विभीषणकृतं रामस्तोत्रम्
श्री-महादेव उवाच
विभीषणो महाभागश्चतुर्भिर्मन्त्रिभिः सह
आगत्य गगने रामसम्मुखे समवस्थितः
उच्चैरुवाच भोः स्वामिन् राम राजीवलोचन
रावणस्यानुजोऽहं ते दारहर्तुर्विभीषणः
नाम्ना भ्रात्रा निरस्तोऽहं त्वामेव शरणं गतः
हितमुक्तं मया देव तस्य चाविदितात्मनः
सीतां रामाय वैदेहीं प्रेषयेति पुनः पुनः
उक्तोऽपि न शृणोत्येव कालपाशवशं गतः
हन्तुं मां खड्गमादाय प्राद्रवद्राक्षसाधमः
ततोऽचिरेण सचिवैश्चतुर्भिः सहितो भयात्
त्वामेव भवमोक्षाय मुमुक्षुः शरणं गतः
विभीषणवचः श्रुत्वा सुग्रीवो वाक्यमब्रवीत्
विश्वासार्हो न ते राम मायावी राक्षसाधमः
सीताहर्तुर्विशेषेण रावणस्यानुजो बली
मन्त्रिभिः सायुधैरस्मान् विवरे निहनिष्यति
तदाज्ञापय मे देव वानरैर्हन्यतामयम्
ममैवं भाति मे राम बुद्ध्या किं निश्चितं वद
श्रुत्वा सुग्रीववचनं रामः सस्मितमब्रवीत्
यदीच्छामि कपिश्रेष्ठ लोकान् सर्वान् सहेश्वरान्
निमिषार्धेन संहन्यां सृजामि निमिषार्धतः
अतो मयाऽभयं दत्तं शीघ्रमानय राक्षसम्
सकृदेव प्रपन्नाय तवास्मीति च याचते
अभयं सर्वभूतेभ्यो ददाम्येतद्व्रतं मम
रामस्य वचनं श्रुत्वा सुग्रीवो हृष्टमानसः
विभीषणमथानाय्य दर्शयामास राघवम्
विभीषणस्तु साष्टाङ्गं प्रणिपत्य रघूत्तमम्
हर्षगद्गदया वाचा भक्त्या च परयान्वितः
रामं श्यामं विशालाक्षं प्रसन्नमुखपङ्कजम्
धनुर्बाणधरं शान्तं लक्ष्मणेन समन्वितम्
कृताञ्जलिपुटो भूत्वा स्तोतुं समुपचक्रमे
विभीषण उवाच
नमस्ते राम राजेन्द्र नमः सीतामनोरम
नमस्ते चण्डकोदण्ड नमस्ते भक्तवत्सल
नमोऽनन्ताय शान्ताय रामायामिततेजसे
सुग्रीवमित्राय च ते रघूणां पतये नमः
जगदुत्पत्तिनाशानां कारणाय महात्मने
त्रैलोक्यगुरवेऽनादिगृहस्थाय नमो नमः
त्वमादिर्जगतां राम त्वमेव स्थितिकारणम्
त्वमन्ते निधनस्थानं स्वेच्छाचारस्त्वमेव हि
चराचराणां भूतानां बहिरन्तश्च राघव
व्याप्यव्यापकरूपेण भवान् भाति जगन्मयः
त्वन्मायया हृतज्ञाना नष्टात्मानो विचेतसः
गतागतं प्रपद्यन्ते पापपुण्यवशात्सदा
तावत्सत्यं जगद्भाति शुक्तिकारजतं यथा
यावन्न ज्ञायते ज्ञानं चेतसाऽनन्यगामिना
त्वदज्ञानात्सदा युक्ताः पुत्रदारगृहादिषु
रमन्ते विषयान् सर्वानन्ते दुःखप्रदान् विभो
त्वमिन्द्रोऽग्निर्यमो रक्षो वरुणश्च तथाऽनिलः
कुबेरश्च तथा रुद्रस्त्वमेव पुरुषोत्तम
त्वमणोरप्यणीयांश्च स्थूलात् स्थूलतरः प्रभो
त्वं पिता सर्वलोकानां माता धाता त्वमेव हि
आदिमध्यान्तरहितः परिपूर्णोऽच्युतोऽव्ययः
त्वं पाणिपादरहितश्चक्षुःश्रोत्रविवर्जितः
श्रोता द्रष्टा ग्रहीता च जवनस्त्वं खरान्तक
कोशेभ्यो व्यतिरिक्तस्त्वं निर्गुणो निरुपाश्रयः
निर्विकल्पो निर्विकारो निराकारो निरीश्वरः
षड्भावरहितोऽनादिः पुरुषः प्रकृतेः परः
मायया गृह्यमाणस्त्वं मनुष्य इव भाव्यसे
ज्ञात्वा त्वां निर्गुणमजं वैष्णवा मोक्षगामिनः
अहं त्वत्पादसद्भक्तिनिःश्रेणीं प्राप्य राघव
इच्छामि ज्ञानयोगाख्यं सौधमारोढुमीश्वर
नमः सीतापते राम नमः कारुणिकोत्तम
रावणारे नमस्तुभ्यं त्राहि मां भवसागरात्
ततः प्रसन्नः प्रोवाच श्रीरामो भक्तवत्सलः
वरं वृणीष्व भद्रं ते वाञ्छितं वरदोऽस्म्यहम्
विभीषण उवाच
धन्योऽस्मि कृतकृत्योऽस्मि कृतकार्योऽस्मि राघव
त्वत्पाददर्शनादेव विमुक्तोऽस्मि न संशयः
नास्ति मत्सदृशो धन्यो नास्ति मत्सदृशः शुचिः
नास्ति मत्सदृशो लोके राम त्वन्मूर्तिदर्शनात्
कर्मबन्धविनाशाय त्वज्ज्ञानं भक्तिलक्षणम्
त्वद्ध्यानं परमार्थं च देहि मे रघुनन्दन
न याचे राम राजेन्द्र सुखं विषयसम्भवम्
त्वत्पादकमले सक्ता भक्तिरेव सदास्तु मे
ओमित्युक्त्वा पुनः प्रीतो रामः प्रोवाच राक्षसम्
शृणु वक्ष्यामि ते भद्रं रहस्यं मम निश्चितम्
मद्भक्तानां प्रशान्तानां योगिनां वीतरागिणाम्
हृदये सीतया नित्यं वसाम्यत्र न संशयः
तस्मात्त्वं सर्वदा शान्तः सर्वकल्मषवर्जितः
मां ध्यात्वा मोक्ष्यसे नित्यं घोरसंसारसागरात्
स्तोत्रमेतत्पठेद्यस्तु लिखेद्यः शृणुयादपि
मत्प्रीतये ममाभीष्टं सारूप्यं समवाप्नुयात्
इत्युक्त्वा लक्ष्मणं प्राह श्रीरामो भक्तभक्तिमान्
पश्यत्विदानीमेवैष मम सन्दर्शने फलम्
लङ्काराज्येऽभिषेक्ष्यामि जलमानय सागरात्
यावच्चन्द्रश्च सूर्यश्च यावत्तिष्ठति मेदिनी
यावन्मम कथा लोके तावद्राज्यं करोत्वसौ
इत्युक्त्वा लक्ष्मणेनाम्बु ह्यानाय्य कलशेन तम्
लङ्काराज्याधिपत्यार्थमभिषेकं रमापतिः
कारयामास सचिवैर्लक्ष्मणेन विशेषतः
साधु साध्विति ते सर्वे वानरास्तुष्टुवुर्भृशम्।
॥इति श्रीमदध्यात्मरामायणे उमामहेश्वरसंवादे युद्धकाण्डे
तृतीये सर्गे विभीषणकृतं श्री-रामस्तोत्रं सम्पूर्णम्॥
విభీషణకృతం రామస్తోత్రమ్
శ్రీ-మహాదేవ ఉవాచ
విభీషణో మహాభాగశ్చతుర్భిర్మన్త్రిభిః సహ
ఆగత్య గగనే రామసమ్ముఖే సమవస్థితః
ఉచ్చైరువాచ భోః స్వామిన్ రామ రాజీవలోచన
రావణస్యానుజోఽహం తే దారహర్తుర్విభీషణః
నామ్నా భ్రాత్రా నిరస్తోఽహం త్వామేవ శరణం గతః
హితముక్తం మయా దేవ తస్య చావిదితాత్మనః
సీతాం రామాయ వైదేహీం ప్రేషయేతి పునః పునః
ఉక్తోఽపి న శృణోత్యేవ కాలపాశవశం గతః
హన్తుం మాం ఖడ్గమాదాయ ప్రాద్రవద్రాక్షసాధమః
తతోఽచిరేణ సచివైశ్చతుర్భిః సహితో భయాత్
త్వామేవ భవమోక్షాయ ముముక్షుః శరణం గతః
విభీషణవచః శ్రుత్వా సుగ్రీవో వాక్యమబ్రవీత్
విశ్వాసార్హో న తే రామ మాయావీ రాక్షసాధమః
సీతాహర్తుర్విశేషేణ రావణస్యానుజో బలీ
మన్త్రిభిః సాయుధైరస్మాన్ వివరే నిహనిష్యతి
తదాజ్ఞాపయ మే దేవ వానరైర్హన్యతామయమ్
మమైవం భాతి మే రామ బుద్ధ్యా కిం నిశ్చితం వద
శ్రుత్వా సుగ్రీవవచనం రామః సస్మితమబ్రవీత్
యదీచ్ఛామి కపిశ్రేష్ఠ లోకాన్ సర్వాన్ సహేశ్వరాన్
నిమిషార్ధేన సంహన్యాం సృజామి నిమిషార్ధతః
అతో మయాఽభయం దత్తం శీఘ్రమానయ రాక్షసమ్
సకృదేవ ప్రపన్నాయ తవాస్మీతి చ యాచతే
అభయం సర్వభూతేభ్యో దదామ్యేతద్వ్రతం మమ
రామస్య వచనం శ్రుత్వా సుగ్రీవో హృష్టమానసః
విభీషణమథానాయ్య దర్శయామాస రాఘవమ్
విభీషణస్తు సాష్టాఙ్గం ప్రణిపత్య రఘూత్తమమ్
హర్షగద్గదయా వాచా భక్త్యా చ పరయాన్వితః
రామం శ్యామం విశాలాక్షం ప్రసన్నముఖపఙ్కజమ్
ధనుర్బాణధరం శాన్తం లక్ష్మణేన సమన్వితమ్
కృతాఞ్జలిపుటో భూత్వా స్తోతుం సముపచక్రమే
విభీషణ ఉవాచ
నమస్తే రామ రాజేన్ద్ర నమః సీతామనోరమ
నమస్తే చణ్డకోదణ్డ నమస్తే భక్తవత్సల
నమోఽనన్తాయ శాన్తాయ రామాయామితతేజసే
సుగ్రీవమిత్రాయ చ తే రఘూణాం పతయే నమః
జగదుత్పత్తినాశానాం కారణాయ మహాత్మనే
త్రైలోక్యగురవేఽనాదిగృహస్థాయ నమో నమః
త్వమాదిర్జగతాం రామ త్వమేవ స్థితికారణమ్
త్వమన్తే నిధనస్థానం స్వేచ్ఛాచారస్త్వమేవ హి
చరాచరాణాం భూతానాం బహిరన్తశ్చ రాఘవ
వ్యాప్యవ్యాపకరూపేణ భవాన్ భాతి జగన్మయః
త్వన్మాయయా హృతజ్ఞానా నష్టాత్మానో విచేతసః
గతాగతం ప్రపద్యన్తే పాపపుణ్యవశాత్సదా
తావత్సత్యం జగద్భాతి శుక్తికారజతం యథా
యావన్న జ్ఞాయతే జ్ఞానం చేతసాఽనన్యగామినా
త్వదజ్ఞానాత్సదా యుక్తాః పుత్రదారగృహాదిషు
రమన్తే విషయాన్ సర్వానన్తే దుఃఖప్రదాన్ విభో
త్వమిన్ద్రోఽగ్నిర్యమో రక్షో వరుణశ్చ తథాఽనిలః
కుబేరశ్చ తథా రుద్రస్త్వమేవ పురుషోత్తమ
త్వమణోరప్యణీయాంశ్చ స్థూలాత్ స్థూలతరః ప్రభో
త్వం పితా సర్వలోకానాం మాతా ధాతా త్వమేవ హి
ఆదిమధ్యాన్తరహితః పరిపూర్ణోఽచ్యుతోఽవ్యయః
త్వం పాణిపాదరహితశ్చక్షుఃశ్రోత్రవివర్జితః
శ్రోతా ద్రష్టా గ్రహీతా చ జవనస్త్వం ఖరాన్తక
కోశేభ్యో వ్యతిరిక్తస్త్వం నిర్గుణో నిరుపాశ్రయః
నిర్వికల్పో నిర్వికారో నిరాకారో నిరీశ్వరః
షడ్భావరహితోఽనాదిః పురుషః ప్రకృతేః పరః
మాయయా గృహ్యమాణస్త్వం మనుష్య ఇవ భావ్యసే
జ్ఞాత్వా త్వాం నిర్గుణమజం వైష్ణవా మోక్షగామినః
అహం త్వత్పాదసద్భక్తినిఃశ్రేణీం ప్రాప్య రాఘవ
ఇచ్ఛామి జ్ఞానయోగాఖ్యం సౌధమారోఢుమీశ్వర
నమః సీతాపతే రామ నమః కారుణికోత్తమ
రావణారే నమస్తుభ్యం త్రాహి మాం భవసాగరాత్
తతః ప్రసన్నః ప్రోవాచ శ్రీరామో భక్తవత్సలః
వరం వృణీష్వ భద్రం తే వాఞ్ఛితం వరదోఽస్మ్యహమ్
విభీషణ ఉవాచ
ధన్యోఽస్మి కృతకృత్యోఽస్మి కృతకార్యోఽస్మి రాఘవ
త్వత్పాదదర్శనాదేవ విముక్తోఽస్మి న సంశయః
నాస్తి మత్సదృశో ధన్యో నాస్తి మత్సదృశః శుచిః
నాస్తి మత్సదృశో లోకే రామ త్వన్మూర్తిదర్శనాత్
కర్మబన్ధవినాశాయ త్వజ్జ్ఞానం భక్తిలక్షణమ్
త్వద్ధ్యానం పరమార్థం చ దేహి మే రఘునన్దన
న యాచే రామ రాజేన్ద్ర సుఖం విషయసమ్భవమ్
త్వత్పాదకమలే సక్తా భక్తిరేవ సదాస్తు మే
ఓమిత్యుక్త్వా పునః ప్రీతో రామః ప్రోవాచ రాక్షసమ్
శృణు వక్ష్యామి తే భద్రం రహస్యం మమ నిశ్చితమ్
మద్భక్తానాం ప్రశాన్తానాం యోగినాం వీతరాగిణామ్
హృదయే సీతయా నిత్యం వసామ్యత్ర న సంశయః
తస్మాత్త్వం సర్వదా శాన్తః సర్వకల్మషవర్జితః
మాం ధ్యాత్వా మోక్ష్యసే నిత్యం ఘోరసంసారసాగరాత్
స్తోత్రమేతత్పఠేద్యస్తు లిఖేద్యః శృణుయాదపి
మత్ప్రీతయే మమాభీష్టం సారూప్యం సమవాప్నుయాత్
ఇత్యుక్త్వా లక్ష్మణం ప్రాహ శ్రీరామో భక్తభక్తిమాన్
పశ్యత్విదానీమేవైష మమ సన్దర్శనే ఫలమ్
లఙ్కారాజ్యేఽభిషేక్ష్యామి జలమానయ సాగరాత్
యావచ్చన్ద్రశ్చ సూర్యశ్చ యావత్తిష్ఠతి మేదినీ
యావన్మమ కథా లోకే తావద్రాజ్యం కరోత్వసౌ
ఇత్యుక్త్వా లక్ష్మణేనామ్బు హ్యానాయ్య కలశేన తమ్
లఙ్కారాజ్యాధిపత్యార్థమభిషేకం రమాపతిః
కారయామాస సచివైర్లక్ష్మణేన విశేషతః
సాధు సాధ్వితి తే సర్వే వానరాస్తుష్టువుర్భృశమ్।
॥ఇతి శ్రీమదధ్యాత్మరామాయణే ఉమామహేశ్వరసంవాదే యుద్ధకాణ్డే
తృతీయే సర్గే విభీషణకృతం శ్రీ-రామస్తోత్రం సమ్పూర్ణమ్॥
vibhīṣaṇakṛtaṃ rāmastotram
śrī-mahādeva uvāca
vibhīṣaṇo mahābhāgaścaturbhirmantribhiḥ saha
āgatya gagane rāmasammukhe samavasthitaḥ
uccairuvāca bhoḥ svāmin rāma rājīvalocana
rāvaṇasyānujo'haṃ te dāraharturvibhīṣaṇaḥ
nāmnā bhrātrā nirasto'haṃ tvāmeva śaraṇaṃ gataḥ
hitamuktaṃ mayā deva tasya cāviditātmanaḥ
sītāṃ rāmāya vaidehīṃ preṣayeti punaḥ punaḥ
ukto'pi na śṛṇotyeva kālapāśavaśaṃ gataḥ
hantuṃ māṃ khaḍgamādāya prādravadrākṣasādhamaḥ
tato'cireṇa sacivaiścaturbhiḥ sahito bhayāt
tvāmeva bhavamokṣāya mumukṣuḥ śaraṇaṃ gataḥ
vibhīṣaṇavacaḥ śrutvā sugrīvo vākyamabravīt
viśvāsārho na te rāma māyāvī rākṣasādhamaḥ
sītāharturviśeṣeṇa rāvaṇasyānujo balī
mantribhiḥ sāyudhairasmān vivare nihaniṣyati
tadājñāpaya me deva vānarairhanyatāmayam
mamaivaṃ bhāti me rāma buddhyā kiṃ niścitaṃ vada
śrutvā sugrīvavacanaṃ rāmaḥ sasmitamabravīt
yadīcchāmi kapiśreṣṭha lokān sarvān saheśvarān
nimiṣārdhena saṃhanyāṃ sṛjāmi nimiṣārdhataḥ
ato mayā'bhayaṃ dattaṃ śīghramānaya rākṣasam
sakṛdeva prapannāya tavāsmīti ca yācate
abhayaṃ sarvabhūtebhyo dadāmyetadvrataṃ mama
rāmasya vacanaṃ śrutvā sugrīvo hṛṣṭamānasaḥ
vibhīṣaṇamathānāyya darśayāmāsa rāghavam
vibhīṣaṇastu sāṣṭāṅgaṃ praṇipatya raghūttamam
harṣagadgadayā vācā bhaktyā ca parayānvitaḥ
rāmaṃ śyāmaṃ viśālākṣaṃ prasannamukhapaṅkajam
dhanurbāṇadharaṃ śāntaṃ lakṣmaṇena samanvitam
kṛtāñjalipuṭo bhūtvā stotuṃ samupacakrame
vibhīṣaṇa uvāca
namaste rāma rājendra namaḥ sītāmanorama
namaste caṇḍakodaṇḍa namaste bhaktavatsala
namo'nantāya śāntāya rāmāyāmitatejase
sugrīvamitrāya ca te raghūṇāṃ pataye namaḥ
jagadutpattināśānāṃ kāraṇāya mahātmane
trailokyagurave'nādigṛhasthāya namo namaḥ
tvamādirjagatāṃ rāma tvameva sthitikāraṇam
tvamante nidhanasthānaṃ svecchācārastvameva hi
carācarāṇāṃ bhūtānāṃ bahirantaśca rāghava
vyāpyavyāpakarūpeṇa bhavān bhāti jaganmayaḥ
tvanmāyayā hṛtajñānā naṣṭātmāno vicetasaḥ
gatāgataṃ prapadyante pāpapuṇyavaśātsadā
tāvatsatyaṃ jagadbhāti śuktikārajataṃ yathā
yāvanna jñāyate jñānaṃ cetasā'nanyagāminā
tvadajñānātsadā yuktāḥ putradāragṛhādiṣu
ramante viṣayān sarvānante duḥkhapradān vibho
tvamindro'gniryamo rakṣo varuṇaśca tathā'nilaḥ
kuberaśca tathā rudrastvameva puruṣottama
tvamaṇorapyaṇīyāṃśca sthūlāt sthūlataraḥ prabho
tvaṃ pitā sarvalokānāṃ mātā dhātā tvameva hi
ādimadhyāntarahitaḥ paripūrṇo'cyuto'vyayaḥ
tvaṃ pāṇipādarahitaścakṣuḥśrotravivarjitaḥ
śrotā draṣṭā grahītā ca javanastvaṃ kharāntaka
kośebhyo vyatiriktastvaṃ nirguṇo nirupāśrayaḥ
nirvikalpo nirvikāro nirākāro nirīśvaraḥ
ṣaḍbhāvarahito'nādiḥ puruṣaḥ prakṛteḥ paraḥ
māyayā gṛhyamāṇastvaṃ manuṣya iva bhāvyase
jñātvā tvāṃ nirguṇamajaṃ vaiṣṇavā mokṣagāminaḥ
ahaṃ tvatpādasadbhaktiniḥśreṇīṃ prāpya rāghava
icchāmi jñānayogākhyaṃ saudhamāroḍhumīśvara
namaḥ sītāpate rāma namaḥ kāruṇikottama
rāvaṇāre namastubhyaṃ trāhi māṃ bhavasāgarāt
tataḥ prasannaḥ provāca śrīrāmo bhaktavatsalaḥ
varaṃ vṛṇīṣva bhadraṃ te vāñchitaṃ varado'smyaham
vibhīṣaṇa uvāca
dhanyo'smi kṛtakṛtyo'smi kṛtakāryo'smi rāghava
tvatpādadarśanādeva vimukto'smi na saṃśayaḥ
nāsti matsadṛśo dhanyo nāsti matsadṛśaḥ śuciḥ
nāsti matsadṛśo loke rāma tvanmūrtidarśanāt
karmabandhavināśāya tvajjñānaṃ bhaktilakṣaṇam
tvaddhyānaṃ paramārthaṃ ca dehi me raghunandana
na yāce rāma rājendra sukhaṃ viṣayasambhavam
tvatpādakamale saktā bhaktireva sadāstu me
omityuktvā punaḥ prīto rāmaḥ provāca rākṣasam
śṛṇu vakṣyāmi te bhadraṃ rahasyaṃ mama niścitam
madbhaktānāṃ praśāntānāṃ yogināṃ vītarāgiṇām
hṛdaye sītayā nityaṃ vasāmyatra na saṃśayaḥ
tasmāttvaṃ sarvadā śāntaḥ sarvakalmaṣavarjitaḥ
māṃ dhyātvā mokṣyase nityaṃ ghorasaṃsārasāgarāt
stotrametatpaṭhedyastu likhedyaḥ śṛṇuyādapi
matprītaye mamābhīṣṭaṃ sārūpyaṃ samavāpnuyāt
ityuktvā lakṣmaṇaṃ prāha śrīrāmo bhaktabhaktimān
paśyatvidānīmevaiṣa mama sandarśane phalam
laṅkārājye'bhiṣekṣyāmi jalamānaya sāgarāt
yāvaccandraśca sūryaśca yāvattiṣṭhati medinī
yāvanmama kathā loke tāvadrājyaṃ karotvasau
ityuktvā lakṣmaṇenāmbu hyānāyya kalaśena tam
laṅkārājyādhipatyārthamabhiṣekaṃ ramāpatiḥ
kārayāmāsa sacivairlakṣmaṇena viśeṣataḥ
sādhu sādhviti te sarve vānarāstuṣṭuvurbhṛśam|
||iti śrīmadadhyātmarāmāyaṇe umāmaheśvarasaṃvāde yuddhakāṇḍe
tṛtīye sarge vibhīṣaṇakṛtaṃ śrī-rāmastotraṃ sampūrṇam||