नारद-राम-संवादः
श्री-महादेव उवाच
एकदा सुखमासीनं रामं स्वान्तःपुराजिरे
सर्वाभरणसम्पन्नं रत्नसिंहासने स्थितम्
नीलोत्पलदलश्यामं कौस्तुभामुक्तकन्धरम्
सीतया रत्नदण्डेन चामरेणाथ वीजितम्
विनोदयन्तं ताम्बूलचर्वणादिभिरादरात्
नारदोऽवतरद्द्रष्टुमम्बराद्यत्र राघवः
शुद्धस्फटिकसङ्काशः शरच्चन्द्र इवामलः
अतर्कितमुपायातो नारदो दिव्यदर्शनः
तं दृष्ट्वा सहसोत्थाय रामः प्रीत्या कृताञ्जलिः
ननाम शिरसा भूमौ सीतया सह भक्तिमान्
उवाच नारदं रामः प्रीत्या परमया युतः
संसारिणां मुनिश्रेष्ठ दुर्लभं तव दर्शनम्
अस्माकं विषयासक्तचेतसां नितरां मुने
अवाप्तं मे पूर्वजन्मकृतपुण्यमहोदयैः
संसारिणाऽपि हि मुने लभ्यते सत्समागमः
अतस्त्वद्दर्शनादेव कृतार्थोऽस्मि मुनीश्वर
किं कार्यं ते मया कार्यं ब्रूहि तत्करवाणि भोः
अथ तं नारदोऽप्याह राघवं भक्तवत्सलम्
किं मोहयसि मां राम वाक्यैर्लोकानुसारिभिः
संसार्यहमिति प्रोक्तं सत्यमेतत्त्वया विभो
जगतामादिभूता या सा माया गृहिणी तव
त्वत्सन्निकर्षाज्जायन्ते तस्यां ब्रह्मादयः प्रजाः
त्वदाश्रया सदा भाति माया या त्रिगुणात्मिका
सूतेऽजस्रं शुक्लकृष्णलोहिताः सर्वदा प्रजाः
लोकत्रयमहागेहे गृहस्थस्त्वमुदाहृतः
त्वं विष्णुर्जानकी लक्ष्मीः शिवस्त्वं जानकी शिवा
ब्रह्मा त्वं जानकी वाणी सूर्यस्त्वं जानकी प्रभा
भवान् शशाङ्कः सीता तु रोहिणी शुभलक्षणा
शक्रस्त्वमेव पौलोमी सीता स्वाहानलो भवान्
यमस्त्वं कालरूपश्च सीता संयमिनी प्रभो
निरृतिस्त्वं जगन्नाथ तामसी जानकी शुभा
राम त्वमेव वरुणो भार्गवी जानकी शुभा
वायुस्त्वं राम सीता तु सदागतिरितीरिता
कुबेरस्त्वं राम सीता सर्वसम्पत्प्रकीर्तिता
रुद्राणी जानकी प्रोक्ता रुद्रस्त्वं लोकनाशकृत्
लोके स्त्रीवाचकं यावत्तत्सर्वं जानकी शुभा
पुन्नामवाचकं यावत्तत्सर्वं त्वं हि राघव
तस्माल्लोकत्रये देव युवाभ्यां नास्ति किञ्चन
त्वदाभासोदिताज्ञानमव्याकृतमितीर्यते
तस्मान्महान्स्ततः सूत्रं लिङ्गं सर्वात्मकं ततः
अहङ्कारश्च बुद्धिश्च पञ्चप्राणेन्द्रियाणि च
लिङ्गमित्युच्यते प्राज्ञैर्जन्ममृत्युसुखादिमत्
स एव जीवसंज्ञश्च लोके भाति जगन्मयः
अवाच्यानाद्यविद्यैव कारणोपाधिरुच्यते
स्थूलं सूक्ष्मं कारणाख्यमुपाधित्रितयं चितेः
एतैर्विशिष्टो जीवः स्याद्वियुक्तः परमेश्वरः
जाग्रत्स्वप्नसुषुप्त्याख्या संसृतिर्या प्रवर्तते
तस्या विलक्षणः साक्षी चिन्मात्रस्त्वं रघूत्तम
त्वत्त एव जगज्जातं त्वयि सर्वं प्रतिष्ठितम्
त्वय्येव लीयते कृत्स्नं तस्मात्त्वं सर्वकारणम्
रज्जावहिमिवात्मानं जीवं ज्ञात्वा भयं भवेत्
परात्माहमिति ज्ञात्वा भयदुःखैर्विमुच्यते
चिन्मात्रज्योतिषा सर्वाः सर्वदेहेषु बुद्धयः
त्वया यस्मात्प्रकाश्यन्ते सर्वस्यात्मा ततो भवान्
अज्ञानान्न्यस्यते सर्वं त्वयि रज्जौ भुजङ्गवत्
त्वत्पादभक्तियुक्तानां विज्ञानं भवति क्रमात्
तस्मात्त्वद्भक्तियुक्ता ये मुक्तिभाजस्त एव हि
अहं त्वद्भक्तभक्तानां तद्भक्तानां च किङ्करः
अतो मामनुगृह्णीष्व मोहयस्व न मां प्रभो
त्वन्नाभिकमलोत्पन्नो ब्रह्मा मे जनकः प्रभो
अतस्तवाहं पौत्रोऽस्मि भक्तं मां पाहि राघव
इत्युक्त्वा बहुशो नत्वा स्वानन्दाश्रुपरिप्लुतः
उवाच वचनं राम ब्रह्मणा नोदितोऽस्म्यहम्
रावणस्य वधार्थाय जातोऽसि रघुसत्तम
इदानीं राज्यरक्षार्थं पिता त्वामभिषेक्ष्यति
यदि राज्याभिसंसक्तो रावणं न हनिष्यसि
प्रतिज्ञा ते कृता राम भूभारहरणाय वै
तत्सत्यं कुरु राजेन्द्र सत्यसन्धस्त्वमेव हि
श्रुत्वैतद्गदितं रामो नारदं प्राह सस्मितम्
शृणु नारद मे किञ्चिद्विद्यतेऽविदितं क्वचित्
प्रतिज्ञातं च यत्पूर्वं करिष्ये तन्न संशयः
किन्तु कालानुरोधेन तत्तत्प्रारब्धसङ्क्षयात्
हरिष्ये सर्वभूभारं क्रमेणासुरमण्डलम्
रावणस्य विनाशार्थं श्वो गन्ता दण्डकाननम्
चतुर्दश समास्तत्र ह्युषित्वा मुनिवेषधृक्
सीतामिषेण तं दुष्टं सकुलं नाशयाम्यहम्
एवं रामे प्रतिज्ञाते नारदः प्रमुमोद ह
प्रदक्षिणत्रयं कृत्वा दण्डवत्प्रणिपत्य तम्
अनुज्ञातश्च रामेण ययौ देवगतिं मुनिः
संवादं पठति शृणोति संस्मरेद्वा
यो नित्यं मुनिवररामयोः सभक्त्या
सम्प्राप्नोत्यमरसुदुर्लभं विमोक्षं
कैवल्यं विरतिपुरःसरं क्रमेण
॥इति श्रीमदध्यात्मरामायणे उमामहेश्वरसंवादे
अयोध्याकाण्डे प्रथमः सर्गे नारद-राम-संवादः सम्पूर्णः॥
నారద-రామ-సంవాదః
శ్రీ-మహాదేవ ఉవాచ
ఏకదా సుఖమాసీనం రామం స్వాన్తఃపురాజిరే
సర్వాభరణసమ్పన్నం రత్నసింహాసనే స్థితమ్
నీలోత్పలదలశ్యామం కౌస్తుభాముక్తకన్ధరమ్
సీతయా రత్నదణ్డేన చామరేణాథ వీజితమ్
వినోదయన్తం తామ్బూలచర్వణాదిభిరాదరాత్
నారదోఽవతరద్ద్రష్టుమమ్బరాద్యత్ర రాఘవః
శుద్ధస్ఫటికసఙ్కాశః శరచ్చన్ద్ర ఇవామలః
అతర్కితముపాయాతో నారదో దివ్యదర్శనః
తం దృష్ట్వా సహసోత్థాయ రామః ప్రీత్యా కృతాఞ్జలిః
ననామ శిరసా భూమౌ సీతయా సహ భక్తిమాన్
ఉవాచ నారదం రామః ప్రీత్యా పరమయా యుతః
సంసారిణాం మునిశ్రేష్ఠ దుర్లభం తవ దర్శనమ్
అస్మాకం విషయాసక్తచేతసాం నితరాం మునే
అవాప్తం మే పూర్వజన్మకృతపుణ్యమహోదయైః
సంసారిణాఽపి హి మునే లభ్యతే సత్సమాగమః
అతస్త్వద్దర్శనాదేవ కృతార్థోఽస్మి మునీశ్వర
కిం కార్యం తే మయా కార్యం బ్రూహి తత్కరవాణి భోః
అథ తం నారదోఽప్యాహ రాఘవం భక్తవత్సలమ్
కిం మోహయసి మాం రామ వాక్యైర్లోకానుసారిభిః
సంసార్యహమితి ప్రోక్తం సత్యమేతత్త్వయా విభో
జగతామాదిభూతా యా సా మాయా గృహిణీ తవ
త్వత్సన్నికర్షాజ్జాయన్తే తస్యాం బ్రహ్మాదయః ప్రజాః
త్వదాశ్రయా సదా భాతి మాయా యా త్రిగుణాత్మికా
సూతేఽజస్రం శుక్లకృష్ణలోహితాః సర్వదా ప్రజాః
లోకత్రయమహాగేహే గృహస్థస్త్వముదాహృతః
త్వం విష్ణుర్జానకీ లక్ష్మీః శివస్త్వం జానకీ శివా
బ్రహ్మా త్వం జానకీ వాణీ సూర్యస్త్వం జానకీ ప్రభా
భవాన్ శశాఙ్కః సీతా తు రోహిణీ శుభలక్షణా
శక్రస్త్వమేవ పౌలోమీ సీతా స్వాహానలో భవాన్
యమస్త్వం కాలరూపశ్చ సీతా సంయమినీ ప్రభో
నిరృతిస్త్వం జగన్నాథ తామసీ జానకీ శుభా
రామ త్వమేవ వరుణో భార్గవీ జానకీ శుభా
వాయుస్త్వం రామ సీతా తు సదాగతిరితీరితా
కుబేరస్త్వం రామ సీతా సర్వసమ్పత్ప్రకీర్తితా
రుద్రాణీ జానకీ ప్రోక్తా రుద్రస్త్వం లోకనాశకృత్
లోకే స్త్రీవాచకం యావత్తత్సర్వం జానకీ శుభా
పున్నామవాచకం యావత్తత్సర్వం త్వం హి రాఘవ
తస్మాల్లోకత్రయే దేవ యువాభ్యాం నాస్తి కిఞ్చన
త్వదాభాసోదితాజ్ఞానమవ్యాకృతమితీర్యతే
తస్మాన్మహాన్స్తతః సూత్రం లిఙ్గం సర్వాత్మకం తతః
అహఙ్కారశ్చ బుద్ధిశ్చ పఞ్చప్రాణేన్ద్రియాణి చ
లిఙ్గమిత్యుచ్యతే ప్రాజ్ఞైర్జన్మమృత్యుసుఖాదిమత్
స ఏవ జీవసంజ్ఞశ్చ లోకే భాతి జగన్మయః
అవాచ్యానాద్యవిద్యైవ కారణోపాధిరుచ్యతే
స్థూలం సూక్ష్మం కారణాఖ్యముపాధిత్రితయం చితేః
ఏతైర్విశిష్టో జీవః స్యాద్వియుక్తః పరమేశ్వరః
జాగ్రత్స్వప్నసుషుప్త్యాఖ్యా సంసృతిర్యా ప్రవర్తతే
తస్యా విలక్షణః సాక్షీ చిన్మాత్రస్త్వం రఘూత్తమ
త్వత్త ఏవ జగజ్జాతం త్వయి సర్వం ప్రతిష్ఠితమ్
త్వయ్యేవ లీయతే కృత్స్నం తస్మాత్త్వం సర్వకారణమ్
రజ్జావహిమివాత్మానం జీవం జ్ఞాత్వా భయం భవేత్
పరాత్మాహమితి జ్ఞాత్వా భయదుఃఖైర్విముచ్యతే
చిన్మాత్రజ్యోతిషా సర్వాః సర్వదేహేషు బుద్ధయః
త్వయా యస్మాత్ప్రకాశ్యన్తే సర్వస్యాత్మా తతో భవాన్
అజ్ఞానాన్న్యస్యతే సర్వం త్వయి రజ్జౌ భుజఙ్గవత్
త్వత్పాదభక్తియుక్తానాం విజ్ఞానం భవతి క్రమాత్
తస్మాత్త్వద్భక్తియుక్తా యే ముక్తిభాజస్త ఏవ హి
అహం త్వద్భక్తభక్తానాం తద్భక్తానాం చ కిఙ్కరః
అతో మామనుగృహ్ణీష్వ మోహయస్వ న మాం ప్రభో
త్వన్నాభికమలోత్పన్నో బ్రహ్మా మే జనకః ప్రభో
అతస్తవాహం పౌత్రోఽస్మి భక్తం మాం పాహి రాఘవ
ఇత్యుక్త్వా బహుశో నత్వా స్వానన్దాశ్రుపరిప్లుతః
ఉవాచ వచనం రామ బ్రహ్మణా నోదితోఽస్మ్యహమ్
రావణస్య వధార్థాయ జాతోఽసి రఘుసత్తమ
ఇదానీం రాజ్యరక్షార్థం పితా త్వామభిషేక్ష్యతి
యది రాజ్యాభిసంసక్తో రావణం న హనిష్యసి
ప్రతిజ్ఞా తే కృతా రామ భూభారహరణాయ వై
తత్సత్యం కురు రాజేన్ద్ర సత్యసన్ధస్త్వమేవ హి
శ్రుత్వైతద్గదితం రామో నారదం ప్రాహ సస్మితమ్
శృణు నారద మే కిఞ్చిద్విద్యతేఽవిదితం క్వచిత్
ప్రతిజ్ఞాతం చ యత్పూర్వం కరిష్యే తన్న సంశయః
కిన్తు కాలానురోధేన తత్తత్ప్రారబ్ధసఙ్క్షయాత్
హరిష్యే సర్వభూభారం క్రమేణాసురమణ్డలమ్
రావణస్య వినాశార్థం శ్వో గన్తా దణ్డకాననమ్
చతుర్దశ సమాస్తత్ర హ్యుషిత్వా మునివేషధృక్
సీతామిషేణ తం దుష్టం సకులం నాశయామ్యహమ్
ఏవం రామే ప్రతిజ్ఞాతే నారదః ప్రముమోద హ
ప్రదక్షిణత్రయం కృత్వా దణ్డవత్ప్రణిపత్య తమ్
అనుజ్ఞాతశ్చ రామేణ యయౌ దేవగతిం మునిః
సంవాదం పఠతి శృణోతి సంస్మరేద్వా
యో నిత్యం మునివరరామయోః సభక్త్యా
సమ్ప్రాప్నోత్యమరసుదుర్లభం విమోక్షం
కైవల్యం విరతిపురఃసరం క్రమేణ
॥ఇతి శ్రీమదధ్యాత్మరామాయణే ఉమామహేశ్వరసంవాదే
అయోధ్యాకాణ్డే ప్రథమః సర్గే నారద-రామ-సంవాదః సమ్పూర్ణః॥
nārada-rāma-saṃvādaḥ
śrī-mahādeva uvāca
ekadā sukhamāsīnaṃ rāmaṃ svāntaḥpurājire
sarvābharaṇasampannaṃ ratnasiṃhāsane sthitam
nīlotpaladalaśyāmaṃ kaustubhāmuktakandharam
sītayā ratnadaṇḍena cāmareṇātha vījitam
vinodayantaṃ tāmbūlacarvaṇādibhirādarāt
nārado'vataraddraṣṭumambarādyatra rāghavaḥ
śuddhasphaṭikasaṅkāśaḥ śaraccandra ivāmalaḥ
atarkitamupāyāto nārado divyadarśanaḥ
taṃ dṛṣṭvā sahasotthāya rāmaḥ prītyā kṛtāñjaliḥ
nanāma śirasā bhūmau sītayā saha bhaktimān
uvāca nāradaṃ rāmaḥ prītyā paramayā yutaḥ
saṃsāriṇāṃ muniśreṣṭha durlabhaṃ tava darśanam
asmākaṃ viṣayāsaktacetasāṃ nitarāṃ mune
avāptaṃ me pūrvajanmakṛtapuṇyamahodayaiḥ
saṃsāriṇā'pi hi mune labhyate satsamāgamaḥ
atastvaddarśanādeva kṛtārtho'smi munīśvara
kiṃ kāryaṃ te mayā kāryaṃ brūhi tatkaravāṇi bhoḥ
atha taṃ nārado'pyāha rāghavaṃ bhaktavatsalam
kiṃ mohayasi māṃ rāma vākyairlokānusāribhiḥ
saṃsāryahamiti proktaṃ satyametattvayā vibho
jagatāmādibhūtā yā sā māyā gṛhiṇī tava
tvatsannikarṣājjāyante tasyāṃ brahmādayaḥ prajāḥ
tvadāśrayā sadā bhāti māyā yā triguṇātmikā
sūte'jasraṃ śuklakṛṣṇalohitāḥ sarvadā prajāḥ
lokatrayamahāgehe gṛhasthastvamudāhṛtaḥ
tvaṃ viṣṇurjānakī lakṣmīḥ śivastvaṃ jānakī śivā
brahmā tvaṃ jānakī vāṇī sūryastvaṃ jānakī prabhā
bhavān śaśāṅkaḥ sītā tu rohiṇī śubhalakṣaṇā
śakrastvameva paulomī sītā svāhānalo bhavān
yamastvaṃ kālarūpaśca sītā saṃyaminī prabho
nirṛtistvaṃ jagannātha tāmasī jānakī śubhā
rāma tvameva varuṇo bhārgavī jānakī śubhā
vāyustvaṃ rāma sītā tu sadāgatiritīritā
kuberastvaṃ rāma sītā sarvasampatprakīrtitā
rudrāṇī jānakī proktā rudrastvaṃ lokanāśakṛt
loke strīvācakaṃ yāvattatsarvaṃ jānakī śubhā
punnāmavācakaṃ yāvattatsarvaṃ tvaṃ hi rāghava
tasmāllokatraye deva yuvābhyāṃ nāsti kiñcana
tvadābhāsoditājñānamavyākṛtamitīryate
tasmānmahānstataḥ sūtraṃ liṅgaṃ sarvātmakaṃ tataḥ
ahaṅkāraśca buddhiśca pañcaprāṇendriyāṇi ca
liṅgamityucyate prājñairjanmamṛtyusukhādimat
sa eva jīvasaṃjñaśca loke bhāti jaganmayaḥ
avācyānādyavidyaiva kāraṇopādhirucyate
sthūlaṃ sūkṣmaṃ kāraṇākhyamupādhitritayaṃ citeḥ
etairviśiṣṭo jīvaḥ syādviyuktaḥ parameśvaraḥ
jāgratsvapnasuṣuptyākhyā saṃsṛtiryā pravartate
tasyā vilakṣaṇaḥ sākṣī cinmātrastvaṃ raghūttama
tvatta eva jagajjātaṃ tvayi sarvaṃ pratiṣṭhitam
tvayyeva līyate kṛtsnaṃ tasmāttvaṃ sarvakāraṇam
rajjāvahimivātmānaṃ jīvaṃ jñātvā bhayaṃ bhavet
parātmāhamiti jñātvā bhayaduḥkhairvimucyate
cinmātrajyotiṣā sarvāḥ sarvadeheṣu buddhayaḥ
tvayā yasmātprakāśyante sarvasyātmā tato bhavān
ajñānānnyasyate sarvaṃ tvayi rajjau bhujaṅgavat
tvatpādabhaktiyuktānāṃ vijñānaṃ bhavati kramāt
tasmāttvadbhaktiyuktā ye muktibhājasta eva hi
ahaṃ tvadbhaktabhaktānāṃ tadbhaktānāṃ ca kiṅkaraḥ
ato māmanugṛhṇīṣva mohayasva na māṃ prabho
tvannābhikamalotpanno brahmā me janakaḥ prabho
atastavāhaṃ pautro'smi bhaktaṃ māṃ pāhi rāghava
ityuktvā bahuśo natvā svānandāśrupariplutaḥ
uvāca vacanaṃ rāma brahmaṇā nodito'smyaham
rāvaṇasya vadhārthāya jāto'si raghusattama
idānīṃ rājyarakṣārthaṃ pitā tvāmabhiṣekṣyati
yadi rājyābhisaṃsakto rāvaṇaṃ na haniṣyasi
pratijñā te kṛtā rāma bhūbhāraharaṇāya vai
tatsatyaṃ kuru rājendra satyasandhastvameva hi
śrutvaitadgaditaṃ rāmo nāradaṃ prāha sasmitam
śṛṇu nārada me kiñcidvidyate'viditaṃ kvacit
pratijñātaṃ ca yatpūrvaṃ kariṣye tanna saṃśayaḥ
kintu kālānurodhena tattatprārabdhasaṅkṣayāt
hariṣye sarvabhūbhāraṃ krameṇāsuramaṇḍalam
rāvaṇasya vināśārthaṃ śvo gantā daṇḍakānanam
caturdaśa samāstatra hyuṣitvā muniveṣadhṛk
sītāmiṣeṇa taṃ duṣṭaṃ sakulaṃ nāśayāmyaham
evaṃ rāme pratijñāte nāradaḥ pramumoda ha
pradakṣiṇatrayaṃ kṛtvā daṇḍavatpraṇipatya tam
anujñātaśca rāmeṇa yayau devagatiṃ muniḥ
saṃvādaṃ paṭhati śṛṇoti saṃsmaredvā
yo nityaṃ munivararāmayoḥ sabhaktyā
samprāpnotyamarasudurlabhaṃ vimokṣaṃ
kaivalyaṃ viratipuraḥsaraṃ krameṇa
||iti śrīmadadhyātmarāmāyaṇe umāmaheśvarasaṃvāde
ayodhyākāṇḍe prathamaḥ sarge nārada-rāma-saṃvādaḥ sampūrṇaḥ||