ब्रह्मकृतरामस्तवः
ततो हि दुर्मना रामः श्रुत्वैवं वदतां गिरः
दध्यौ मुहूर्तं धर्मात्मा बाष्पव्याकुललोचनः
ततो वैश्रवणो राजा यमश्च पितृभिः सह
सहस्राक्षश्च देवेशो वरुणश्च जलेश्वरः
षडर्धनयनः श्रीमान्महादेवो वृषध्वजः
कर्ता सर्वस्य लोकस्य ब्रह्मा ब्रह्मविदां वरः
एते सर्वे समागम्य विमानैः सूर्यसन्निभैः
आगम्य नगरीं लङ्काम् अभिजग्मुश्च राघवम्
ततः सहस्ताभरणान् प्रगृह्य विपुलान् भुजान्
अब्रुवंस्त्रिदशश्रेष्ठाः प्राञ्जलिं राघवं स्थितम्
कर्ता सर्वस्य लोकस्य श्रेष्ठो ज्ञानविदां विभुः
उपेक्षसे कथं सीतां पतन्तीं हव्यवाहने
कथं देवगणश्रेष्ठम् आत्मानं नावबुध्यसे
ऋतधामा वसुः पूर्वं वसूनां त्वं प्रजापतिः
त्रयाणां त्वं हि लोकानाम् आदिकर्ता स्वयम्प्रभुः
रुद्राणामष्टमो रुद्रः साध्यानामसि पञ्चमः
अश्विनौ चापि ते कर्णौ चन्द्रसूर्यौ च चक्षुषी
अन्ते चादौ च लोकानाम् दृश्यसे त्वं परन्तप
उपेक्षसे च वैदेहीं मानुषः प्राकृतो यथा
इत्युक्तो लोकपालैस्तैः स्वामी लोकस्य राघवः
अब्रवीत् त्रिदशश्रेष्ठान् रामो धर्मभृतां वरः
आत्मानं मानुषं मन्ये रामं दशरथात्मजम्
योऽहं यस्य यतश्चाहं भगवांस्तद् ब्रवीतु मे
इति ब्रुवन्तं काकुत्स्थं ब्रह्मा ब्रह्मविदां वरः
अब्रवीच्छृणु मे राम सत्यं सत्यपराक्रम
भवान् नारायणो देवः श्रीमांश्चक्रायुधः प्रभुः
एकशृङ्गो वराहस्त्वं भूतभव्यसपत्नजित्
अक्षरं ब्रह्म सत्यं च मध्ये चान्ते च राघव
लोकानां त्वं परो धर्मो विष्वक्सेनश्चतुर्भुजः
शार्ङ्गधन्वा हृषीकेशः पुरुषः पुरुषोत्तमः
अजितः खड्गधृद् विष्णुः कृष्णश्चैव सनातनः
सेनानीर्ग्रामणीश्च त्वं बुद्धिः सत्त्वं क्षमा दमः
प्रभवश्चाप्ययश्च त्वम् उपेन्द्रो मधुसूदनः
इन्द्रकर्मा महेन्द्रस्त्वं पद्मनाभो रणान्तकृत्
शरण्यं शरणं च त्वाम् आहुर्दिव्या महर्षयः
सहस्रशृङ्गो वेदात्मा शतशीर्षो महर्षभः
त्वं त्रयाणां हि लोकानाम् आदिकर्ता स्वयम्प्रभुः
सिद्धानामपि साध्यानाम् आश्रयश्चासि पूर्वजः
त्वं यज्ञस्त्वं वषट्कारस्त्वमोङ्कारः परात्परः
प्रभवं निधनं वा ते नो विदुः को भवानिति
दृश्यसे सर्वभूतेषु ब्राह्मणेषु च गोषु च
दिक्षु सर्वासु गगने पर्वतेषु वनेषु च
सहस्रचरणः श्रीमान् शतशीर्षः सहस्रदृक्
त्वं धारयसि भूतानि पृथिवीं च सपर्वताम्
अन्ते पृथिव्याः सलिले दृश्यसे त्वं महोरगः
त्रीन् लोकान् धारयन् राम देवगन्धर्वदानवान्
अहं ते हृदयं राम जिह्वा देवी सरस्वती
देवा गात्रेषु रोमाणि ब्रह्मणा निर्मिताः प्रभो
निमेषस्ते भवेद् रात्रिरुन्मेषस्ते भवेद् दिवा
संस्कारास्तेऽभवन् वेदा न तदस्ति त्वया विना
जगत् सर्वं शरीरं ते स्थैर्यं ते वसुधातलम्
अग्निः कोपः प्रसादस्ते सोमः श्रीवत्सलक्षणः
त्वया लोकास्त्रयः क्रान्ताः पुरा स्वैर्विक्रमैस्त्रिभिः
महेन्द्रश्च कृतो राजा बलिं बद्ध्वा महासुरम्
सीता लक्ष्मीर्भवान् विष्णुः देवः कृष्णः प्रजापतिः
वधार्थं रावणस्येह प्रविष्टो मानुषीं तनुम्
तदिदं नः कृतं कार्यं त्वया धर्मभृतां वर
निहतो रावणो राम प्रहृष्टो दिवमाक्रम
अमोघं बलवीर्यं ते अमोघस्ते पराक्रमः
अमोघं दर्शनं राम अमोघस्तव संस्तवः
अमोघास्ते भविष्यन्ति भक्तिमन्तो नरा भुवि
ये त्वां देवं ध्रुवं भक्ताः पुराणं पुरुषोत्तमम्
प्राप्नुवन्ति सदा कामान् इह लोके परत्र च
इममार्षं स्तवं नित्यम् इतिहासं पुरातनम्
ये नराः कीर्तयिष्यन्ति तेषां नास्ति पराभवः
॥इत्यार्षे श्रीमद्रामायणे वाल्मीकीये आदिकाव्ये चतुर्विंशतिसहस्रिकायां संहितायां युद्धकाण्डे ब्रह्मकृतरामस्तवो नाम विंशत्यधिकशततमः सर्गः॥
బ్రహ్మకృతరామస్తవః
తతో హి దుర్మనా రామః శ్రుత్వైవం వదతాం గిరః
దధ్యౌ ముహూర్తం ధర్మాత్మా బాష్పవ్యాకులలోచనః
తతో వైశ్రవణో రాజా యమశ్చ పితృభిః సహ
సహస్రాక్షశ్చ దేవేశో వరుణశ్చ జలేశ్వరః
షడర్ధనయనః శ్రీమాన్మహాదేవో వృషధ్వజః
కర్తా సర్వస్య లోకస్య బ్రహ్మా బ్రహ్మవిదాం వరః
ఏతే సర్వే సమాగమ్య విమానైః సూర్యసన్నిభైః
ఆగమ్య నగరీం లఙ్కామ్ అభిజగ్ముశ్చ రాఘవమ్
తతః సహస్తాభరణాన్ ప్రగృహ్య విపులాన్ భుజాన్
అబ్రువంస్త్రిదశశ్రేష్ఠాః ప్రాఞ్జలిం రాఘవం స్థితమ్
కర్తా సర్వస్య లోకస్య శ్రేష్ఠో జ్ఞానవిదాం విభుః
ఉపేక్షసే కథం సీతాం పతన్తీం హవ్యవాహనే
కథం దేవగణశ్రేష్ఠమ్ ఆత్మానం నావబుధ్యసే
ఋతధామా వసుః పూర్వం వసూనాం త్వం ప్రజాపతిః
త్రయాణాం త్వం హి లోకానామ్ ఆదికర్తా స్వయమ్ప్రభుః
రుద్రాణామష్టమో రుద్రః సాధ్యానామసి పఞ్చమః
అశ్వినౌ చాపి తే కర్ణౌ చన్ద్రసూర్యౌ చ చక్షుషీ
అన్తే చాదౌ చ లోకానామ్ దృశ్యసే త్వం పరన్తప
ఉపేక్షసే చ వైదేహీం మానుషః ప్రాకృతో యథా
ఇత్యుక్తో లోకపాలైస్తైః స్వామీ లోకస్య రాఘవః
అబ్రవీత్ త్రిదశశ్రేష్ఠాన్ రామో ధర్మభృతాం వరః
ఆత్మానం మానుషం మన్యే రామం దశరథాత్మజమ్
యోఽహం యస్య యతశ్చాహం భగవాంస్తద్ బ్రవీతు మే
ఇతి బ్రువన్తం కాకుత్స్థం బ్రహ్మా బ్రహ్మవిదాం వరః
అబ్రవీచ్ఛృణు మే రామ సత్యం సత్యపరాక్రమ
భవాన్ నారాయణో దేవః శ్రీమాంశ్చక్రాయుధః ప్రభుః
ఏకశృఙ్గో వరాహస్త్వం భూతభవ్యసపత్నజిత్
అక్షరం బ్రహ్మ సత్యం చ మధ్యే చాన్తే చ రాఘవ
లోకానాం త్వం పరో ధర్మో విష్వక్సేనశ్చతుర్భుజః
శార్ఙ్గధన్వా హృషీకేశః పురుషః పురుషోత్తమః
అజితః ఖడ్గధృద్ విష్ణుః కృష్ణశ్చైవ సనాతనః
సేనానీర్గ్రామణీశ్చ త్వం బుద్ధిః సత్త్వం క్షమా దమః
ప్రభవశ్చాప్యయశ్చ త్వమ్ ఉపేన్ద్రో మధుసూదనః
ఇన్ద్రకర్మా మహేన్ద్రస్త్వం పద్మనాభో రణాన్తకృత్
శరణ్యం శరణం చ త్వామ్ ఆహుర్దివ్యా మహర్షయః
సహస్రశృఙ్గో వేదాత్మా శతశీర్షో మహర్షభః
త్వం త్రయాణాం హి లోకానామ్ ఆదికర్తా స్వయమ్ప్రభుః
సిద్ధానామపి సాధ్యానామ్ ఆశ్రయశ్చాసి పూర్వజః
త్వం యజ్ఞస్త్వం వషట్కారస్త్వమోఙ్కారః పరాత్పరః
ప్రభవం నిధనం వా తే నో విదుః కో భవానితి
దృశ్యసే సర్వభూతేషు బ్రాహ్మణేషు చ గోషు చ
దిక్షు సర్వాసు గగనే పర్వతేషు వనేషు చ
సహస్రచరణః శ్రీమాన్ శతశీర్షః సహస్రదృక్
త్వం ధారయసి భూతాని పృథివీం చ సపర్వతామ్
అన్తే పృథివ్యాః సలిలే దృశ్యసే త్వం మహోరగః
త్రీన్ లోకాన్ ధారయన్ రామ దేవగన్ధర్వదానవాన్
అహం తే హృదయం రామ జిహ్వా దేవీ సరస్వతీ
దేవా గాత్రేషు రోమాణి బ్రహ్మణా నిర్మితాః ప్రభో
నిమేషస్తే భవేద్ రాత్రిరున్మేషస్తే భవేద్ దివా
సంస్కారాస్తేఽభవన్ వేదా న తదస్తి త్వయా వినా
జగత్ సర్వం శరీరం తే స్థైర్యం తే వసుధాతలమ్
అగ్నిః కోపః ప్రసాదస్తే సోమః శ్రీవత్సలక్షణః
త్వయా లోకాస్త్రయః క్రాన్తాః పురా స్వైర్విక్రమైస్త్రిభిః
మహేన్ద్రశ్చ కృతో రాజా బలిం బద్ధ్వా మహాసురమ్
సీతా లక్ష్మీర్భవాన్ విష్ణుః దేవః కృష్ణః ప్రజాపతిః
వధార్థం రావణస్యేహ ప్రవిష్టో మానుషీం తనుమ్
తదిదం నః కృతం కార్యం త్వయా ధర్మభృతాం వర
నిహతో రావణో రామ ప్రహృష్టో దివమాక్రమ
అమోఘం బలవీర్యం తే అమోఘస్తే పరాక్రమః
అమోఘం దర్శనం రామ అమోఘస్తవ సంస్తవః
అమోఘాస్తే భవిష్యన్తి భక్తిమన్తో నరా భువి
యే త్వాం దేవం ధ్రువం భక్తాః పురాణం పురుషోత్తమమ్
ప్రాప్నువన్తి సదా కామాన్ ఇహ లోకే పరత్ర చ
ఇమమార్షం స్తవం నిత్యమ్ ఇతిహాసం పురాతనమ్
యే నరాః కీర్తయిష్యన్తి తేషాం నాస్తి పరాభవః
॥ఇత్యార్షే శ్రీమద్రామాయణే వాల్మీకీయే ఆదికావ్యే చతుర్వింశతిసహస్రికాయాం సంహితాయాం యుద్ధకాణ్డే బ్రహ్మకృతరామస్తవో నామ వింశత్యధికశతతమః సర్గః॥
brahmakṛtarāmastavaḥ
tato hi durmanā rāmaḥ śrutvaivaṃ vadatāṃ giraḥ
dadhyau muhūrtaṃ dharmātmā bāṣpavyākulalocanaḥ
tato vaiśravaṇo rājā yamaśca pitṛbhiḥ saha
sahasrākṣaśca deveśo varuṇaśca jaleśvaraḥ
ṣaḍardhanayanaḥ śrīmānmahādevo vṛṣadhvajaḥ
kartā sarvasya lokasya brahmā brahmavidāṃ varaḥ
ete sarve samāgamya vimānaiḥ sūryasannibhaiḥ
āgamya nagarīṃ laṅkām abhijagmuśca rāghavam
tataḥ sahastābharaṇān pragṛhya vipulān bhujān
abruvaṃstridaśaśreṣṭhāḥ prāñjaliṃ rāghavaṃ sthitam
kartā sarvasya lokasya śreṣṭho jñānavidāṃ vibhuḥ
upekṣase kathaṃ sītāṃ patantīṃ havyavāhane
kathaṃ devagaṇaśreṣṭham ātmānaṃ nāvabudhyase
ṛtadhāmā vasuḥ pūrvaṃ vasūnāṃ tvaṃ prajāpatiḥ
trayāṇāṃ tvaṃ hi lokānām ādikartā svayamprabhuḥ
rudrāṇāmaṣṭamo rudraḥ sādhyānāmasi pañcamaḥ
aśvinau cāpi te karṇau candrasūryau ca cakṣuṣī
ante cādau ca lokānām dṛśyase tvaṃ parantapa
upekṣase ca vaidehīṃ mānuṣaḥ prākṛto yathā
ityukto lokapālaistaiḥ svāmī lokasya rāghavaḥ
abravīt tridaśaśreṣṭhān rāmo dharmabhṛtāṃ varaḥ
ātmānaṃ mānuṣaṃ manye rāmaṃ daśarathātmajam
yo'haṃ yasya yataścāhaṃ bhagavāṃstad bravītu me
iti bruvantaṃ kākutsthaṃ brahmā brahmavidāṃ varaḥ
abravīcchṛṇu me rāma satyaṃ satyaparākrama
bhavān nārāyaṇo devaḥ śrīmāṃścakrāyudhaḥ prabhuḥ
ekaśṛṅgo varāhastvaṃ bhūtabhavyasapatnajit
akṣaraṃ brahma satyaṃ ca madhye cānte ca rāghava
lokānāṃ tvaṃ paro dharmo viṣvaksenaścaturbhujaḥ
śārṅgadhanvā hṛṣīkeśaḥ puruṣaḥ puruṣottamaḥ
ajitaḥ khaḍgadhṛd viṣṇuḥ kṛṣṇaścaiva sanātanaḥ
senānīrgrāmaṇīśca tvaṃ buddhiḥ sattvaṃ kṣamā damaḥ
prabhavaścāpyayaśca tvam upendro madhusūdanaḥ
indrakarmā mahendrastvaṃ padmanābho raṇāntakṛt
śaraṇyaṃ śaraṇaṃ ca tvām āhurdivyā maharṣayaḥ
sahasraśṛṅgo vedātmā śataśīrṣo maharṣabhaḥ
tvaṃ trayāṇāṃ hi lokānām ādikartā svayamprabhuḥ
siddhānāmapi sādhyānām āśrayaścāsi pūrvajaḥ
tvaṃ yajñastvaṃ vaṣaṭkārastvamoṅkāraḥ parātparaḥ
prabhavaṃ nidhanaṃ vā te no viduḥ ko bhavāniti
dṛśyase sarvabhūteṣu brāhmaṇeṣu ca goṣu ca
dikṣu sarvāsu gagane parvateṣu vaneṣu ca
sahasracaraṇaḥ śrīmān śataśīrṣaḥ sahasradṛk
tvaṃ dhārayasi bhūtāni pṛthivīṃ ca saparvatām
ante pṛthivyāḥ salile dṛśyase tvaṃ mahoragaḥ
trīn lokān dhārayan rāma devagandharvadānavān
ahaṃ te hṛdayaṃ rāma jihvā devī sarasvatī
devā gātreṣu romāṇi brahmaṇā nirmitāḥ prabho
nimeṣaste bhaved rātrirunmeṣaste bhaved divā
saṃskārāste'bhavan vedā na tadasti tvayā vinā
jagat sarvaṃ śarīraṃ te sthairyaṃ te vasudhātalam
agniḥ kopaḥ prasādaste somaḥ śrīvatsalakṣaṇaḥ
tvayā lokāstrayaḥ krāntāḥ purā svairvikramaistribhiḥ
mahendraśca kṛto rājā baliṃ baddhvā mahāsuram
sītā lakṣmīrbhavān viṣṇuḥ devaḥ kṛṣṇaḥ prajāpatiḥ
vadhārthaṃ rāvaṇasyeha praviṣṭo mānuṣīṃ tanum
tadidaṃ naḥ kṛtaṃ kāryaṃ tvayā dharmabhṛtāṃ vara
nihato rāvaṇo rāma prahṛṣṭo divamākrama
amoghaṃ balavīryaṃ te amoghaste parākramaḥ
amoghaṃ darśanaṃ rāma amoghastava saṃstavaḥ
amoghāste bhaviṣyanti bhaktimanto narā bhuvi
ye tvāṃ devaṃ dhruvaṃ bhaktāḥ purāṇaṃ puruṣottamam
prāpnuvanti sadā kāmān iha loke paratra ca
imamārṣaṃ stavaṃ nityam itihāsaṃ purātanam
ye narāḥ kīrtayiṣyanti teṣāṃ nāsti parābhavaḥ
||ityārṣe śrīmadrāmāyaṇe vālmīkīye ādikāvye caturviṃśatisahasrikāyāṃ saṃhitāyāṃ yuddhakāṇḍe brahmakṛtarāmastavo nāma viṃśatyadhikaśatatamaḥ sargaḥ||