tārayase pāpātpaṅke gāmiva durbalām
stotuṃ pracakrame bhūyo vividhaiḥ stotrasambhavaiḥ
āmantrya darśanākāṅkṣī rājā devīṃ sahānujaḥ
namo'stu varade kṛṣṇe kumāri brahmacāriṇi
bālārkasadṛśākāre pūrṇacandranibhānane
caturbhuje caturvaktre pīnaśroṇipayodhare
mayūrapicchavalaye keyūrāṅgadadhāriṇi
bhāsi devi yathā padmā nārāyaṇaparigrahaḥ
svarūpaṃ brahmacaryaṃ ca viśadaṃ tava khecari
kṛṣṇacchavisamā kṛṣṇā saṅkarṣaṇasamānanā
bibhratī vipulau bāhū śakradhvajasamucchrayau
pātrī ca paṅkajī ghaṇṭī strī viśuddhā ca yā bhuvi
pāśaṃ dhanurmahācakraṃ vividhānyāyudhāni ca
kuṇḍalābhyāṃ supūrṇābhyāṃ karṇābhyāṃ ca vibhūṣitā
candravispardhinā devi mukhena tvaṃ virājase
mukuṭena vicitreṇa keśabandhena śobhinā
bhujaṅgābhogavāsena śroṇisūtreṇa rājatā
vibhrājase cābaddhena bhogeneveha mandaraḥ
dhvajena śikhipicchānāmucchritena virājase
kaumāraṃ vratamāsthāya tridivaṃ pāvitaṃ tvayā
tena tvaṃ stūyase devi tridaśaiḥ pūjyase'pi ca
trailokyarakṣaṇārthāya mahiṣāsuranāśini
prasannā me suraśreṣṭhe dayāṃ kuru śivā bhava
jayā tvaṃ vijayā caiva saṅgrāme ca jayapradā
mamāpi vijayaṃ dehi varadā tvaṃ ca sāmpratam
vindhye caiva nagaśreṣṭhe tava sthānaṃ hi śāśvatam
kāli kāli mahākāli śīdhumāṃsapaśupriye
kṛtānuyātrā bhūtaistvaṃ varadā kāmacāriṇī
bhārāvatāre ye ca tvāṃ saṃsmariṣyanti mānavāḥ
praṇamanti ca ye tvāṃ hi prabhāte tu narā bhuvi
na teṣāṃ durlabhaṃ kiñcitputrato dhanato'pi vā
durgāttārayase durge tat tvaṃ durgā smṛtā janaiḥ
kāntāreṣvavasannānāṃ magnānāṃ ca mahārṇave
dasyubhirvā niruddhānāṃ tvaṃ gatiḥ paramā nṛṇām
jalaprataraṇe caiva kāntāreṣvaṭavīṣu ca
ye smaranti mahādevi na ca sīdanti te narāḥ
tvaṃ kīrtiḥ śrīrdhṛtiḥ siddhirhrīrvidyā santatirmatiḥ
sandhyā rātriḥ prabhā nidrā jyotsnā kāntiḥ kṣamā dayā
nṛṇāṃ ca bandhanaṃ mohaṃ putranāśaṃ dhanakṣayam
vyādhiṃ mṛtyuṃ bhayaṃ caiva pūjitā nāśayiṣyasi
so'haṃ rājyātparibhraṣṭaḥ śaraṇaṃ tvāṃ prapannavān
praṇataśca yathā mūrdhnā tava devi sureśvari
trāhi māṃ padmapatrākṣi satye satyā bhavasva naḥ
śaraṇaṃ bhava me durge śaraṇye bhaktavatsale
evaṃ stutā hi sā devī darśayāmāsa pāṇḍavam
upagamya tu rājānamidaṃ vacanamabravīt
devyuvāca
śṛṇu rājanmahābāho madīyaṃ vacanaṃ prabho
bhaviṣyatyacirādeva saṅgrāme vijayastava
mama prasādānnirjitya hatvā kauravavāhinīm
rājyaṃ niṣkaṇṭakaṃ kṛtvā bhokṣyase medinīṃ punaḥ
bhrātṛbhiḥ sahito rājanprītiṃ prāpsyasi puṣkalām
matprasādācca te saukhyamārogyaṃ ca bhaviṣyati
ye ca saṅkīrtayiṣyanti loke vigatakalmaṣāḥ
teṣāṃ tuṣṭā pradāsyāmi rājyamāyurvapuḥ sutam
pravāse nagare vā'pi saṅgrāme śatrusaṅkaṭe
aṭavyāṃ durgakāntāre sāgare gahane girau
ye smariṣyanti māṃ rājan yathā'haṃ bhavatā smṛtā
na teṣāṃ durlabhaṃ kiñcidasmin loke bhaviṣyati
idaṃ stotravaraṃ bhaktyā śṛṇuyādvā paṭheta vā
tasya sarvāṇi kāryāṇi siddhiṃ yāsyanti pāṇḍavāḥ
matprasādācca vaḥ sarvānvirāṭanagare sthitān
na prajñāsyanti kuravo narā vā tannivāsinaḥ
ityuktvā varadā devī yudhiṣṭhiramarindamam
rakṣāṃ kṛtvā ca pāṇḍūnāṃ tatraivāntaradhīyata
||iti śrīmanmahābhārate virāṭaparvaṇi pāṇḍavapraveśaparvaṇi aṣṭamo'dhyāyaḥ||